ສຳນັກຂ່າວຕ່າງປະເທດ ລາຍງານໃນວັນທີ 1 ທັນວານີ້ວ່າ ກອງທຶນການເງິນລະຫວ່າງປະເທດ ຫລື IMF ໄດ້ຮັບຮອງເອົາ ເງິນຢວນ ຂອງຈີນ ຂຶ້ນຊັ້ນທຽບເທົ່າ ກັບສະກຸນເງິນຕາຫລັກຂອງໂລກ ໃນກະຕ່າອັດຕາແລກປ່ຽນ ຂອງກອງທຶນດັ່ງກ່າວ ໃນມື້ວັນຈັນທີ 30 ພະຈິກຜ່ານມານີ້ ໂດຍການຕັດສິນໃຈດັ່ງກ່າວ ແມ່ນໄດ້ເຮັດໃຫ້ ເງິນຢວນ ເຂົ້າສູ່ກະຕ່າສະກຸນເງິນກາງ ຂອງກອງທຶນການເງິນລະຫວ່າງປະເທດ (SDR) ຄຽງຂ້າງກັບສະກຸນເງິນໂດຣາ, ເອີໂຣ, ປອນສະເຕີລິງ ແລະ ເງິນເຢນ ຊຶ່ງຖືເປັນໄຊຊະນະອັນສຳຄັນ ໃນການດຳເນີນນະໂຍບາຍຂອງຈີນ ແລະ ເປັນຂີດໝາຍ ຂອງການຍອມຮັບ ໃນຖານະມະຫາອຳນາດເສດຖະກິດໂລກ ຢ່າງເປັນທາງການ.

ທັງນີ້ ນັກວິເຄາະໄດ້ຄາດການວ່າ ການຍອມຮັບຂອງ IMF ດັ່ງກ່າວ ຈະເພີ່ມຄວາມຕ້ອງການ ໃນການຖືຄອງເງິນຢວນ ຫລາຍກ່ວາ 500 ຕື້ໂດລາ ໃນອີກບໍ່ເທົ່າໃດປີຂ້າງໜ້າ ແລະ ເຮັດໃຫ້ອັດຕາສ່ວນ ການຖືຄອງເງິນຢວນ ໃນຖານະເງິນສຳຮອງລະຫວ່າງປະເທດ ເພີ່ມຂຶ້ນປະມານ 5% ແຊງສະກຸນເງິນແຄນາດຽນ ແລະ ໂດລາອົດສະຕາລີ.