ທະນາຄານເພື່ອການລົງທຶນເອີຣົບ ໄດ້ໃຫ້ເງິນກູ້ຢືມ ມູນຄ່າ 99,7 ລ້ານໂດລາສະຫະລັດ ຫຼື ປະມານ 780 ຕື້ກວ່າກີບ ໃຫ້ແກ່ ສປປ ລາວ ສຳລັບໂຄງການຂົນສົ່ງແບບຢືນຍົງໃນນະຄອນຫຼວງວຽງຈັນ ເພື່ອປັບປຸງຕາໜ່າງເສັ້ນທາງການບໍລິການຂົນສົ່ງສາທາລະນະ ແລະ ການຄຸ້ມຄອງການສັນຈອນ ຫຼຸດຜ່ອນຄວາມແອອັດຂອງການຈະລາຈອນຕາມເສັ້ນທາງສາຍຕ່າງໆ ໃນເວລາທີ່ຮີບດ່ວນ ໃຫ້ສະດວກ ແລະ ຄ່ອງຕົວ ທັງເປັນການປູກຈິດສຳນຶກໃຫ້ປະຊາຊົນ ຫັນມານຳໃຊ້ລົດສາທາລະນະແທນລົດສ່ວນຕົວ.
ໂຄງການດັ່ງກ່າວ ຈະໄດ້ເລີ່ມຈັດຕັ້ງປະຕິບັດໃນຕົ້ນປີ 2016 ໜ້າວຽກຂອງໂຄງການປະກອບມີ: ສ້າງລະບົບບໍລິການລົດເມສາທາລະນະທີ່ມີຄຸນະພາບ ຈັດສັນສະຖານທີ່ຈອດລົດທີ່ມີລະບົບຄຸ້ມຄອງ ໂດຍຈະມີການຮ່ວມມືກັບພາກເອກະຊົນໃຫ້ການບໍລິການສ້າງ ແລະ ປັບປຸງລະບົບການຄຸ້ມຄອງການຈະລາຈອນ ເປັນຕົ້ນແມ່ນລະບົບໄຟອຳນາດ ຈັດສັນເສັ້ນທາງສຳລັບຂີ່ລົດຖີບ ແລະ ຄົນຍ່າງ ປັບປຸງສະຖານທີ່ພັກຜ່ອນ ແລະ ສະຖານທີ່ສາທາລະນະໃຫ້ສວຍງາມ ເພື່ອດຶງດູດນັກທ່ອງທ່ຽວທັງພາຍໃນ ກໍ່ຄືຕ່າງປະເທດ ພ້ອມທັງຄວາມອາດສາມາດໃຫ້ແກ່ພະນັກງານລັດ ໃນການຄຸ້ມຄອງການຂົນສົ່ງແບບຍືນຍົງ ໃນນະຄອນຫຼວງວຽງຈັນ ເຊິ່ງຄາດວ່າຈະໃຫ້ສຳເລັດໃນທ້າຍປີ 2019.
ພິທີເຊັນສັນຍາເງິນກູ້ຢືມໂຄງການດັ່ງກ່າວ ໄດ້ຈັດຂຶ້ນວັນທີ 26 ພະຈິກ 2015 ຜ່ານມາ ທີ່ກະຊວງການເງິນ ລະຫວ່າງທ່ານນາງ ທິບພາກອນ ຈັນທະວົງສາ ລັດຖະມົນຕີຊ່ວຍວ່າການກະຊວງການເງິນ ຕາງໜ້າລັດຖະບານ ສປປ ລາວ ແລະ ທ່ານ ແອນເດຣຍ ພິນນາ ຜູ້ຈັດການພະແນກເງິນກູ້ຢືມ ປະຈຳພາກພື້ນອາຊີຕາເວັນອອກສຽງໃຕ້ ຂອງທະນາຄານເພື່ອພັດທະນາເອີຣົບ ມີບັນດາກະຊວງ ຕາງໜ້າຫ້ອງວ່າ ການ ນວ ພ້ອມດ້ວຍພະນັກງານ-ວິຊາການກ່ຽວຂ້ອງສອງຝ່າຍ ເຂົ້າຮ່ວມເປັນສັກຂີພິຍານ.
ແຫ່ລງຂ່າວ
