ໃນໂອກາດທີ່ທົ່ວພັກ–ລັດ, ທົ່ວກຳລັງປະກອບອາວຸດ ແລະ ທົ່ວປວງຊົນລາວທັງຊາດ ພວມເບີກບານມ່ວນຊື່ນຕ້ອນຮັບວັນຊາດທີ 2 ທັນວາ ຄົບຮອບ 40 ປີນັ້ນ, ສູນກາງແນວລາວສ້າງ ຊາດກໍໄດ້ຈັດກອງປະຊຸມພົບປະຜູ້ຊົງຄຸນວຸດທິທົ່ວປະເທດຂຶ້ນໃນວັນທີ 28 ເດືອນພະຈິກ 2015 ຜ່ານ ມາ ຢູ່ສູນການຄ້າລາວ-ໄອເຕັກ, ທັງເປັນການຖືໂອກາດດັ່ງກ່າວໃຫ້ຄະນະຜູ້ແທນຜູ້ຊົງຄຸນວຸດທິບັນດາ ເຜົ່າ, ຊັ້ນຄົນຕ່າງໆທົ່ວປະເທດ ໄດ້ມີໂອກາດມາເຄື່ອນໄຫວຢ້ຽມຢາມນະຄອນຫລວງວຽງຈັນ ແລະ ເຂົ້າ ຮ່ວມສະເຫລີມສະຫລອງວັນສຳຄັນຄັ້ງຍິ່ງໃຫຍ່ຄັ້ງນີ້, ເຊິ່ງບັນດາຜູ້ແທນບັນດາເຜົ່າກໍໄດ້ສະແດງທັດ ສະນະຂອງຕົນຕໍ່ການສ້າງສາພັດທະນາປະເທດຊາດຕະຫລອດໄລຍະ 40 ປີ ແລະ ຄວາມສາມັກຄີຂອງປະຊາຊົນບັດດາເຜົ່າໃນການຕໍ່ສູ້ຊາດຈົນໄດ້ຮັບການປົດປ່ອຍຢ່າງເປັນທາງການໃນປີ 1975.
ທ່ານ ນາງ ເຢັ້ງຊົ່ງ ຈື່ດາໄມ ປະທານສະຫະພັນແມ່ຍິງເມືອງຊຽງເງິນ ແຂວງຫລວງພະບາງ ໄດ້ໃຫ້ທັດສະນະວ່າ: ກ່ອນປີ 1975 ຊີວິດການເປັນຢູ່ຂອງປະຊາຊົນບັນດາເຜົ່າ ໂດຍສະ ເພາະແມ່ນເຜົ່າລາວມົ້ງຂອງຕົນແມ່ນດຳລົງຊີວິດຕາມພູຜາ, ຮ່ອມຫ້ວຍ, ຊີວິດການເປັນຢູ່ທາງດ້ານການເມືອງສູງສຸດໄດ້ພຽງແຕ່ເປັນນາຍບ້ານ. ສ່ວນດ້ານເສດຖະກິດມີຄວາມຝຶດເຄືອງ, ອາຊີບຕົ້ນຕໍແມ່ນຖາງປ່າເຮັດໄຮ່ປູກເຂົ້າ ແລະ ປູກຢາຝິ່ນ, ການສຶກສາບໍ່ຂະຫຍາຍຕົວ ໂດຍສະເພາະເດັກຍິງ ໄດ້ຮັບການສຶກສາໜ້ອຍກວ່າເດັກຊາຍ. ແນວໃດກໍດີພາຍຫລັງທີ່ປະເທດຊາດໄດ້ຮັບການປົດປ່ອຍແຕ່ປີ 1975 ເປັນຕົ້ນມາ ເຜົ່າລາວມົ້ງຕົນກໍໄດ້ຮັບການພັດທະນາຂຶ້ນຕາມລຳດັບ. ຈາກການດຳລົງຊີວິດຢູ່ຕາມພູຜາກໍໄດ້ຫັນມາຢູ່ທົ່ງພຽງ, ຢູ່ຕາມໂຕເມືອງຫລວງຫລາຍຂຶ້ນ,ຈາກອາຊີບເຮັດໄຮ່, ປູກຝິ່ນ ກໍໄດ້ຫັນປ່ຽນມາເຮັດນາ, ຄ້າຂາຍ ແລະ ບໍລິການອື່ນໆ, ເດັກຍິງກໍໄດ້ຮັບການສຶກສາຢ່າງທົ່ວເຖິງ, ມີສິດເທົ່າທຽມກັບຜູ້ຊາຍໃນທຸກດ້ານ, ພໍ່ແມ່ໃຫ້ໂອກາດເທົ່າກັບຜູ້ຊາຍ, ເວົ້າລວມແລ້ວມາເຖິງປັດຈຸບັນພວກເຮົາໄດ້ຮັບການພັດທະນາ, ຊີວິດການເປັນຢູ່ດີຂຶ້ນ ເຊິ່ງແຕກຕ່າງຈາກເມື່ອກ່ອນ. ຂະນະດຽວກັນກໍບໍ່ມີການຈຳແນກວ່າເຜົ່ານີ້ ເຜົ່ານັ້ນ ທຸກໆຄົນລ້ວນແຕ່ເປັນຄົນລາວ ດຳລົງຊີວິດຢູ່ຮ່ວມກັນດ້ວຍຄວາມສາມັກຄີຊ່ວຍເຫລືອເຊິ່ງກັນ ແລະ ກັນ, ເຊິ່ງທັງໝົດນີ້ ຍ້ອນມີພັກນຳພາຈຶ່ງເຮັດໃຫ້ປະເທດຊາດໄດ້ຮັບການພັດທະນາ, ປະຊາຊົນມີຊີວິດການເປັນຢູ່ດີຂຶ້ນເທື່ອລະກ້າວ.
