ງານວາງສະແດງຜົນສຳເລັດ ການພັດທະນາເສດຖະກິດ-ສັງຄົມ ແລະ ສິນຄ້າ Vientiane Expo 2015 ໄດ້ໄຂຂຶ້ນວັນທີ 28 ພະຈິກ 2015 ຢູ່ສູນການຄ້າໄອເຕັກມໍ ຊັ້ນ 7 ໂດຍມີທ່ານ ທອງສິງ ທຳມະວົງ ນາຍົກລັດຖະມົນຕີ ພ້ອມດ້ວຍທ່ານຮອງນາຍົກລັດຖະມົນຕີ ບັນດາລັດຖະມົນຕີ ເຈົ້າຄອງນະຄອນຫຼວງວຽງຈັນ ເຈົ້າແຂວງ ຮອງເລຂາທິການໃຫຍ່ອາຊຽນ ບັນດາທູດ-ທູຕານຸທູດ ອົງການຈັດຕັ້ງສາກົນ ແລະ ແຂກຖືກເຊີນ ທັງພາຍໃນ ແລະ ຕ່າງປະເທດ ເຂົ້າຮ່ວມ.
ທ່ານນາງ ເຂັມມະນີ ພົນເສນາ ລັດຖະມົນຕີວ່າການກະຊວງອຸດສາຫະກຳ ແລະ ການຄ້າ ຫົວໜ້າຄະນະຮັບຜິດຊອບງານວາງສະແດງຜົນສຳເລັດ ການພັດທະນາເສດຖະກິດ-ສັງຄົມ ແລະ ສິນຄ້າ Vientiane Expo 2015 ໄດ້ກ່າວວ່າ: ງານວາງສະແດງຜົນສຳເລັດການພັດທະນາເສດຖະກິດ-ສັງຄົມ ແລະ ສິນຄ້າ Vientiane Expo 2015 ເປັນກິດຈະກຳໜຶ່ງເພື່ອປະກອບສ່ວນເຂົ້າໃນການສະເຫຼີມສະຫຼອງ ວັນສະຖາປະນາ ສປປ ລາວ ຄົບຮອບ 40 ປີ ຖືເອົາໂອກາດນີ້ ໂຄສະນາເຜີຍແຜ່ແນວທາງອັນຖືກຕ້ອງຂອງພັກ-ລັດ ໃນພາລະກິດແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ ສ້າງຄວາມເຊື່ອໝັ້ນອັນໜັກແໜ້ນຕໍ່ອະນາຄົດອັນສະຫວ່າງສະໄຫວ ແຫ່ງການກ້າວຂຶ້ນຂອງປະເທດຊາດ ໂຄສະນາຜົນສຳເລັດອັນໃຫຍ່ຫຼວງຫຼາຍດ້ານຂອງການພັດທະນາ ສປປ ລາວ ໃນ 40 ປີຜ່ານມາ ພາຍໃຕ້ການນຳພາຂອງພັກປະຊາຊົນປະຕິວັດລາວ ໂດຍສະເພາະ ແມ່ນວາງສະແດງຜະລິດຕະພັນ-ສິນຄ້າ ທີ່ໄດ້ກາຍເປັນແຫຼ່ງລາຍຮັບຂອງເສດຖະກິດແຫ່ງຊາດ ແລະ ບັນດາໂຄງການສະໜັບສະໜູນທີ່ປິ່ນອ້ອມໂອດ໋ອບ ນອກນີ້ ຍັງເປັນການສ້າງໂອກາດໃຫ້ພາກທຸລະກິດລາວ ແລະ ຕ່າງປະເທດ ໄດ້ມີການພົວພັນແລກປ່ຽນຊື້-ຂາຍສິນຄ້າແລກປ່ຽນບົດຮຽນ ແລະ ປະສົບການທາງທຸລະກິດນຳກັນຕື່ມອີກ.
ງານວາງສະແດງສິນຄ້າຄັ້ງນີ້ ຈະດຳເນີນແຕ່ວັນທີ 28 ພະຈິກ-7 ທັນວາ 2015 ໂດຍມີບັນດາອົງການຈັດຕັ້ງ ແລະ ທຸລະກິດທັງພາຍໃນ ແລະ ຕ່າງປະເທດ ເຂົ້າຮ່ວມ 209 ຫົວໜ່ວຍ ມີຫຼາຍກວ່າ 350 ຫ້ອງວາງສະແດງ ໃນນີ້ ຈາກພາຍໃນປະເທດ 159 ຫົວໜ່ວຍ ຕ່າງແຂວງ 23 ຫົວໜ່ວຍ ຕ່າງປະເທດ ແລະ ອົງການຈັດຕັ້ງສາກົນ 50 ຫົວໜ່ວຍ ໂດຍສິນຄ້າຕົ້ນຕໍທີ່ນຳມາວາງສະແດງ ແມ່ນປະເພດເຄື່ອງຫັດຖະກຳ ເສື້ອຜ້າ ອັນຍະມະນີ ເຟີນີເຈີ ເຄື່ອງຕົບແຕ່ງເຮືອນ ເຄື່ອງສຳອາງ ຢາປິ່ນປົວພະຍາດ ອາຫານ ການບໍລິການທະນາຄານ ການສຶກສາ ການທ່ອງທ່ຽວ ແລະ ອື່ນໆ ນອກນີ້ ພາຍໃນງານຍັງຈະມີສຳມະນາວິທະຍາສາດ ກອງປະຊຸມພົບປະແລກປ່ຽນດ້ານທຸລະກິດ ການຄ້າ ການລົງທຶນ ແລະ ການສະແດງສິລະປະ-ວັນນະຄະດີ ຈາກພາຍໃນ ແລະ ແລະຕ່າງປະເທດ ຕື່ມອີກ.
ແຫ່ລງຂ່າວ
