ຂປລ. ໂຄງການແບ່ງປັນຄວາມຝັນກັບ ເອສຊີຈີ (SCG) sharing the dream ໄດ້ມອບທຶນການສຶກສາ ໃຫ້ແກ່ນ້ອງນັກຮຽນຊັ້ນມັດທະຍົມສຶກສາຕອນປາຍ ມ5-ມ7 ຈຳນວນ 230 ທຶນ ເປັນປີທີ 4 ມີມູນຄ່າເຖິງ 373.750.000 ກີບ ຂຶ້ນໃນວັນທີ 9 ທັນວາ 2015 ທີ່ ສູນກິລາບູໂດລາວ-ຍີ່ປຸ່ນ, ໂດຍມີ ທ່ານນາງ ແສງເດືອນ ຫລ້າຈັນທະບູນ ລັດຖະມົນຊ່ວຍວ່າການກະຊວງສຶກສາທິການ ແລະ ກິລາ, ທ່ານ ອາລີ ສະວະລິດຊີວິນກູນ ຮອງປະທານບໍລິສັດ ເອສຊີຈີ ຊີມັງ-ຜະລິດຕະພັນກໍ່ສ້າງ, ຄູອາຈານ ແລະ ນ້ອງນັກຮຽນເຂົ້າຮ່ວມ.
ທ່ານ ອາລີ ສະວະລິດຊີວິນກູນ ກ່າວວ່າ: ໂຄງການ ເອສຊີຈີ ໄດ້ຮ່ວມກັບສະມາຄົມຮ່ວມນ້ຳໃຈເດັກນ້ອຍລາວ ຮັບສະໝັກນັກຮຽນມັດທະຍົມສຶກສາ ຊັ້ນປີ ທີ 5-7 ຈາກໂຮງຮຽນລັດ ທົ່ວນະຄອນຫລວງວຽງຈັນ ແລະ ແຂວງຄຳມ່ວນ ເພື່ອຄັດເລືອກເອົາເຍົາວະຊົນ ທີມີຜົນງານດີເດັ່ນ ໃນດ້ານການຮຽນ, ກິລາ, ສີລະປະ ແຕ່ມີຄວາມຂາດເຂີນທາງດ້ານທຶນຮ້ອນ ແລະ ໃນປີນີ້ໄດ້ມອບທຶນການສຶກສາຈຳນວນ 230 ທຶນ, ຢູ່ນະຄອນຫລວງວຽງຈັນ ຈຳນວນ 150 ທຶນ ແລະ ແຂວງຄຳມ່ວນ 80 ທຶນ, ເພີ່ມຈາກປີທີ່ຜ່ານມາ 30 ທຶນ.
ທ່ານ ອາລີ ສະວະລິດຊີວິນກູນ ຍັງໃຫ້ຮູ້ອີກວ່າ: ຈາກການຕິດຕາມຜົນການຮຽນ 3 ປີ ຜ່ານມາພົບວ່ານ້ອງໆນັກຮຽນມີຄວາມກ້າວໜ້າທາງການສຶກສາຫລາຍຂຶ້ນ ແລະ ເຫັນວ່າຫລາຍຄົນ ໄດ້ສຶກສາຕໍ່ລະດັບສູງຂຶ້ນ. ພິເສດ ເອສຊີຈີ ຍັງມອບລາງວັນໃຫ້ແກ່ນັກຮຽນ ທີ່ເຄີຍໄດ້ຮັບທຶນ ຈາກໂຄງການໃນປີຜ່ານມາ ຈຳນວນ 12 ຄົນ ເພື່ອເປັນຂວັນກຳລັງໃຈ ແລະ ສົ່ງເສີມໃຫ້ເຍົາວະຊົນ ມຸ້ງໝັ້ນ ຕັ້ງໃຈໃນການສຶກສາຮໍ່າຮຽນ.
ນ້ອງນາງ ບົວວອນ ເພັງມີໄຊ, ອາຍຸ 17 ປີ ສຶກສາຢູ່ຊັ້ນ ມ7/2 ມສ ໂນນສະອາດ ໄດ້ຮັບທຶນຈາກໂຄງການເປັນປີທີ 2 ໄດ້ໃຫ້ສຳພາດວ່າ: ຮູ້ສຶກດີໃຈຫລາຍ ແລະ ຂໍຂອບໃຈໂຄງການແບ່ງປັນຄວາມຝັນກັບ ເອສຊີຈີ ທີ່ໄດ້ໃຫ້ທຶນການສຶກສາ ເປັນປີທີ່ 2 ແລະ ສັນຍາວ່າຈະຕັ້ງໃຈຮຽນ ແລະ ນຳໃຊ້ທຶນໃຫ້ເກີດປະໂຫຍດ ໃຫ້ຫລາຍທີ່ສຸດ.
ແຫລ່ງຂ່າວ:
