ຂປລ. ທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດລາວ ໄດ້ຕ້ອນຮັບ ແລະ ພົບປະໂອ້ລົມຄະນະຜູ້ແທນ ຄົນເຊື້ອຊາດລາວຢູ່ຕ່າງປະເທດ ໃນວັນທີ 26 ພະຈິກ 2015 ທີ່ສະພາແຫ່ງຊາດ ໃນໂອກາດທີ່ຄະນະຜູ້ແທນດັ່ງກ່າວ ເດີນທາງມາເຂົ້າຮ່ວມພິທີ ສະເຫລີມສະຫລອງວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບ ຮອບ 40 ປີ (02/12/1975-02/12/2015).
ໃນໂອກາດດັ່ງກ່າວ, ທ່ານປະທານສະພາແຫ່ງຊາດ ໄດ້ຕາງໜ້າໃຫ້ແກ່ ພັກ–ລັດຖະບານ ແລະ ສະພາແຫ່ງຊາດ ສະແດງຄວາມຍິນດີຕ້ອນຮັບ ແລະ ຍ້ອງຍໍຊົມເຊີຍ ຕໍ່ຄະນະຜູ້ແທນ ຄົນເຊື້ອຊາດລາວຢູ່ຕ່າງປະເທດ ເປັນຕົ້ນແມ່ນມາຈາກ ປະເທດຝຣັ່ງ, ສ ອາເມຣິກາ, ການາດາ, ອົດສະຕຣາລີ, ແບນຊິກ, ສະວິດເຊີແລນ, ເຢຍລະມັນ, ຍີ່ປຸ່ນ, ຮົງກາລີ ແລະ ຫລາຍປະເທດໃນເອີຣົບ ທີ່ໄດ້ສະຫລະເວລາ ມາຮ່ວມງານສະເຫລີມສະຫລອງ ວັນສຳຄັນດັ່ງກ່າວ ຕາມຄຳເຊື້ອເຊີນຂອງພັກ ແລະ ລັດຖະບານ ແຫ່ງ ສປປ ລາວ ເຊິ່ງການ ສະເຫລີມສະຫລອງວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 40 ປີ, ປີນີ້ເປັນເຫດການການເມືອງ ປະຫວັດສາດທີ່ສຳຄັນ ຂອງຊາດລາວພວກເຮົາ ກ່ອນໜ້າວັນທີ 2 ທັນວາ ນັ້ນຄືດັ່ງທີ່ພວກເຮົາຮັບຮູ້ວ່າ ມັນແມ່ນຂະບວນວິວັດແຫ່ງການຕໍ່ສູ້ ອັນຍືດເຍື້ອຍາວນານ ພາຍໃຕ້ການນຳພາຂອງພັກ ປະຊາຊົນ ປະຕິວັດລາວ ແລະ ກໍແມ່ນຄວາມອົດທົນ, ຄວາມເສຍສະຫລະອັນສູງສົງຂອງປະຊາຊົນລາວຂອງພວກເຮົາ. ການທີ່ມີສປປ ລາວເຮົາໃນທຸກມື້ນີ້ ກໍແມ່ນການເສຍະສະຫລະອັນສູງສົງ ຂອງນັກວິລະຊົນ, ທະຫານ ແລະ ປະຊາຊົນລາວບັນດາເຜົ່າ. ພັກ–ລັດຖະບານ ແລະ ສະພາແຫ່ງຊາດ ຍາມໃດກໍຖືສະເໝີວ່າ ພີ່ນ້ອງ ຄົນເຊື້ອຊາດລາວທີ່ອາໄສຢູ່ຕ່າງປະເທດ ແມ່ນພາກສ່ວນໜຶ່ງທີ່ສຳຄັນ ເຊິ່ງບໍ່ສາມາດຕັດແຍກອອກຈາກ ວົງຄະນະຍາດແຫ່ງຊາດລາວໄດ້, ເປັນແຫລ່ງກຳລັງແຮງອັນໜຶ່ງ ໃນການສ້າງສາພັດທະນາປະເທດຊາດ, ເປັນຂົວຕໍ່ໃນການເປີດກວ້າງສາຍພົວພັນມິດຕະພາບ ແລະ ການຮ່ວມມືກັບຕ່າງປະເທດ ແລະ ອົງການຈັດຕັ້ງສາກົນ.
ໃນຕອນທ້າຍ ທ່ານ ປະທານສະພາແຫ່ງຊາດ ກໍໄດ້ສະແດງຄວາມຂອບໃຈອີກເທື່ອໜຶ່ງ ຕໍ່ພີ່ນ້ອງຄົນເຊື້ອຊາດລາວ ຢູ່ຕ່າງປະເທດທັງໝົດ ທີ່ໄດ້ກັບຄືນມາຢ້ຽມຢາມຍາດຕິພີ່ນ້ອງ ແລະ ປະເທດຊາດອັນແສນຮັກ ຂອງພວກເຮົາໃນຄັ້ງນີ້ ແລະ ຂໍ້ໃຫ້ມີຄວາມເບີກບານມ່ວນຊື່ນ ໃນການເຄື່ອນໄຫວຢ້ຽມຢາມ, ພ້ອມກັນນັ້ນ ກໍຂໍໃຫ້ນຳເອົາຄວາມຢ້ຽມ ຢາມຖາມຂ່າວ ໄມຕີຈິດມິດຕະພາບ ແລະ ຄວາມປາຖະໜາດີ ຈາກພັກ–ລັດ ແລະ ສະພາແຫ່ງຊາດ ສົ່ງໄປຍັງຄອບຄົວເພື່ອມິດ ທີ່ບໍ່ໄດ້ມາຮ່ວມງານໃນຄັ້ງນີ້ດ້ວຍ. ເມື່ອກັບເມືອແລ້ວ ກໍຂໍໃຫ້ຊ່ວຍສະໜັບສະໜູນ ຊຸກຍູ້ການພັດທະນາປະເທດຊາດ ຂອງພວກເຮົາຕາມທ່າແຮງ ແລະ ຄວາມຮູ້-ຄວາມສາມາດຂອງຕົນ ໂດຍສະເພາະແມ່ນຊ່ວຍເຜີຍແຜ່ຂໍ້ມູນຂ່າວ ສານຄວາມເປັນຈິງ ກໍຄື ການເປັນຂົວຕໍ່ ລະຫວ່າງ ລັດຖະບານ ແລະ ປະຊາຊົນລາວ ກັບ ລັດຖະບານ ແລະ ປະຊາຊົນ ຂອງບັນດາປະເທດ ທີ່ບັນດາທ່ານອາໄສຢູ່ນັ້ນ ໃຫ້ມີຄວາມເຂົ້າໃຈ ແລະ ຮ່ວມໄມ້ຮ່ວມມືກັນດີຂຶ້ນເລື້ອຍໆ.
ແຫລ່ງຂ່າວ:
