ພິທີໄຂນຳໃຊ້ສະຖາບັນເຝິກອົບຮົມໄຟຟ້າລາວຫຼັງໃໝ່ ໄດ້ຈັດຂຶ້ນວັນທີ 25 ພະຈິກ 2015 ໂດຍມີທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ຜູ້ຊີ້ນຳວຽກງານເສດຖະກິດ ການຜະລິດ ແລະ ຈໍລະຈອນ ທ່ານ ດຣ. ຄຳມະນີ ອິນທິລາດ ລັດຖະມົນຕີວ່າການກະຊວງພະລັງງານ ແລະ ບໍ່ແຮ່ ທ່ານ ສີສະຫວາດ ທິຣະວົງ ຜູ້ອຳນວຍການໃຫຍ່ລັດວິສາຫະກິດໄຟຟ້າລາວ ພ້ອມດ້ວຍແຂກຖືກເຊີນເຂົ້າຮ່ວມ.
ທ່ານ ສີສະຫວາດ ທິຣະວົງ ໄດ້ກ່າວວ່າ: ໂຄງການກໍ່ສ້າງອາຄານສະຖາບັນເຝິກອົບຮົມໄຟຟ້າລາວຫຼັງໃໝ່ ຕັ້ງຢູ່ດິນຂອງລັດວິສາຫະກິດໄຟຟ້າລາວ (ບ້ານທົ່ງກາງ ເມືອງສີສັດຕະນາກ ນະຄອນຫຼວງວຽງຈັນ) ເລີ່ມກໍ່ສ້າງແຕ່ເດືອນກຸມພາ 2013 ແລະ ສຳເລັດໃນເດືອນຕຸລາ 2015 ເປັນອາຄານ 8 ຊັ້ນ (ບໍ່ນັບຊັ້ນໃຕ້ດິນ) ຂະໜາດ 22X42 ແມັດ ມີເນື້ອທີ່ໃຊ້ສອຍ 8.850 ຕາແມັດ ເຊິ່ງຖືກອອກແບບຕາມມາດຕະຖານສາກົນ ໂດຍບໍລິສັດ ອາກຄີເນຍອາສໂຊເຊດສ ຈຳກັດ ແລະ ກໍ່ສ້າງໂດຍບໍລິສັດ ອິນແປງກໍ່ສ້າງເຄຫາສະຖານ ຈຳກັດ ສະຖາບັນເຝິກອົບຮົມໄຟຟ້າລາວ ໄດ້ສ້າງຕັ້ງຂຶ້ນປີ 1965 ເຊິ່ງເວລານັ້ນມີຊື່ວ່າ: “ໂຮງຮຽນເຊເອບ ຫຼື ສູນເຝິກອົບຮົມ ຟຟລ” ພື້ນຖານແມ່ນການສ້າງນາຍຊ່າງ ແລະ ຜູ້ຊ່ວຍນາຍຊ່າງ ເພື່ອຄວບຄຸມອຸປະກອນໄຟຟ້າ ໂດຍໄລຍະທຳອິດໄດ້ສ້າງພະນັກງານວິຊາການທີ່ຈົບການສຶກສາຊັ້ນປະຖົມ ຫຼື ມັດທະຍົມ ເພື່ອເປັນນາຍຊ່າງ ໃຊ້ເວລາ 1-2 ປີ.
ພາຍຫຼັງການເຕີບໃຫຍ່ຂອງໄຟຟ້າລາວ ມີລັກສະນະກ້າວກະໂດດ ທັງກຳລັງການຜະລິດ ແລະ ຈຳນວນພົນ ສະຖາບັນເຝິກອົບຮົມໄຟຟ້າລາວ ກໍ່ໄດ້ປັບປຸງສ້າງຫຼັກສູດເຝິກອົບຮົມວິຊາຊີບ ແລະ ເຄື່ອງທົດລອງໃນຂະແໜງການຜະລິດ ເພື່ອສ້າງພະນັກງານຮອງຮັບວຽກງານດັ່ງກ່າວ ໂດຍການຊ່ວຍເຫຼືອຈາກລັດຖະບານຝຣັ່ງ ເຊິ່ງໄດ້ເປັນພື້ນຖານ ແລະ ທ່າແຮງໃນການສ້າງວິສະວະກອນໄຟຟ້າໃນໄລຍະໃໝ່ ສະຖາບັນເຝິກອົບຮົມວິຊາຊີບໄຟຟ້າລາວ ໄດ້ບໍລິການເຝິກອົບຮົມວິຊາຊີບວຽກງານວິຊາສະເພາະດ້ານເຕັກນິກ ກ່ຽວກັບຂະແໜງໄຟຟ້ານ້ຳຕົກ ຂະແໜງຈຳໜ່າຍໃຫ້ພະນັກງານທົ່ວ ຟຟລ ແລະ ເຝິກອົບຮົມໃຫ້ພາກສ່ວນຕ່າງໆທົ່ວປະເທດ ນອກນີ້ ຍັງໄດ້ຮ່ວມມືໃນການກໍ່ສ້າງ ແລະ ພັດທະນາບຸກຄະລາກອນຮ່ວມກັບບັນດາກະຊວງ ສະຖາບັນ ແລະ ໂຄງການຮ່ວມມືສາກົນ.
ແຫ່ລງຂ່າວ
