ຂປລ. ສປຊ ຈະສືບຕໍ່ໃຫ້ທຶນສະໜັບສະໜູນ ເຂົ້າໃນວຽກງານການພັດທະນາແບບຍືນຍົງ ຢູ່ ສປປ ລາວ ເພື່ອໃຫ້ຫລຸດພົ້ນອອກຈາກສະຖານະພາບ ປະເທດດ້ອຍພັດທະນາໃນປີ 2020 ໂດຍຈະເລັ່ງໃສ່ສົ່ງເສີມການພັດທະນາທ້ອງຖິ່ນ, ສ້າງທ່າແຮງດ້ານການເງິນ ແລະ ພັດທະນາເຄື່ອຂ່າຍການແບ່ງປັນຂໍ້ມູນ ລວມທັງການສົ່ງຂ່າວສານ, ເຕັກໂນໂລຊີສະອາດ ແລະ ເປັນສີຂຽວ ເຊິ່ງນອນຢູ່ໃນເປົ້າໝາຍການພັດທະນາແບບຍືນຍົງ. ນີ້ແມ່ນການຢືນຢັນຂອງ ທ່ານ ນາງ ເຮເລັນ ຄລາກ ຜູ້ ບໍລິຫານຂອງ ອົງການສະຫະປະຊາຊາດເພື່ອການພັດທະນາ ໄດ້ຖະແຫລງຂ່າວຕໍ່ສື່ມວນຊົນໃນໂອ ກາດເຂົ້າຮ່ວມກອງປະຊຸມໂຕະມົນລະດັບສູງ ຄັ້ງທີ 12 ໃນວັນທີ 27 ພະຈິກ 2015 ນີ້ ທີ່ນະຄອນຫລວງວຽງຈັນ.
ທ່ານນາງ ເຮເລັນ ຄລາກ ຍັງກ່າວຕື່ມອີກວ່າ: ການຊ່ວຍເຫລືອດ້ານການພັດທະນາແມ່ນກວມເອົາ 7% ຂອງລາຍຮັບພາຍໃນແຫ່ງຊາດຂອງ ສປປ ລາວ ຫລາຍກວ່າ ເປົ້າໝາຍຂອງຖະແຫລງການຮ່ວມວຽງຈັນ. ທັງນີ້ ກໍເພື່ອນໍາໃຊ້ການຊ່ວຍເຫລືອດັ່ງກ່າວໃຫ້ເກີດປະໂຫຍດສູງສຸດ ແລະ ສອດຄ່ອງກັບບູລິມະສິດດ້ານການພັດທະນາຂອງລັດຖະ ບານ ຂະນະດຽວກັນ ກໍ ເພື່ອສົ່ງເສີມການນໍາໃຊ້ລາຍຮັບເຂົ້າໃສ່ການພັດທະນາ ເຊິ່ງເປົ້າໝາຍທີ່ກ່າວມານັ້ນແມ່ນນອນຢູ່ໃນແຜນພັດທະນາ ເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII ເພື່ອຕໍ່ສູ້ກັບທຸກບັນຫາ ທີ່ມີຜົນກະທົບຕໍ່ຄວາມທຸກຍາກ, ຄວາມບໍ່ສະເໜີພາບ, ຄວາມບໍ່ຢຸດຕິທໍາ ແລະ ການ ປ່ຽນແປງດີນຟ້າອາກາດ ບັນດາເປົ້າໝາຍທີ່ກ່າວມານັ້ນແມ່ນວາລະການພັດທະນາທີ່ໃຫຍ່ຫລວງ ທີ່ສຸດ ມີຄວາມຕັ້ງໃຈຫລາຍທີ່ສຸດສໍາລັບພວກເຮົາ ທຸກຄົນ, ໂລກ ແລະ ຄວາມ ຈະເລີນຮຸ່ງເຮືອງ ເປັນສ່ວນໜຶ່ງທີ່ເຮັດໃຫ້ຮູ້ວ່າການຮ່ວມມື ມີຄວາມສໍາຄັນຫລາຍ, ຖ້າປັດສະຈາກການຮ່ວມມືໃນຮູບແບບໃໝ່, ແຫລ່ງທຶນໃໝ່, ເຕັກໂນໂລຊີໃໝ່ໆ ພວກເຮົາຈະບໍ່ສາມາດບັນລຸເປົ້າໝາຍເຫລົ່ານີ້ໄດ້.
ແຫລ່ງຂ່າວ:
