ຄະນະຈັດຕັ້ງພິທີລະດັບຊາດ ນຳພາໂດຍທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ທ່ານພົນຕີ ສຸວອນ ເລືອງບຸນມີ ລັດຖະມົນຕີຊ່ວຍວ່າການ ກະຊວງປ້ອງກັນປະເທດ ທ່ານ ບົວເງິນ ຊາພູວົງ ລັດຖະມົນຕີຊ່ວຍວ່າການກະຊວງຖະແຫຼງຂ່າວ ວັດທະນະທຳ-ທ່ອງທ່ຽວ ໄດ້ຈັດພິທີຊ້ອມໃຫຍ່ ເພື່ອກຽມຄວາມພ້ອມຮອບດ້ານ ໃນການສະເຫຼີມສະຫຼອງວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 40 ປີ.
ພິທີຊ້ອມໃຫຍ່ ເພື່ອກະກຽມໃຫ້ແກ່ພິທີໂຮມຊຸມນຸມໃຫຍ່ ແລະ ຊົມການສວນສະໜາມ ສະເຫຼີມສະຫຼອງວັນສະຖາປະນາ ສປປ ລາວ ຄົບຮອບ 40 ປີ ໄດ້ຈັດຂຶ້ນໃນວັນທີ 28 ພະຈິກ 2015 ຜ່ານມາ ເຂົ້າຮ່ວມຊົມການຊ້ອມໃຫຍ່ຄັ້ງນີ້ມີທ່ານ ບຸນຍັງ ວໍລະຈິດ ຮອງປະທານປະເທດ ພ້ອມບັນດາການນຳພັກ-ລັດ ແລະ ພາກສ່ວນກ່ຽວຂ້ອງ.
ການຊ້ອມໃຫຍ່ຄັ້ງນີ້ ແມ່ນການສະແດງໃຫ້ຄືກັບພິທີຕົວຈິງ ໂດຍຄະນະຈັດຕັ້ງລະດັບຊາດ ໄດ້ນຳເອົາທຸກໆຂັ້ນຕອນມາຊ້ອມຄືນໃໝ່ ແລະ ໄດ້ຮັບຜົນຕາມຄາດໝາຍດ້ວຍຄວາມງົດງາມ ແລະ ຍິ່ງໃຫຍ່ ເຊີນຊວນພີ່ນ້ອງຊາວລາວ ຢູ່ທັງພາຍໃນ ແລະ ຕ່າງປະເທດ ຈົ່ງຕິດຕາມຊົມຖ່າຍທອດສົດຜ່ານທາງໂທລະພາບ ໂອກາດວັນຊາດທີ 2 ທັນວາ ຈະມາເຖິງນີ້.
ແຫ່ລງຂ່າວ
