ສຳນັກຂ່າວຕ່າງປະເທດ ລາຍງານໃນວັນທີ 27 ພະຈິກນີ້ວ່າ ທ່ານ ດິມິທຣີ ເວດເວເດບ ນາຍົກລັດຖະມົນຕີຣັດເຊຍ ໄດ້ກ່າວໃນກອງປະຊຸມ ຄະນະລັດຖະບານວ່າ ລັດຖະບານ ໄດ້ອອກຄຳສັ່ງໃຫ້ມີການຮ່າງ ມາດຕະການຂວ້ຳບາດ ທາງດ້ານເສດຖະກິດ ເປັນວົງກວ້າງ ຕໍ່ປະເທດຕວກກີ ເພື່ອເປັນການຕອບໂຕ້ ພາຍຫລັງ ກອງທັບຕວກກີ ໄດ້ສົ່ງເຮືອບິນສູ້ຮົບ F-16 ຍິງເຮືອບິນສູ້ຮົບ Su-24 ຂອງຣັດເຊຍຕົກ ຢູ່ບໍລິເວນຊາຍແດນປະເທດຊີຣີ ເມື່ອວັນທີ 24 ພະຈິກຜ່ານມາ ໂດຍກ່າວຫາວ່າ ເຮືອບິນຣັດເຊຍ ໄດ້ລ່ວງລ້ຳນ່ານຟ້າຂອງຕວກກີ.

ທັງນີ້ ຣັດເຊຍຖືເປັນປະເທດຄູ່ຄ້າ ລາຍໃຫຍ່ອັນດັບ 2 ຂອງຕວກກີ ແລະ ຕວກກີເອງ ກໍເປັນປະເທດ ທີ່ນັກທ່ອງທ່ຽວຣັດເຊຍ ນິຍົມເດີນທາງໄປທ່ອງທ່ຽວ ຫລາຍທີ່ສຸດ ໂດຍພາຍຫລັງການອອກ ມາດຕະການຂວ້ຳບາດດັ່ງກ່າວນີ້ ຈະເຮັດໃຫ້ເສດຖະກິດ, ການທ່ອງທ່ຽວ, ການເດີນທາງ, ການຄ້າ, ແຮງງານ, ຂໍ້ຕົກລົງ ດ້ານການຊ່ວຍເຫລືອຕ່າງໆ ຕໍ່ກັບຕວກກີ ຈະຖືກຣັດເຊຍຂວ້ຳບາດ ລະງັບໄວ້ທັງໝົດ.