ກອງປະຊຸມວິທະຍາສາດເສດຖະກິດ ແລະ ການຄ້າ ພາຍໃຕ້ຫົວຂໍ້: “ກຽມຄວາມພ້ອມທຸກດ້ານ ບົນເສັ້ນທາງການເຊື່ອມໂຍງເສດຖະກິດກັບສາກົນ” ໃນງານວາງສະແດງສິນຄ້າ ວຽງຈັນ ເອັກສໂປ 2015 ເພື່ອສະເຫຼີມສະຫຼອງວັນສະຖາປະນາ ສປປ ລາວ ຄົບຮອບ 40 ປີ ໄດ້ຈັດຂຶ້ນວັນທີ 28 ພະຈິກ 2015 ທີ່ສູນການຄ້າໄອເຕັກມໍ ນະຄອນຫຼວງວຽງຈັນ ໃຫ້ກຽດກ່າວເປີດໂດຍທ່ານ ທອງລຸນ ສີສຸລິດ ຮອງນາຍົກລັດຖະມົນຕີ ລັດຖະມົນຕີວ່າການກະຊວງການຕ່າງປະເທດ ເຊິ່ງມີບັນດາຜູ້ຕາງໜ້າບັນດາປະເທດອາຊຽນ ລັດຖະມົນຕີວ່າການ ຊ່ວຍວ່າການ ຮອງເຈົ້າຄອງ ຮອງເຈົ້າແຂວງ ທູຕານຸທູດ ຫົວໜ້າກົມ ແລະ ນັກທຸລະກິດເຂົ້າຮ່ວມ.
ທ່ານຮອງນາຍົກລັດຖະມົນຕີ ໄດ້ກ່າວວ່າ: ເສັ້ນທາງກ້າວເດີນຂອງອາຊຽນ ແມ່ນຕ້ອງໄດ້ກ້າວໄປໜ້າຕາມວິໄສທັດ ແລະ ເປົ້າໝາຍຂອງອາຊຽນຄື: ອາຊຽນ ຈະກ້າວໄປສູ່ການເປັນຖານຜະລິດ ການລົງທຶນ ແລະ ການເປີດຕະຫຼາດໜຶ່ງດຽວ ຄວາມພ້ອມທີ່ແຕກຕ່າງຂອງສິບປະເທດອາຊຽນນັ້ນ ຈະເຮັດແນວໃດຈຶ່ງສາມາດໃຫ້ຊ່ອງວ່າງຂອງຄວາມແຕກໂຕນດ້ານການພັດທະນາໃນອາຊຽນ ຫຍັບເຂົ້າຫາກັນໃຫ້ໄວເທົ່າທີ່ຈະໄວໄດ້ ແລະ ການສຳມະນາຄັ້ງນີ້ ຈະເປັນໂອກາດອັນໜຶ່ງເພື່ອແລກປ່ຽນປະສົບການເຊິ່ງກັນ ແລະ ກັນຢ່າງກົງໄປກົງມາ ໃນບັນດາຫົວຂໍ້ຕ່າງໆທີ່ນຳມາສະເໜີຢູ່ໃນກອງປະຊຸມ.
ລັດຖະບານລາວເຂົ້າໃຈຢ່າງເລິກເຊິ່ງວ່າ ການເຊື່ອມໂຍງກັບສາກົນເທົ່ານັ້ນ ຈຶ່ງຈະເຮັດໃຫ້ປະເທດຊາດໄດ້ຮັບການພັດທະນາ ຈຶ່ງສາມາດລົບລ້າງຄວາມທຸກຍາກຂອງປະຊາຊົນໄດ້ ສາມາດສ້າງຄວາມເຂັ້ມແຂງໃຫ້ປະເທດຊາດໄດ້ ຈຶ່ງສາມາດພັດທະນາການເຊື່ອມຈອດ ພັດທະນາຊັບພະຍາກອນມະນຸດໄດ້ ແລະ ປະເທດນີ້ ຈຶ່ງສາມາດເຂົ້າເຖິງທຶນ ເຂົ້າເຖິງເຕັກໂນໂລຊີທີ່ທັນສະໄໝ ການບໍລິການທີ່ດີ ຮັບເອົາວິທະຍາສາດເຕັກໂນໂລຊີທີ່ກ້າວໜ້າ ຈາກພາຍນອກເຂົ້າມາປະເທດຂອງຕົນ ໃນທີ່ສຸດຈຶ່ງສາມາດເຮັດໃຫ້ລາວເດີນໄປຕາມ ແລະ ໄປຄຽງຄູ່ກັບວົງຄະນາຍາດສາກົນໄດ້.
