ກອງປະຊຸມ “ພົບປະຜູ້ຊົງຄຸນວຸດທິທົ່ວປະເທດ 2015” ສູນກາງແນວລາວສ້າງຊາດ ໄດ້ຈັດຂຶ້ນຢ່າງເປັນທາງການ ໃນວັນທີ 28 ພະຈິກ 2015 ທີ່ຜ່ານມາ ຢູ່ທີ່ສູນການຄ້າລາວ-ໄອເຕັກ ພາຍໃຕ້ການເປັນປະທານຂອງທ່ານ ສຈ.ດຣ. ພັນດວງຈິດ ວົງສາ ກຳມະການສູນກາງພັກ ປະທານສູນກາງແນວລາວສ້າງຊາດ ໂດຍມີການນຳພັກ-ລັດ ພະນັກງານບຳນານ ອາວຸໂສ ນັກຮົບວິລະຊົນແຫ່ງຊາດ ຜູ້ຊົງຄຸນວຸດທິສູນກາງ ແລະ ທ້ອງຖິ່ນ ເຂົ້າຮ່ວມຈຳນວນ 504 ທ່ານ.
ທ່ານປະທານສູນກາງແນວລາວສ້າງຊາດ ໄດ້ກ່າວບາງຕອນວ່າ: ບັນດາເຜົ່າລາວມີຄວາມສາມັກຄີເປັນປຶກແຜ່ນ ເປັນຕົ້ນ ພາຍຫຼັງທີ່ມີການນຳພາຂອງພັກ ມີການປະຕິວັດຊົນເຜົ່າຂອງລາວ ໄດ້ຮັບການສຶກສາອົບຮົມຄວາມສາມັກຄີຊ່ວຍເຫຼືອເພື່ອແຜ່ຕໍ່ກັນ ໃນການທຳມາຫາກິນ ຜ່ານຜ່າໄພທຳມະຊາດ ສາມັກຄີ ຕໍ່ສູ້ຕ້ານສັດຕູຜູ້ຮຸກຮານ ເພື່ອເອກະລາດລວມຂອງຊາດ ບາງໄລຍະສັດຕູອອກແຮງແບ່ງແຍກຄວາມສາມັກຄີເຜົ່ານີ້ກັບເຜົ່າອື່ນ ແຕ່ເວົ້າລວມ ຕະຫຼອດໄລຍະປະຫວັດສາດຜ່ານມາ ບໍ່ມີການແຕກແຍກຄວາມສາມັກຄີເຜົ່າ ແຕ່ລະຊົນເຜົ່າເພິ່ງພາອາໄສກັນ ຂອດສ່ຽວຮັກສ່ຽວແພງກັນໃນແຕ່ລະບຸກຄົນ ແລະ ຄອບຄົວຊົນເຜົ່າ.
ຊົນເຜົ່າລາວໄດ້ມີຄວາມເຈືອຈານກັນທາງດ້ານເສດຖະກິດ ວັດທະນະທຳ-ສັງຄົມ ທາງດ້ານການເມືອງບໍ່ໄດ້ຈຳແນກຊົນເຜົ່າໃດ ຢູ່ຖານະການເມືອງອັນໃດ ແຕ່ມີມາດຖານເງື່ອນໄຂຄົບຖ້ວນ ຊົນເຜົ່າໃດກໍ່ສາມາດຢືນຢູ່ທີ່ຕັ້ງຕຳແໜ່ງຂອງພັກ ສະພາແຫ່ງຊາດ ລັດຖະບານ ອຳນາດການປົກຄອງທ້ອງຖິ່ນ ອົງການອື່ນໆຂອງພັກ-ລັດ ແລະ ມະຫາຊົນ.
ພາຍຫຼັງທີ່ປະເທດຊາດໄດ້ຮັບການປົດປ່ອຍ ໂດຍສະເພາະຕັ້ງແຕ່ແນວທາງປ່ຽນແປງໃໝ່ປີ 1986 ເປັນຕົ້ນມາ ພື້ນຖານເສດຖະກິດຂອງປະຊາຊົນບັນດາເຜົ່າ ແມ່ນການຫັນເສດຖະກິດທຳມະຊາດມາເປັນເສດຖະກິດສິນຄ້າ ເຄື່ອນໄຫວຕາມກົນໄກຂອງຕະຫຼາດ ໃນປັດຈຸບັນ ບັນດາຊົນເຜົ່າໄດ້ມີການຫັນປ່ຽນໂຄງການປະກອບເສດຖະກິດ ເປັນຕົ້ນ ຫຼາຍຊົນເຜົ່າໄດ້ຫັນປ່ຽນການຜະລິດພືດທີ່ເປັນສິນຄ້າເຊັ່ນ: ການປູກກາແຟ ໝາກແໜ່ງ ຊາ ໝາກອຶ ໝາກຖົ່ວ ໝາກຂາມ ຢາງພາລາ ແລະ ອື່ນໆ ຫຼາຍຊົນເຜົ່າຮູ້ຈັກຜະລິດຫັດຖະກຳຈັກສານ ຫຼາຍຊົນເຜົ່າພູດອຍແຕ່ກ່ອນມີການເຮັດໄຮ່ປູກເຂົ້າ ປັດຈຸບັນ ຮູ້ເຮັດຄ້າຂາຍຕາມຕະຫຼາດຕ່າງໆ.
