ສຳນັກຂ່າວຕ່າງປະເທດ ລາຍງານໃນວັນທີ 27 ພະຈິກນີ້ວ່າ ທ່ານ ເຣເຊບ ຕອຍຢິບ ເອີໂດກັນ ປະທານາທິບໍດີຕວກກີ ໄດ້ອອກມາໃຫ້ສຳພາດ ຜ່ານໂທລະພາບຊີເອັນອັນ ໃນມື້ວານນີ້ (26 ພະຈິກ) ວ່າ ຕວກກີຈະບໍ່ຂໍໂທດ ຕໍ່ເຫດການຍິງເຮືອບິນສູ້ຮົບຂອງຣັດເຊຍຕົກ ພ້ອມທັງຢ້ຳວ່າ ເປັນການລະເມີດນ່ານຟ້າຂອງຕວກກີ ໃກ້ກັບຊາຍແດນຊີຣີ.  ທ່ານໄດ້ເວົ້າວ່າ ” ຂ້າພະເຈົ້າຄິດວ່າ ຝ່າຍທີ່ຈະຕ້ອງຂໍໂທດບໍ່ແມ່ນພວກເຮົາ, ແມ່ນໃຜທີ່ລະເມີດນ່ານຟ້າຂອງເຮົານັ້ນແຫລະ ທີ່ຈະຕ້ອງເປັນຝ່າຍຂໍໂທດ, ນັກບິນ ແລະ ກອງທັບຂອງເຮົາ ພຽງແຕ່ປະຕິບັດໜ້າທີ່…” 

ທັງນີ້ ສະພາບຄວາມເຄັ່ງຕຶງ ຂອງຄວາມສຳພັນລະຫວ່າງ ຣັດເຊຍ-ຕວກກີ ຍິ່ງເພີ່ມທະວີຂຶ້ນ ພາຍຫລັງລັດຖະບານຣັດເຊຍ ໄດ້ກຽມອອກມາດຕະການຂວ້ຳບາດ ທາງດ້ານເສດຖະກິດ ແລະ ມະນຸດສະທຳ ເພື່ອຕອບໂຕ້ຂະໜານໃຫຍ່ ຕໍ່ກັບເຫດການດັ່ງກ່າວ, ຫລ້າສຸດ ກະຊວງການຕ່າງປະເທດຣັດເຊຍ ກໍໄດ້ອອກມາຖະແຫລງ ໃນວັນທີ 26 ພະຈິກຜ່ານມານີ້ ໂດຍຮຽກຮ້ອງໃຫ້ພົນລະເມືອງຣັດເຊຍ ທີ່ຢູ່ພາຍໃນປະເທດຕວກກີ ເດີນທາງກັບຄືນປະເທດ.