ສຳນັກຂ່າວຕ່າງປະເທດ ລາຍງານໃນວັນທີ 6 ທັນວາຜ່ານມານີ້ວ່າ ເກີດເຫດຄົນຮ້າຍ ໃຊ້ອາວຸດມີດໄລ່ແທງປະຊາຊົນ ພາຍໃນສະຖານີລົດໄຟໃຕ້ດິນ ເລຕັນສະໂຕນ ນະຄອນຫລວງລອນດອນ ປະເທດອັງກິດ ໃນຕອນຫົວຄ່ຳຂອງວັນທີ 5 ທັນວາ 2015 ຕາມເວລາໃນທ້ອງຖິ່ນ ເຮັດໃຫ້ມີຜູ່ໄດ້ຮັບບາດເຈັບ 3 ຄົນ ໂດຍພາຍຫລັງທີ່ຄົນຮ້າຍ ໄດ້ເດີນທາງມາເຖິງ ບໍລິເວນບ່ອນຊື້ປີ້ໂດຍສານ ໄດ້ຮ້ອງຂຶ້ນວ່າ ” ນີ້ສຳລັບຊີຣີ! ” ແລ້ວກໍເອົາອາວຸດມີດ ອອກມາທຳຮ້າຍຮ່າງກາຍ ຜູ່ທີ່ຢູ່ບໍລິເວນນັ້ນທັນທີ.
ແນວໃດກໍຕາມ ພາຍຫລັງເກີດເຫດ ເຈົ້າໜ້າທີ່ຕຳຫລວດ ໄດ້ເຂົ້າລະງັບເຫດການໄວ້ທັນ ດ້ວຍການໃຊ້ປືນໄຟຟ້າ ຍິງໃສ່ຜູ່ກໍ່ເຫດ ແລະ ເຂົ້າຈັບກຸມໄດ້ ພ້ອມກັບຂອງກາງ ເພື່ອດຳເນີນຄະດີ.