ພັກ ແລະ ລັດເຮົາໄດ້ພະຍາຍາມຂົນຂວາຍພີ່ນ້ອງຊົນເຜົ່າ ທີ່ຮູ້ເທົ່າບໍ່ເຖິງການ ລີ້ຊ່ອນຕາມພູຕາມປ່າໃຫ້ກັບມາທຳມາຫາກິນ ຈັດສັນທີ່ຢູ່ ແລະ ບ່ອນທຳມາຫາກິນໄດ້ຮັບການສະໜອງຈາກປະຊາຊົນເຜົ່າຕ່າງໆ ເຂົາເຈົ້າ ກັບມາທຳມາຫາກິນເຈືອຈານກັບຊຸມຊົນອື່ນໆ ພ້ອມກັນນັ້ນ ພັກ ແລະ ລັດ ໄດ້ມີຄວາມຕັດສິນໃຈສູງ ຕ້ອນຮັບພີ່ນ້ອງຊົນເຜົ່າທີ່ໄປຕົກຄ້າງຢູ່ປະເທດໄທ ໄດ້ຈັດສັນເຮືອນຊານບ້ານຊ່ອງທີ່ຢູ່ໝັ້ນຄົງ ສະຖານທີ່ທຳການຜະລິດ ຈັດສັນພາຫະນະແນວພັນ ວັດສະດຸການຜະລິດໃຫ້ປະຊາຊົນ ພີ່ນ້ອງຊົນເຜົ່າຂອງລາວໄດ້ມີຄວາມພໍໃຈ ແລະ ກັບຄືນດ້ວຍຄວາມໄມຕີຈິດສູ່ພໍ່ແມ່ພີ່ນ້ອງລາວຢູ່ທ້ອງຖິ່ນຕ່າງໆ ທີ່ເປັນເຈົ້າພາບຮັບເອົາ ອັນນີ້ທັງແມ່ນບຸນຄຸນຂອງພັກ-ລັດ ແມ່ນຄວາມສາມັກຄີ ເອື້ອເຟື້ອເພື່ອແຜ່ເພື່ອພີ່ນ້ອງທັງໝົດ.
ໃນຊຸມປີຕໍ່ໜ້າ ພວກເຮົາແມ່ນຈະສຶບຕໍ່ການປະຕິບັດໜ້າທີ່ຜັນຂະຫຍາຍມະຕິຂອງພັກ ແລະ ແຜນພັດທະນາຂອງລັດ ໂດຍສະເພາະ ຕັ້ງໜ້າສຶກສາອົບຮົມການເມືອງແນວຄິດ ສຶກສາອົບຮົມມູນເຊື້ອຮັກຊາດ ຮັກສາໝາກຜົນການປະຕິວັດ ຮັກມູນເຊື້ອຄຸນສົມບັດຂອງຜູ້ນຳ ເສີມຂະຫຍາຍຈິດໃຈຮັກຊາດຮັກລະບອບໃໝ່ ເສີມຂະຫຍາຍຄວາມບຸກບືນສ້າງຄວາມເຂັ້ມແຂງດ້ວຍຕົນເອງ ຍົກສູງຄວາມສາມັກຄີປອງດອງເປັນປຶກແຜ່ນ ບັນດາຊົນເຜົ່າ ຊັ້ນຄົນ ສາສະໜາ ເພດ ແລະ ໄວ ໄປຕາມແນວທາງນະໂຍບາຍຂອງພັກ ສ້າງຄວາມປອງດອງກົມກຽວກັນຢ່າງສະຫຼັບສັບຫວ່າງ ຂະແໜງການເສດຖະກິດ ປ້ອງກັນຊາດ-ປ້ອງກັນຄວາມສະຫງົບ ວັດທະນະທຳ-ສັງຄົມ ຫຼຸດຜ່ອນການແຕກໂຕນ.
ເສີມຂະຫຍາຍທັດສະນະມະຫາຊົນ ໃກ້ຊິດຕິດແທດມະຫາຊົນທຸກຊົນເຜົ່າ ທຸກຊັ້ນຄົນ ທຸກສາສະໜາ ກຳແໜ້ນເຈົ້າກົກເຈົ້າເຫຼົ່າ ຜູ້ຊົງຄຸນວຸດທິທີ່ມີບົດບາດອິດທິພົນ ບໍ່ໃຫ້ມີອິດທິກຳລັງປໍລະປັກມາກຳເອົາປະຊາຊົນເຮົາ ລົງຫາປະຊາຊົນເພື່ອດ້ານໜຶ່ງ ຮູ້ໄດ້ສະພາບແນວຄິດຈິດໃຈຄວາມມຸ້ງມາດປາຖະໜາຂອງປະຊາຊົນ ດ້ານສອງ ເພື່ອອະທິບາຍຊີ້ແຈງສຶກສາອົບຮົມປະຊາຊົນ ດ້ານສາມ ບາງກໍລະນີອະທິບາຍໄກ່ເກ່ຍຄວາມຂັດແຍ່ງບາງເລັກນ້ອຍ ບໍ່ໃຫ້ກາຍເປັນເລື່ອງໃຫຍ່ ແລະ ດ້ານສີ່ ເພື່ອນຳເອົາຂໍ້ມູນຮີບດ່ວນສ່ອງແສງໃຫ້ຂັ້ນເທິງ ແລະ ອົງການກ່ຽວຂ້ອງພິຈາລະນາແກ້ໄຂຕາມຄວາມເໝາະສົມ ແລະ ຈະສືບຕໍ່ອອກແຮງຊຸກຍູ້ການຈັດຕັ້ງປະຕິບັດນະໂຍບາຍຕ່າງໆ.
ແຫ່ລງຂ່າວ
