ຂປລ. ບັນດານັກທຸລະກິດ ແລະ ຜູ້ປະກອບການຈາກ ສປປ ລາວ, ກຳປູເຈຍ ແລະ ສສ ຫວຽດນາມ ໃນຂົງ ເຂດສາມລ່ຽມພັດທະນາ ແລະ ອີກ 4 ແຂວງພາກກາງຂອງລາວ ໄດ້ນຳເອົາສິນຄ້າ ແລະ ຜະລິດຕະພັນ ທີ່ໂດດເດັ່ນ ແລະ ເປັນເອກະລັກຂອງຕົນເອງມາວາງສະແດງ ແລະ ຈຳໜ່າຍຢູ່ໃນງານວາງສະແດງສິນຄ້າ ທີ່ຈັດຂຶ້ນແຕ່ວັນທີ 8-11 ທັນວາ 2015 ທີ່ແຂວງຈໍາປາສັກ ເພື່ອຮັດແໜ່້ນການ ຮ່ວມມືທາງ ດ້ານເສດຖະກິດ, ການຄ້າ, ການລົງທຶນ ແລະ ການທ່ອງທ່ຽວແນໃສ່ການສ້າງໂອກາດ ແລະ ເງື່ອນໄຂໃນການຕິດຕໍ່ພົວພັນ, ການແລກປ່ຽນຊື້-ຂາຍສິນຄ້າ ແລະ ການແລກປ່ຽນບົດຮຽນ ແລະ ປະສົບການທາງດ້ານທຸລະກິດຮ່ວມກັນ.
ທ່ານ ຄຳໝັ້ນ ພັນທະລາ ຮອງຫົວໜ້າພະແນກ ອຸດສາຫະກຳ ແລະ ການຄ້າ ແຂວງຈຳປາສັກ ກ່າວໃນພິທີ ເປີດງານວາງສະແດງສິນຄ້າ ແລະ ທ່ອງທ່ຽວໃນວັນທີ 8 ທັນວານີ້ວ່າ: ງານວາງສະແດງສິນຄ້າ ຄັ້ງນີ້ ແມ່ນກິດຈະກຳໜຶ່ງ ຂອງການດຳເນີນ ກອງປະຊຸມລັດຖະມົນຕີ ຄະນະກຳມະການ ປະສານງານຮ່ວມ ເຂດສາມລ່ຽມພັດທະນາ ກຳປູເຈຍ-ລາວ-ຫວຽດນາມ ຄັ້ງທີ 10 ທີ່ ສປປ ລາວ ໄດ້ຮັບກຽດເປັນເຈົ້າພາບ, ໂດຍມີຈຸດປະສົງ ເພື່ອສົ່ງເສີມການຄ້າ ແລະ ການທ່ອງທ່ຽວພາຍໃນສາມປະເທດ ໂດຍສະເພາະໃນຂອບເຂດສາມລ່ຽມພັດທະນາທີ່ກວມເອົາ 13 ແຂວງຂອງ ສາມປະເທດໃນເນື້ອທີ່ທັງໝົດ144,600 ກິໂລຕາແມັດ. ພາຍໃນງານ ມີຜູ້ປະກອບ ການທຸລະກິດເຂົ້າຮ່ວມເກືອບ 300 ຫ້ອງວາງສະແດງ, ໃນນັ້ນ ມາຈາກກຳປູເຈຍ ແລະ ຫວຽດນາມ 9 ຫ້ອງ. ສ່ວນທີ່ເຫລືອມາຈາກຜູ້ປະກອບການທຸລະ ກິດພາຍໃນປະເທດ ລວມມູນຄ້າສິນຄ້າທີ່ເຂົ້າມາວາງສະແດງ ແລະ ຈຳໜ່າຍທັງໝົດມີປະມານ 4 ຕື້ກີບ ຄາດວ່າຈະມີ ເງິນໝູນວຽນໃນແຕ່ລະວັນ ປະມານ 500 ລ້ານກີບ.
ບັນດາຜະລິດຕະພັນທີ່ນຳມາວາງສະແດງ ແລະ ຈຳໜ່າຍໃນງານນີ້ ລ້ວນແລ້ວແຕ່ເປັນສິນຄ້າທີ່ເປັນທ່າແຮງ ຂອງແຕ່ລະປະເທດເຊັ່ນ: ການເຟ, ເຄື່ອງຫັດຖະກຳ, ເຄື່ອງແກະສະຫລັກ, ເຟີນີເຈີ, ເຄື່ອງອຸປະ ໂພກ-ບໍລິ ໂພກ, ເຄື່ອງ ນຸ່ງຫົ່ມ, ຢາພື້ນເມືອງ ແລະ ຜະລິດຕະພັນສົ່ງເສີມການທ່ອງທ່ຽວ. ທີ່ສຳຄັນງານວາງສະແດງຄັ້ງນີ້ ຍັງເປັນການສົ່ງ ເສີມການຜະລິດຈາກພູມປັນຍາຂອງຊາວບ້ານ ໃນສາມປະເທດ ໂດຍສະເພາະໃນເຂດສາມລ່ຽມ ພັດທະນາໂດຍແນໃສ່ ແກ້ໄຂຄວາມທຸກຍາກ ແລະ ສົ່ງເສີມການຜະລິດໃຫ້ນັບມື້ນັບເປັນສິນຄ້າ ແລະ ມີຄວາມຍືນຍົງ.
ໃຫ້ກຽດຕັດແຖບຜ້າເພື່ອເປີດງານດັ່ງກ່າວຢ່າງເປັນທາງການມີ ທ່ານ ບົວສອນ ວົງສາຄອນ ຮອງເຈົ້າ ແຂວງໆ ຈຳປາສັກ, ທ່ານ ດາວັນຮຽວ ຫົວໜ້າກົງສູນໃຫຍ່ ສສ ຫວຽດນາມປະຈຳພາກໃຕ້ ສປປ ລາວ, ທ່ານ ມີໂປ ຕາງໜ້າກະຊວງໄປສະນີ ແລະ ໂທລະຄົມມະນາຄົມກຳປູເຈຍ ແລະ ທ່ານ ສົມຫວັງ ນິນທະວົງ ຫົວໜ້າກົມສົ່ງເສີມ ແລະ ພັດທະນາສິນຄ້າ ກະຊວງອຸດສາຫະກຳ ແລະ ການຄ້າ.
ແຫ່ລງຂ່າວ
