ໂດຍ​ຕອບ​ສະໜອງ​ຄຳ​ເຊີນຂອງ​ທ່ານ ບຸນ​ຍັງ ວໍລະ​ຈິດ ຮອງປະທານ​ປະເທດ ທ່ານ​ນາງ ມາກາ​ຣີ​ຕາ ໂປ​ໂປ​ວາ (Magarita POPOVA) ຮອງ​ປະ​ທາ​ນາ​ທິ​ບໍດີ​ແຫ່ງ​ສາທາລະນະ​ລັດ​ບຸນ​ກາລີ ພ້ອມ​ດ້ວຍ​ຄະນະ ໄດ້​ເດີນທາງ​ມາຢ້ຽມຢາມ ແລະ ເຮັດ​ວຽກ​ຢູ່ ​ສປປ ລາວ ໃນ​ລະຫວ່າງ​ວັນ​ທີ 29-30 ພະຈິກ 2015.

ຕອນ​ເຊົ້າ​ວັນ​ທີ 30 ພະຈິກ 2015 ຢູ່​ທຳ​ນຽບ​ປະທານ​ປະເທດ ໄດ້​ມີ​ການ​ພົບ​ປະ​ສອງ​ຝ່າຍ ເຊິ່ງຝ່າຍ​ລາວ​ນຳ​ໂດຍ​ທ່ານ ບຸນ​ຍັງ ວໍລະ​ຈິດ ແລະ ຝ່າຍ​ບຸນ​ກາລີ ນຳໂດຍ​ທ່ານ​ນາງ Magarita POPOVA ການ​ພົບ​ປະ​ຄັ້ງ​ນີ້ ​ທັງສອງ​ຝ່າຍ​ໄດ້​ແຈ້ງ​ສະພາບ​ການພັດທະນາ​ເສດຖະກິດ-ສັງຄົມຂອງ​ຕົນ​ໃຫ້​ກັນ​ຮັບ​ຊາບ ພ້ອມທັງ​ໄດ້​ຕີ​ລາຄາ​ສູງ​ຕໍ່​ການ​ພົວພັນຮ່ວມ​ມື​ຂອບ​ສອງ​ຝ່າຍ ແລະ ຂອບ​ຫຼາຍ​ຝ່າຍ ທິດ​ທາງ​ການຮ່ວມ​ມື​ໃນຕໍ່ໜ້າ ໂດຍ​ສະເພາະ ດ້ານ​ເສດຖະກິດ ການ​ຄ້າ ການສຶກ​ສາ ການ​ລົງທຶນ ການ​ທ່ອງທ່ຽວ ແລະ ວຽກ​ງານ​ສຳຄັນອື່ນໆ​ທີ່​ສອງ​ຝ່າຍໃຫ້​ຄວາມ​ສົນໃຈ ເພື່ອ​ແນໃສ່​ເຮັດ​ໃຫ້ການຮ່ວມ​ມື​ລະຫວ່າງ​ສອງ​ປະເທດ ລາວ-ບຸນ​ກາລີ ເຕີບ​ໃຫຍ່​ຂະຫຍາຍ​ຕົວ ແລະ ນັບ​ມື້​ແໜ້ນແຟ້ນ​ຍິ່ງ​ຂຶ້ນ.

ໃນ​ໂອກາດ​ການ​ມາ​ຢ້ຽມຢາມ ແລະ ເຮັດ​ວຽກ​ຢູ່​ລາວ​ຄັ້ງ​ນີ້​ຂອງທ່ານ​ນາງ Magarita POPOVA ຍັງ​ໄດ້​ເຂົ້າ​ຢ້ຽມ​ຄຳນັບ​ບັນດາການ​ນຳ​ຂັ້ນ​ສູງ​ຂອງ​ລາວ ພ້ອມທັງ​ໄດ້​ໄປ​ຢ້ຽມ​ຊົມ​ແຫຼ່ງ​ທ່ອງ​ທ່ຽວທາງ​ດ້ານ​ປະຫວັດສາດ ແລະ ວັດທະນະ​ທຳ​ຈຳນວນ​ໜຶ່ງ ​ຢູ່​ນະຄອນຫຼວງ​ວຽງ​ຈັນ​ອີກ​ດ້ວຍ.

ແຫ່ລງຂ່າວ