ວັດປ່າພະບາດພູເຂົາຄວາຍ ເປັນແຫລ່ງທ່ອງທ່ຽວທາງຈິດໃຈອີກແຫ່ງໜຶ່ງທີ່ລໍ້າຄ່າເປັນຕົ້ນແມ່ນຮອຍພະບາດທີ່ຕັ້ງຢູ່ໃນເຂດ “ທ່າຊ້າງ ວັງຫລວງດານໂພ, ດານໄຮ, ດອຍພະພັກ, ຖໍ້າພະບູຮານ, ຫີນຊ້າງສີ, ວັງຄ້ອງ ແລະວັງກ້ອງ”, ຕາມການບອກເລົ່າຂອງບັນພະບຸລຸດສືບທອດກັນມາຫລາຍເຊັ່ນຄົນວ່າ ສະຖານທີ່ດັ່ງກ່າວລຶກລັບຊັບຊ້ອນເປັນທີ່ເຄົາລົບ ແລະ ຢໍາເກງຂອງຜູ້ຄົນຕະຫລອດມາ. ບາງເທື່ອ ສິນດັບ ສິນເພັງ ໄດ້ຍິນສຽງຄ້ອງສຽງກອງດັງຂຶ້ນ, ມີແຜ່ນສີລາດານຫີນກວ້າງໃຫຍ່ເປັນຣາຊະສີ, ມີຕົ້ນໄມ້ໃຫຍ່ນ້ອຍເກີດຕາມດານຫີນ, ບາງບ່ອນເປັນດົງໜາປ່າຕຶບ, ພູສູງຊັນເຫວເລິກມີໂງ່ນຫີນນ້ອຍໃຫຍ່, ຖໍ້າຮູຄູຫາມີພະພຸດທະຮູບບູຮານປະດິດສະຖານໄວ້, ຫ້ວຍນໍ້າລໍາທານມາຈາກອ່າງຢູ່ເນີນພູເຂົາຄວາຍໄຫລຜ່ານອ້ອມສະຖານທີ່ດັ່ງກ່າວ, ສອງສ່ວນສີ່ ມີນາມວ່າ: “ລໍານໍ້າທົນ”, ບໍລິເວນດັ່ງກ່າວເປັນເຂດແດນກວ້າງຂວາງ, ມີເງື່ອນໄຂສະດວກຂອງພະສົງອົງສະແຫວງຫາຄວາມສຸກທາງດ້ານຈິດໃຈ ແລະຍັງເປັນສະຖານທີ່ທ່ອງທ່ຽວທາງຈິດຂອງຄົນທົ່ວໄປອີກດ້ວຍ.
ວັດປ່າພະບາດພູເຂົາຄວາຍຕັ້ງຢູ່ບ້ານນາຍາງ, ເມືອງທຸລະຄົມ, ແຂວງວຽງຈັນໄປຕາມທາງເລກ 10 ປະມານ 25 ກິໂລແມັດ, ລ້ຽວຂວາເຂົ້າໄປຜ່ານບ້ານນານົກຂຸ້ມ ແລະບ້ານນາຍາງຕື່ມປະມານ 3 ກິໂລແມັດເຫັນປະຕູໂຂງໃຫຍ່ຕັ້ງເຈິ້ນເຖິ້ນຢູ່ເບື້ອງຊ້າຍມືເຂົ້າໄປອີກບໍ່ໄກກໍເຖິງວັດປ່າພະບາດພູເຂົາຄວາຍແດນແຫ່ງອະຣິຍະທໍາທາງຈິດໃຈແຫ່ງໃໝ່ວ່າຊັ້ນໄດ້. ວັດດັ່ງກ່າວ, ເຖິງວ່າຫາກໍຄົ້ນພົບຮອຍພະບາດປີ 1991 ຈາກນັ້ນຕໍ່ມາໃນປີ 1997 ໄດ້ຮັບການສ້າງຕັ້ງຂຶ້ນ ແລະ ພັດທະນາຕະຫລອດມາຮອດປັດຈຸບັນນີ້.
