ສຳນັກຂ່າວຕ່າງປະເທດ ລາຍງານໃນວັນທີ 26 ພະຈິກຜ່ານມານີ້ວ່າ ຣັດເຊຍຈະຊ່ວຍເຫລືອກຳປູເຈຍ ເພື່ອສຶກສາຄວາມເປັນໄປໄດ້ ໃນການສ້າງໂຮງໄຟຟ້າ ພະລັງງານນິວເຄລຍ ຊຶ່ງເປັນຜົນມາຈາກ ຂໍ້ຕົກລົງຮ່ວມມືທັງສອງຝ່າຍ ທີ່ໄດ້ເຊັນກັນ ໃນລະຫວ່າງທີ່ ນາຍົດລັດຖະມົນຕີຣັດເຊຍ ທ່ານ ດິມິທຣີ ເມດເວເດບ ໄດ້ເດີນທາງຢ້ຽມຢາມ ປະເທດກຳປູເຈຍຢ່າງເປັນທາງການ ໂດຍຂໍ້ຕົກລົງດັ່ງກ່າວ ແມ່ນຝ່າຍຣັດເຊຍ ຈະຈັດຫາຜູ້ຊ່ຽວຊານ ເພື່ອດຳເນີນການວິໄຈຄົ້ນຄ້ວາ ແລະ ເຝິກອົບຮົບໃຫ້ແກ່ກຳປູເຈຍ.

ທັງນີ້ ກຳປູເຈຍ ເປັນປະເທດທີ່ເພິ່ງພາພະລັງງານ ແລະ ນ້ຳມັນ ທີ່ນຳເຂົ້າຢ່າງມະຫາສານ ແລະ ເປັນປະເທດທີ່ມີ ລາຄາພະລັງງານໄຟຟ້າ ສູງອີກປະເທດໜຶ່ງ ໃນບັນດາປະເທດອາຊຽນ ຊຶ່ງເປັນສິ່ງທີ່ນັກລົງທຶນ ໄດ້ສະເໜີໃຫ້ລັດຖະບານກຳປູເຈຍ ດຳເນີນການແກ້ໄຂ.