ກອງປະຊຸມສຸດຍອດອາຊຽນ ຄັ້ງທີ 27 ຫາກໍ່ສຳເລັດລົງໃນວັນທີ 23 ພະຈິກ 2015 ທີ່ປະເທດມາເລເຊຍ ໄດ້ຮັບເອົາຖະແຫຼງການກົວລາລຳເປີ 2015 ວ່າດ້ວຍການເປັນປະຊາຄົມອາຊຽນຢ່າງເປັນເອກະສັນ ເຊິ່ງເລີ່ມຜົນບັງຄັບໃຊ້ແຕ່ວັນທີ 1 ມັງກອນ 2016 ທີ່ຈະມາເຖິງນີ້ ແລະ ນັບແຕ່ມື້ນັ້ນເປັນຕົ້ນໄປ ລາວຈະເປັນປະທານອາຊຽນຕະຫຼອດປີ 2016 ລາວເປັນປະເທດນ້ອຍສະມາຊິກໃໝ່ຂອງອາຊຽນ ເປັນປະເທດໃນກຸ່ມດ້ອຍພັດທະນາ ແລະ ປະເທດກຳລັງພັດທະນາທີ່ບໍ່ມີຊາຍແດນຕິດກັບທະເລ ມັນມີຄວາມສຳຄັນເປັນພິເສດ ສຳລັບການເປັນປະຊາຄົມເສດຖະກິດອາຊຽນ ທີ່ມີຄວາມພ້ອມໃນລະດັບອັນແນ່ນອນ ອັນທີ່ລາວມີທ່າແຮງ ແລະ ອັນໃດທີ່ລາວມີຄວາມສາມາດບົ່ມຊ້ອນ ທີ່ຈະນຳໃຊ້ໃຫ້ເປັນກາລະໂອກາດໃຫ້ແກ່ປະເທດ ແລະ ເວລາດຽວກັນນັ້ນ ກໍ່ສະເໜີໃຫ້ກອງປະຊຸມຊອກໃຫ້ເຫັນສິ່ງທ້າທາຍທີ່ເປັນອຸປະສັກ ແລະ ສິ່ງທົດສອບຂອງລາວທີ່ຈະຕ້ອງໄດ້ແກ້ໄຂ.
ການເປັນປະທານອາຊຽນ ປີ 2016 ຂອງລາວ ພໍດີປະເຊີນກັບການທີ່ລາວຕ້ອງຮ່ວມກັບປະເທດອາຊຽນ ສ້າງແຜນແມ່ບົດ ສ້າງແຜນງານ ແລະ ກ້າວໄປເຖິງໂຄງການຕ່າງໆ ເພື່ອປະຕິບັດປະຊາຄົມເສດຖະກິດອາຊຽນ ດັ່ງນັ້ນ ຄວາມພ້ອມຂອງປະເທດຕ່າງໆໃນອາຊຽນ ອາດມີລະດັບທີ່ແຕກຕ່າງກັນ ສຳລັບລາວເຮົາຈະຕ້ອງສ້າງໃຫ້ມີຄວາມພ້ອມທີ່ກົມກຽວກັນຂອງທຸກພາກສ່ວນໃນສັງຄົມ ລັດຖະບານ ພາກທຸລະກິດ ແລະ ປະຊາຊົນ (ຖ້າເວົ້າຢ່າງໜຶ່ງກໍ່ແມ່ນຄວາມກົມກຽວລະຫວ່າງມະຫາພາກ ແລະ ຈຸລະພາກຂອງປະເທດ).
ແຫ່ລງຂ່າວ
