ສຳນັກຂ່າວຕ່າງປະເທດ ລາຍງານໃນວັນທີ 27 ພະຈິກນີ້ວ່າ ທ່ານ ນາງ ອັງເກລາ ແມເຄິນ ນາຍົກລັດຖະມົນຕີເຢຍລະມັນ ໄດ້ປະກາດຈຸດຢືນ ຈະສະໜັບສະໜູນ ປະຕິບັດການໂຈມຕີກຸ່ມລັດອິດສະລາມ ຫລື ໄອເອັສ ໃນປະເທດຊີຣີ ຕາມການຮຽກຮ້ອງຂອງຝຣັ່ງ ໃນລະຫວ່າງທີ່ໄດ້ພົບປະກັບ ທ່ານ ຟຣັງຊົວ ອອລລອງ ປະທານາທິບໍດີຝຣັ່ງ ໃນວັນທີ 25 ພະຈິກຜ່ານມາ ໂດຍມີແຜນຈະສົ່ງ ເຮືອບິນສູ້ຮົບທໍນາໂດ 4 – 6 ລຳ, ເຮືອບິນຕື່ມນ້ຳມັນ ແລະ ເຮືອກຳປັ່ນສູ້ຮົບ ອີກຈຳນວນໜຶ່ງ ເຂົ້າໄປປະຈຳການ ໃນພາກພື້ນດັ່ງກ່າວ. ແນວໃດກໍຕາມ ແຜນການດັ່ງກ່າວ ຂອງລັດຖະບານເຢຍລະມັນ ຍັງຈະຕ້ອງໄດ້ຜ່ານການເຫັນດີ ຈາກລັດຖະສະພາ ເສຍກ່ອນ ໂດຍຄາດວ່າ ຮ່າງແຜນການດັ່ງກ່າວ ຈະຖືກສົ່ງຂໍອະນຸມັດ ຈາກລັດຖະສະພາ ພາຍໃນທ້າຍປີນີ້.
ທັງນີ້ ການເຄື່ອນໄຫວດັ່ງກ່າວຂອງເຢຍລະມັນ ມີຂຶ້ນພາຍຫລັງເຫດການ ໂຈມຕີປາຣີ ເມື່ອວັນທີ 13 ພະຈິກຜ່ານມາ ເຮັດໃຫ້ມີຜູ້ຄົນ ເສຍຊີວິດເຖິງ 130 ຄົນ ຈົນເຮັດໃຫ້ຜູ້ນຳຝຣັ່ງ ໄດ້ອອກມາຮຽກຮ້ອງ ໃຫ້ບັນດາປະເທດເພື່ອນມິດສາກົນ ຮ່ວມມືກັນ ໃນການຕໍ່ສູ້ກັບນັກຮົບກຸ່ມນີ້.
