ວັນທີ 7 ທັນວານີ້, ອົງການສະຫະປະຊາດກອງທຶນສຳລັບປະຊາກອນ (UNFPA ) ປະ ຈຳລາວໄດ້ຈັດກອງປະຊຸມເຜີຍແຜ່ບົດລາຍງານສະຖານະພາບປະຊາກອນໂລກປະຈຳປີ 2015 ພາບໃຕ້ຫົວຂໍ້ ” ປົກປ້ອງຈາກວິທີຫັນປ່ຽນຍຸດທະສາດເພື່ອແມ່ຍິງ ແລະ ເດັກຍິງ” ຂື້ນທີ່ໂຮງແຮມ ເມີຄິວໃນນະຄອນລວງວຽງຈັນ, ໂດຍການເຂົ້າຮ່ວມຂອງທ່ານ ດຣ ກິແກ້ວ ຈັນທະບູລີ, ລັດຖະມົນຕີຊ່ວຍວ່າການກະຊວງແຜນການ ແລະ ການລົງທຶນ, ທ່ານ ດຣ ຮາຊານ ໂມຕາຊາມີ, ຜູ້ຕາງໜ້າອົງການ UNFPA ປະຈຳລາວ, ພ້ອມດ້ວຍຜູ້ຕ່າງໜ້າພາກສ່ວນກ່ຽວຂ້ອງຕ່າງໆເຂົ້າຮ່ວມເປັນຈຳນວນຫຼາຍ.
ທ່ານລັດຖະມົນຕີຊ່ວຍມີຄຳຫັນໃນພິທີວ່າ: ໃນທຸກໆປີ, ກະຊວງແຜນການ ແລະ ການລົງທຶນ ໄດ້ຮ່ວມກັບ ອົງການສະຫະປະຊາຊາດກອງທຶນສຳລັບປະຊາກອນໄດ້ລາຍງານສະຖານະພາບປະຊາກອນໂລກຂື້ນ ແລະ ສະເພາະປີນີ້, ຍິ່ງມີຄວາມໝາຍຄວາມສຳຄັນຫຼາຍໃນການຈັດຕັ້ງປະຕິບັດແຜນດຳເນີນງານ
ຂອງກອງປະຊຸມສາກົນວ່າດ້ວຍປະຊາກອນ ແລະ ການພັດທະນາ (International Conference for Population and Development (ICPD)). ເຊິ່ງໄດ້ເຫນັ້ນໃຫ້ບັນລຸເປົ້າໝາຍສະຫະສະຫວັດເພື່ອການພັດທະນາ MDGs ແລະ ເປົ້າຫມາຍພັດທະນາແບບ ຍືນຍົງ (SDGs). ໃນປັດຈຸບັນອັດຕາການຂະຫຍາຍຕົວຂອງຈຳນວນປະຊາກອນໂລກ ແມ່ນນັບມື້ນັບເພີ່ມຂຶ້ນ, ອີງຕາມບົດລາຍງານສະຖານະພາບປະຊາກອນໂລກ ປີ 2015 ຊີ້ໃຫ້ເຫັນວ່າ, ການຕອບສະຫນອງຄວາມຕ້ອງການທາງດ້ານສຸຂະພາບຈະເລີນພັນແມ່ຍິງ ແລະ ໄວໜຸ່ມຍິງ ສ່ວນຫຼາຍຖືກປະລະໃນເວລາເກີດໄພພິບັດ ແລະ ເກີດມີຂໍ້ຂັດແຍ່ງເຊັ່ນ : ການຕອບສະໜອງເຂົ້າເຖີງການບໍລິການຂອງແພດ ພະດຸງຄັນ, ການປ້ອງກັນເຊື້ອ HIV ແລະ ອື່ນໆ .
ທ່ານລັດຖະມົນຕີຊ່ວຍກ່າວວ່າ: ປັດຈຸບັນປະຊາກອນປະມານ 100 ລ້ານຄົນ ແມ່ນມີຄວາມຕ້ອງການການຕອບສະໜອງທາງດ້ານສຸຂະພາບທາງເພດ ແລະ ຈະເລີນພັນ, ເຊິ່ງໃນນັ້ນ 26 ລ້ານຄົນ ແມ່ນ ແມ່ຍິງ ແລະ ໄວໜຸ່ມຍິງ ທີ່ຢູ່ໃນໄວຈະເລີນພັນ. ນອກນັ້ນ, 3/5 ຂອງອັດຕາການຕາຍ ແມ່ ແລະ ເດັກ ໃນປະຈຸບັນ ແມ່ນເກີດຂຶ້ນ ໃນບັນດາປະເທດ ທີ່ມີຄວາມສ່ຽງ ແລະ ຄວາມບອບບາງ ຕໍ່ກັບໄພພິບັດທາງທຳມະຊາດ ຫຼື ຂໍ້ຂັດແຍ່ງ. ການຖືພາ ແລະ ການເກີດລູກ ທີ່ບໍ່ມີສຸຂະອານາໄມ, ການຖືກພາແບບບໍ່ຕ້ອງການ ແລະ ພະຍາດຕິດຕໍ່ທາງເພດ ແມ່ນຕົ້ນເຫດທີ່ພາໃຫ້ອັດຕາການຕາຍຂອງ ແມ່ ເພີ່ມຂື້ນ ຈຳນວນ 507 ຄົນ/ມື້ ໃນປະເທດເຫຼົ່າານີ້. ດັ່ງນັ້ນ, ການຕອບສະໜອງການເຂົ້າເຖີງການບໍລິການສຸຂະພາບຈະເລີນພັນ, ເພດສຶກສາ ແລະ ການວາງແຜນຄອບຄົວ ແມ່ນມີຄວາມຈຳເປັນ ເພື່ອເຮັດໃຫ້ອັດຕາການຕາຍ ຂອງ ແມ່ຍິງ ແລະ ເດັກ ຫຼຸດລົງ.