ພິທີເປີດການນຳໃຊ້ໂຄງການກໍ່ສ້າງເຂື່ອນໄຟຟ້ານ້ຳຄານ 2 ເມືອງຊຽງເງິນ ແຂວງຫຼວງພະບາງ ໄດ້ຈັດຂຶ້ນຢ່າງເປັນທາງການ ໃນອາທິດຜ່ານມາ ມີທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ຜູ້ຊີ້ນຳວຽກງານເສດຖະກິດການຜະລິດ ແລະ ຈໍລະຈອນ ທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ ທ່ານປະທານບໍລິສັດ ຊິໂນໄຣໂດຼ ລັດຖະມົນຕີວ່າການ ຊ່ວຍວ່າການ ແລະ ອຳນາດການປົກຄອງທ້ອງຖິ່ນ ພ້ອມດ້ວຍພໍ່ແມ່ປະຊາຊົນເຂົ້າຮ່ວມ.
ໂຄງການກໍ່ສ້າງເຂື່ອນໄຟຟ້ານ້ຳຄານ 2 ແມ່ນໂຄງການໜຶ່ງທີ່ນອນຢູ່ໃນແຜນແມ່ບົດພັດທະນາລະບົບໄຟຟ້າ ເຊິ່ງມີກຳລັງຕິດຕັ້ງໄຟຟ້າທັງໝົດ 130 ເມກາວັດ (MW) ສາມາດຜະລິດພະລັງງານໄດ້ 558 ຈີກາວັດໂມງ (GWH) ຕໍ່ປີ ມູນຄ່າການລົງທຶນທັງໝົດ 308.500.870 ໂດລາສະຫະລັດ ເຊິ່ງລັດວິສາຫະກິດໄຟຟ້າລາວເປັນເຈົ້າຂອງໂຄງການ ແລະ ບໍລິສັດ ຊິໂນໄຣໂດຼ ສປ ຈີນ ເປັນຜູ້ຮັບເໝົາກໍ່ສ້າງໃນຮູບແບບມອບເໝົາ ມີລະບົບສາຍສົ່ງ 115 ກິໂລໂວນ (KV) ມີລວງຍາວ 23,79 ກິໂລແມັດ ວົງຈອນຄູ່ເສື່ອມເຂົ້າສະຖານີ (230 KV) ຫຼວງພະບາງ 2 ທີ່ເມືອງຊຽງເງິນ.
ໂຄງການດັ່ງກ່າວແມ່ນປະກອບສ່ວນສຳຄັນ ໃນການປັບປຸງຍົກສູງຄຸນະພາບຊີວິດການເປັນຢູ່ຂອງປະຊາຊົນບັນດາເຜົ່າ ການຫັນປ່ຽນໂສມໜ້າໃໝ່ຢູ່ຊົນນະບົດ ປະກອບສ່ວນເຂົ້າໃນການປະຕິບັດແຜນພັດທະນາເສດຖະກິດ-ສັງຄົມທ້ອງຖິ່ນ ປະກອບສ່ວນສຳຄັນເຂົ້າໃນຂະບວນການຈັດຕັ້ງປະຕິບັດແນວທາງ ແຜນຍຸດທະສາດພັດທະນາຊົນນະບົດ ການສ້າງກຸ່ມບ້ານພັດທະນາ ການແກ້ໄຂຄວາມທຸກຍາກຂອງປະຊາຊົນ ບໍລິເວນດັ່ງກ່າວ.
ແຫ່ລງຂ່າວ
