ສຳນັກຂ່າວຕ່າງປະເທດ ລາຍງານໃນວັນທີ 8 ທັນວານີ້ວ່າ ສະຖານະການ ສົ່ງຄາມກາງເມືອງຊີຣີ ໄດ້ພິກປີ້ນເຂົ້າສູ່ສະຖານະການໃໝ່ ເມື່ອມື້ວານນີ້ (7 ທັນວາ) ລັດຖະບານຊີຣີ ແລະ ກຸ່ມສັງເກດການ ດ້ານສິດທິມະນຸດໃນຊີຣີ ໄດ້ອອກມາລາຍງານວ່າ ເຮືອບິນສູ້ຮົບ ຂອງກອງກຳລັງພັນທະມິດຊາດຕາເວັນຕົກ ນຳໂດຍສະຫະລັດອາເມຣິກາ ໄດ້ທຳການໂຈມຕີໃສ່ຄ້າຍທະຫານ ຂອງກອງທັບລັດຖະບານຊີຣີ ທາງພາກຕາເວັນອອກຂອງປະເທດ ໃນວັນທີ 6 ທັນວາ 2015 ດ້ວຍການຍິງລູກສອນໄຟ 9 ລູກ ສົ່ງຜົນເຮັດໃຫ້ ລົດຂອງກອງທັບຈຳນວນໜຶ່ງຖືກທຳລາຍ ແລະ ມີເຈົ້າໜ້າທີ່ເສຍຊີວິດ 3 ຄົນ ບາດເຈັບອີກ 13 ຄົນ.

ຈາກເຫດການດັ່ງກ່າວ ໄດ້ເຮັດໃຫ້ກະຊວງການຕ່າງປະເທດຊີຣີ ຍື່ນໜັງສືປະທ້ວງ ຕໍ່ຄະນະມົນຕີຄວາມໝັ້ນຄົງ ແຫ່ງ ສະຫະປະຊາຊາດ ຢ່າງເປັນທາງການ ວ່າຂໍປະນາມການໂຈມຕີດັ່ງກ່າວນີ້ ຊຶ່ງຖືວ່າເປັນການຮຸກຮານ.

ກ່ອນໜ້ານີ້ ທ່ານ ບາຊາ ອັນ-ອັດຊາດ ປະທານາທິບໍດີຊີຣີ ໄດ້ອອກມາປະນາມຫລາຍຄັ້ງ ເຖິງການໂຈມຕີທາງອາກາດ ຂອງກອງກຳລັງພັນທະມິດຕາເວັນຕົກ ໃສ່ເປົ້າໝາຍຕ່າງໆ ພາຍໃນປະເທດຊີຣີ ແມ່ນຖືເປັນເລື່ອງຜິດກົດໝາຍ ເນື່ອງຈາກລັດຖະບານຂອງຊີຣີເອງ ບໍ່ເຄີຍອະນຸຍາດເປີດນ່ານຟ້າໃຫ້, ຊຶ່ງແຕກຕ່າງຈາກ ກໍລະນີການໂຈມຕີຂອງຣັດເຊຍ ທີ່ແມ່ນຝ່າຍລັດຖະບານຊີຣີເອງ ເປັນຜູ້ດຳເນີນການຮ້ອງຂໍ ໃຫ້ເຂົ້າມາຊ່ວຍເຫລືອ ປາບປາມກຸ່ມຕິດອາວຸດຕ່າງໆ ຢ່າງຖືກຕ້ອງ ຕາມກົດໝາຍ.