ທ່ານ ບຸນດາວ ພົມມະຈັນ ຊົນເຜົ່າອາຣັກ ຢູ່ບ້ານຕ໊ອກອົງແກ້ວ ເມືອງລະມາມ ແຂວງເຊກອງໄດ້ໃຫ້ທັດສະນະຕໍ່ຄວາມສາມັກຄີຂອງປະຊາຊົນບັນດາເຜົ່າວ່າ: ໃນສະໄໝກ່ອນປະເທດລາວເຮົາຖືກ ຕ່າງຊາດເຂົ້າມາປົກຄອງ, ປະຊາຊົນບັນດາເຜົ່າມີການຈຳແນກຊົນຊາດຊົນເຜົ່າ ແລະ ບໍ່ມີຄວາມເຂົ້າໃຈກັນ, ການເວົ້າ ການວ່າ ມີລັກສະນະທ້າທາຍ, ສຽດສີກັນໃນສັງຄົມ ຈຶ່ງເປັນຊ່ອງຫວ່າງເຮັດໃຫ້ສັດຕູສວຍໂອກາດທຳລາຍແນວທາງ, ເຮັດໃຫ້ປະຊາຊົນບໍ່ມີຄວາມສາມັກຄີ, ແຕ່ຍ້ອນມີການຊີ້ນຳ–ນຳພາຂອງທ່ານຜູ້ນຳຮຸ່ນສູ່ຮຸ່ນໃນການເຕົ້າໂຮມຄວາມສາມັກຄີຂອງປະຊາຊົນຕໍ່ສູ້ຕ້ານພວກຈັກກະພັດຮຸກຮານປະເທດລາວ ອັນເຮັດໃຫ້ປະຊາຊົນມີຄວາມເຂົ້າໃຈ ຮູ້ຮັກປະເທດຊາດ, ຮັກບ້ານເກີດເມືອງນອນ ຈຶ່ງໄດ້ຮ່ວມໄມ້ຮ່ວມມືເປັນຈິດໜຶ່ງໃຈດຽວເສຍສະລະເລືອດເນື້ອເພື່ອຕໍ່ສູ້ກູ້ຊາດຫລາຍຫລົບຫລາຍຕ່າວ ຈົນໄດ້ຮັບການປົດປ່ອຍໃນປີ 1975 ເປັນຕົ້ນມາ ແລະ ມາຮອດປັດຈຸບັນຄວາມສາມັກຄີລະຫວ່າງເຜົ່າກໍຍິ່ງແໜ້ນແຟ້ນຍິ່ງຂຶ້ນ ໂດຍບໍ່ມີການຈຳແນກແຕກແຍກກັນ ຖືເປັນພີ່ນ້ອງກັນ, ການໄປມາຫາສູ່ກັນກໍສະດວກສະບາຍ ມີພາເຂົ້າຮັບຕ້ອນ, ບາງບ້ານຢູ່ໃກ້ຄຽງກັນລະຫວ່າງເຜົ່າມີບຸນສິນກິນທານກໍໄດ້ເອີ້ນກັນໄປຮ່ວມເບີກບານມ່ວນຊື່ນ ສ້າງຄວາມສາມັກຄີຮັກແພງເຊິ່ງກັນ ແລະ ກັນ.
ທ່ານ ຄຳຫລ້າ ຄອນສະຫວັນທອງ ຊົນເຜົ່າກຶມມຸ ຢູ່ບ້ານຫີນເຫີບໃຕ້ ເມືອງຫີນເຫີບ ແຂວງວຽງຈັນກໍໄດ້ສະແດງຄວາມພາກພູມໃຈຕໍ່ແນວທາງນະໂຍບາຍຂອງພັກ–ລັດເຮົາ ທີ່ຍາມໃດກໍມີຄວາມເປັນຫ່ວງເປັນໃຍຕໍ່ຊີວິດການເປັນຢູ່ຂອງ ປະຊາຊົນລາວບັນດາເຜົ່າ ແລະ ໄດ້ສຸມທຶນຮອນຢ່າງມະຫາສານເຂົ້າໃນການສ້າງສາພັດທະນາດ້ານພື້ນຖານ ໂຄງລ່າງເປັນຕົ້ນຖະໜົນຫົນທາງ, ໂຮງຮຽນ, ໂຮງໝໍ ອັນໄດ້ ສ້າງຄວາມສະດວກສະບາຍໃຫ້ແກ່ປະຊາຊົນຢ່າງຫລວງຫລາຍ, ພ້ອມນີ້ ກໍເຮັດໃຫ້ດ້ານເສດຖະກິດມີການຂະຫຍາຍໂຕໄປພ້ອມໆກັນ, ຄວາມທຸກຍາກຂອງປະຊາຊົນໄດ້ຮັບການແກ້ໄຂຫລຸດໜ້ອຍຖອຍລົງ ເທື່ອລະກ້າວ.
ແຫລ່ງຂ່າວ:
