ພິທີຖະແຫຼງຂ່າວເປີດປີທ່ອງທ່ຽວມາເລເຊຍ 2014 ຈັດຂຶ້ນວັນທີ 20 ທັນວາ 2013 ທີ່ໂຮງແຮມດອນຈັນພາເລດ ນະຄອນຫຼວງວຽງຈັນ ໂດຍມີທ່ານ ຈະເລີນ ວາລິນທະລາສັກ ລັດຖະມົນຕີຊ່ວຍວ່າການ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ທ່ານ ດາໂຕະ ທົບໄຕຮິງ ເອກອັກຄະລັດຖະທູດມາເລເຊຍ ປະຈຳ ສປປ ລາວ ແລະ ແຂກທີ່ຖືກເຊີນ ເຂົ້າຮ່ວມ.
ທ່ານເອກອັກຄະລັດຖະທູດມາເລເຊຍ ກ່າວວ່າ: ສຳລັບປີທ່ອງທ່ຽວມາເລເຊຍ 2014 ປີນີ້ ຈະເປັນປີທີ່ມີກິດຈະກຳຫຼາຍກວ່າປີຜ່ານໆມາ ເປັນຕົ້ນແມ່ນ ງານເທດສະການຕ່າງໆທີ່ໄດ້ສ້າງສີສັນອັນໂດດເດັ່ນ ເພື່ອເຊີນຊວນນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ຽວຊົມ ທັງນີ້ກໍເພື່ອໃຫ້ບັນລຸເປົ້າໝາຍຕາມແຜນການທີ່ວາງເອົາໄວ້ ຄືໃນປີ 2014 ຄາດວ່າຈະມີນັກທ່ອງທ່ຽວເຂົ້າມາທ່ຽວຊົມໃຫ້ໄດ້ 28 ລ້ານຄົນ ແລະ ໃນປີ 2020 ຈະສູ້ຊົນໃຫ້ນັກທ່ອງທ່ຽວເຂົ້າໄປທ່ຽວມາເລເຊຍບັນລຸ 36 ລ້ານຄົນ ສະນັ້ນ ພວກເຮົາຈຶ່ງສ້າງກິດຈະກຳການທ່ອງທ່ຽວນີ້ຂຶ້ນມາ ໂດຍທົ່ວປະເທດ ກໍຄືທັງ 13 ລັດ ແມ່ນເປັນເຈົ້າພາບຮ່ວມກັນ.
ສຳລັບປະເທດມາເລເຊຍ ເປັນໜຶ່ງໃນປະເທດສະມາຊິກອາຊຽນ ໂດຍຖືເອົາວຽກງານການທ່ອງທ່ຽວເປັນທ່າແຮງ ໃນການພັດທະນາເສດຖະກິດ-ສັງຄົມ ຊຶ່ງປັດຈຸບັນມີສະຖານທີ່ແຫຼ່ງທ່ອງທ່ຽວທີ່ໜ້າສົນໃຈຫຼາຍແຫ່ງ ເປັນຕົ້ນແມ່ນຕຶກແຝດທີ່ຕັ້ງຢູ່ນະຄອນຫຼວງກົວລາລຳເປີ ເກາະນາງຖືພາ ບໍ່ນ້ຳຈືດກາງທະເລ ເກາະຫາດຊາຍຂາວ ເກາະນົກອິນຊີ ຫໍພິພິທະພັນຂຸມຝັງສົບຂອງນາງ ມັດຊູລີ ຫໍພິພິທະພັນຂີ້ເຜິ້ງທີ່ເກັບໄວ້ຮູບປັ້ນດາລາຊື່ດັງຕ່າງໆ ເກາະລັງກາວີ ເມືອງມໍລະດົກໂລກມາລາກາ ເລໂກແລນ ແລະ ອື່ນໆ.
ທີ່ມາhttp://www.vientianemai.net/teen/khao/1/10857