ຜູ້ຂຽນມີໂອກາດເລາະທ່ຽວຊົມຕົວຈິງເລີຍເກັບພາບງາມໆເຫລົ່ານັ້ນມາເລົ່າຄືນ, ເມື່ອຜ່ານປະຕູໂຂງວັດລ້ຽວຊ້າຍເຂົ້າໄປທາງໃນຈະເຫັນອົງພະທາດກວມຮອຍພະບາດ, ພະທາດໜ່ວຍນີ້ເປັນຮູບຈຳລອງບ່ອນພະພຸດທະອົງຊົງຕັດສະຣູ້, ຕໍ່ດ້ວຍທາດນ້ອຍສີ່ໜ່ວຍຢູ່ແຈສູງ 7 ແມັດ ທີ່ມີຮູບຊົງລວດລາຍ ແບບປານີດ ວິຈິດບັນຈົງ ແລະ ງົດງາມ, ມີສາລາໂຮງທຳຕັ້ງຢູ່ເທິງແຜ່ນຫີນດານໃຫຍ່, ມີສະຖານທີ່ຈຳລອງທີ່ພະພຸດທະອົງຊົງປະຣິນິບພານ, ມີພະພຸດທະຮູບໃຫຍ່ປາງໃສຍາດ, ມີສະຖານທີ່ຈຳລອງທີ່ພະພຸດທະອົງຊົງປະຖົມມະເທດສະໜາໂຜດປັນຈະວັກຄີທັງ 5 ຢູ່ເທິງດອຍພະພັກ, ພະພຸດທະຮູບຂະໜາດໜ້າຕັກ 9 ແມັດ, ປາງປະຖົມມະເທສະໜາ, ມີສວນລຸມພິນີຈຳລອງວັນທີ່ພະພຸດທະອົງຊົງປະສູດ. ສະຖານທີ່ສັກສິດທັງສີ່ນີ້ມີຈິງຢູ່ປະເທດເນປານ ແລະ ອິນເດຍ, ຖືວ່າຢູ່ລາວເປັນແຫ່ງທຳອິດ ແລະແຫ່ງທີສອງຂອງໂລກກໍວ່າໄດ້. ນອກຈາກຄວາມໜ້າອັດສະຈັນຂອງສະຖານທີ່ຈຳລອງ ແລະ ພະພຸດທະຮູບແຕ່ລະອົງແລ້ວ, ວັດດັ່ງກ່າວ ຍັງອ້ອມຮອບດ້ວຍທຳມະຊາດ, ປ່າຕຶບດົງໜາ, ແມ່ນໍ້າລຳທານ, ຖໍ້າ, ສັດປ່ານາໆພັນ ແລະ ເປັນເຂດຮັກສາຕົ້ນໄມ້ເຄືອເຂົາທີ່ເປັນຢາອີກດ້ວຍ.
ສະຖານທີ່ສັກສິດດັ່ງກ່າວເປັນບ່ອນພຸດທະສາສະໜາ ເປັນພຸດທະບູຊາ ທຳມະບູຊາ ສັງຄະບູຊາ ແລະມໍລະດົກອັນລໍ້າຄ່າ ເພື່ອໃຫ້ຊາວພຸດ ແລະ ລູກຫລານໄດ້ສັກກະຣະບູຊາສືບຕໍ່ໄປແລະເປັນແຫລ່ງທ່ອງທ່ຽວອະຣິຍະທຳທາງຈິດໃຈນຳອີກ…ພິເສດ ຜູ້ຂຽນເຄີຍໄດ້ຍິນວ່າ ຜູ້ຄົນທີ່ໄປກາບໄຫວ້ບູຊາໃນສະຖານທີ່ດັ່ງກ່າວກັບຄືນມາເຮືອນແລ້ວຝັນດີ ແລະ ມີໂຊກໄຊ ວ່າຊັ້ນ !
ແຫ່ລງຂ່າວ
