ຂປລ. ປັດຈຸບັນ, ບັນດາອອກຕົນຍາດໂຍມທົ່ວສາລະທິດ, ທັງແຂກພາຍໃນ ແລະ ຕ່າງປະເທດສືບຕໍ່ຫລັ່ງໄຫລເຂົ້າ ກາບສັກກາຣະ ສາຣິຣະສັງຂານ ພະອາຈານໃຫຍ່ ມະຫາຜ່ອງສະມາເລີກ, ອະດິດປະທານສູນກາງພະພຸດ ທະສາສະໜາສຳພັນລາວ ຢູ່ວັດອົງຕື້ ມະຫາວິຫານ ນະຄອນຫລວງວຽງຈັນ, ເພື່ອສະແດງຄວາມເຄົາລົບບູຊາ, ຄວາມກະຕັນຍູກະຕະເວທີ, ຮູ້ບຸນຄຸນ ແລະ ຄຸນງາມຄວາມດີຂອງພະອາຈານໃຫຍ່ ພາຍຫລັງ ດຣ. ມະຫາຜ່ອງ ສະມາເລີກ, ອະດິດປະທານສູນກາງພະພຸດທະສາສະໜາ ສຳພັນລາວ ທີ່ໄດ້ລະສັງຂານ ໃນວັນທີ 7 ຕຸລາ 2015.
ສຳລັບພິທີບຳເພັນກຸສົນ ພະອາຈານທ່ານໃຫຍ່ ດຣ. ມະຫາຜ່ອງ ສະມາເລີກກໍໄດ້ປະຕິບັດຢ່າງຕໍ່ເນື່ອງ ໂດຍມີການເຮັດບຸນປະຈຳວັນ ເປັນຕົ້ນແມ່ນ ໃສ່ບາດຖວາຍທານ, ພິທີສູດພຣະອະພິທັມ, ຖວາຍພັດຕາຫານເພນ ແລະ ຮັບຕ້ອນການເຂົ້າສັກ ກາຣະສາຣິຣະສັງຂານ ຈາກຄະນະພະສົງ ແລະ ອອກຕົນຍາດໂຍມ, ສູດພະອະພິທັມ, ຟັງເທສະໜາ, ຄາຣາວະ, ຮັບພອນ ແລະ ກິດຈະກຳ, ສົນທະນາທັມ ແລະ ອື່ນໆ.
ຄະນະຮັບຜິດຊອບຈັດພິທີ ໄດ້ໃຫ້ຮູ້ໃນວັນທີ 4 ທັນວາ 2015 ນີ້ວ່າ: ປັດຈຸບັັນນີ້ ຄະນະຮັບຜິດຊອບພິທີດັ່ງກ່າວ ໄດ້ສໍາເລັດໂດຍພື້ນຖານ ໃນການຫ້າງຫາກະກຽມງານຊາປະນາກິດສົບຂອງ ພະອາຈານໃຫຍ່ ມະຫາຜ່ອງ ສະມາເລີກ ແລະ ຄາດວ່າໃນວັນທີ 20 ທັນວາ 2015 ເວລາ 13:00 ໂມງຈະເຄື່ອນສົບຈາກວັດອົງຕື້ ຜ່ານເສັ້ນທາງປະຕູໄຊ, ເສັ້ນທາງໜອງບອນສູ່ເດີ່ນທາດຫລວງ ແລະ ປະມານ 20:00 ໂມງຈະໄດ້ມີພິທີວາງເພີງເຢັນ.