ຜ່ານມາ ລັດຖະບານ ເວົ້າສະເພາະ ສປປ ລາວ ໄດ້ຈັດຕັ້ງປະຕິບັດວຽກງານດັ່ງກ່າວຢ່າງຕັ້ງຫນ້າ ແລະ ແຂງແຮງ ເຊິ່ງໄດ້ສະແດງອອກໃນຜົນສຳເລັດຂອງການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ VII ແລະ ສາມາດສຳເລັດ ເປົ້າຫມາຍຫລັກຂອງ ແຜນ 5 ປີ ຄັ້ງທີ່VIII ຂອງລັດຖະບານ ຄື: ສຳເລັດເປົ້າຫມາຍສະຫະສະຫວັດດ້ານການພັດທະນາ MDGs ທີ່ຍັງບໍ່ທັນບັນລຸ, ບັນລຸເປົ້າຫມາຍພັດທະນາແບບ ຍືນຍົງ SDGs ທີ່ໄດ້ກໍານົດໃນ 3 ເສົ້າຄໍ້າ: ເສດຖະກິດ-ສັງຄົມ ແລະ ສິ່ງແວດລ້ອມ,ເຮັດໃຫ້ປະຊາຊົນ ບັນດາເຜົ່າ ມີຊີວິດການເປັນຢູ່ທີ່ ດີຂື້ນ ສປປ ລາວ ຫລຸດພົ້ນ ອອກຈາກ ສະຖານະພາບດ້ອຍພັດທະນາໃນ ປີ 2020, ດັ່ງນັ້ນຈຶ່ງຮຽກຮ້ອງໃຫ້ທຸກພາກສ່ວນ ໂດຍສະເພາະຂະແໜງການສຶກສາ, ສາທາລະນະສຸກ ກໍ່ຄືບັນດາອົງການຈັດຕັ້ງມະຫາຊົນ ທີ່ມີສາຍພົວພັນກັບການຈັດຕັ້ງຢູ່ຮາກຖານ,ໂດຍສະເພາະຢູ່ເຂດຊົນນະບົດ,ພູດອຍຫ່າງໄກສອກຫຼີກ, ເຂດຊົນເຜົ່າ ຈະຕ້ອງຊອກຫາມາດຕະການຕ່າງໆເພື່ອສົ່ງເສີມໃຫ້ ແມ່ຍິງ ແລະ ເດັກ ໄດ້ຮັບການສຶກສາຈົບຊັ້ນມັດທະຍົມເປັນຢ່າງຕໍ່າ ແລະ ເອົາການສຶກສາກ່ຽວກັບສຸຂະພາບໄວຈະເລີນພັນເຂົ້າສອນເປັນທາງການ ຫຼື ຜ່ານຂະບວນກິດຈະກຳຕ່າງໆ ຂອງໂຮງຮຽນ ນັບແຕ່ຊັ້ນປະຖົມ, ສຳລັບເຂດຊົນນະບົດຫຼໍ່ແຫຼມທີ່ນັກຮຽນມີຄວາມສ່ຽງຈະບໍ່ສືບຕໍ່ຮຽນຊັ້ນມັດຖະຍົມ. ພ້ອມດ່ຽວກັນນີ້ ເພື່ອຈະແກ້ໄຂບັນຫາການຫຼຸດຜ່ອນອັດຕາການຕາຍຂອງ ແມ່ຍິງ ແລະ ເດັກ ໃນເວລາເກີດລູກຕາມຕົວຊີ້ວັດ MDG 4 ແລະ 5 ນັ້ນ ຂ້າພະເຈົ້າເຫັນວ່າ ພວກເຮົາຕອ້ງໄດ້ເພີມທະວີ ສຸມກຳລັງເຫື່ອແຮງ ແລະ ທຶນຮອນ ເພື່ອຊຸກຍູ້ໃຫ້ ແມ່ຍິງ ແລະ ເດັກ ໄດ້ມີໂອກາດຮຽນໃຫ້ຫຼາຍ ທັງສາຍສາມັນ ແລະ ອາຊີວະສຶກສາ ແລະ ມີວຽກເຮັດງານທຳ ເມື່ອຄົບອາຍຸ 18 ປີ ຂຶ້ນໄປສາມາດແຕ່ງງານສ້າງຄອບຄົວໄດ້ ຕາມກົດໝາຍຄອບຄົວ ກໍຄື ກົດໝາຍວ່າດ້ວຍການພັດທະນາ ແລະ ປົກປ້ອງແມ່ຍິງ. ໜ່ວຍງານທີ່ຮັບຜິດຊອບກົດໝາຍດັ່ງກ່າວນີ້ ຄວນນຳໄປເຜີຍແຜ່ໃຫ້ຫຼາຍຢູ່ເຂດຊົນນະບົດຫ່າງໄກສອກຫຼີກ ແລະ ມີມາດຕະການຕໍ່ຜູ້ລະເມີດຢ່າງເໝາະສົມ ແລະ ເຊື່ອໝັ້ນວ່າບົດລາຍງານສະຖານະພາບປະຊາກອນໂລກປະຈຳປີ 2015 ແມ່ນເປັນປະໂຫຍດຫຼາຍສຳລັບ ສປປ ລາວ ທີ່ຈະໄດ້ຮຽນຮູ້ຈາກບັນດາປະເທດອື່ນໆ ແລະ ປະສົບການໃນທົ່ວໂລກ.
ແຫ່ລງຂ່າວ
