ຂປລ. ກະຊວງແຜນການ ແລະ ການລົງມຶນ(ຜທ)ໄດ້ຈັດຕັ້ງສະເຫລີມສະຫລອງ ລະນຶກວັນສໍາວັນຕ່າງໆຂອງຊາດ ເຊັ່ນ: ວັນຊາດທີ 2 ທັນວາ ຄົບຮອບ 40 ປີ, ວັນຄ້າຍວັນເກີດ ປະທານໄກສອນ ພົມວິຫານ ຄົບຮອບ 95 ປີ ແລະ ວັນສາກົນ-ສັບປະດາແຫ່ງຊາດ ເພື່ອລຶບລ້າງຄວາມທຸກຍາກ17-24 ຕຸລາ 2015 ຂຶ້ນໃນວັນທີ 26 ພະຈິກ 2015 ນີ້ ທີ່ກະຊວງດັ່ງກ່າວ ໃຫ້ກຽດປະຖະກະຖາໂດຍ ທ່ານນາງ ຄໍາຈັນ ວົງແສນບຸນ ລັດຖະມົນຕີຊ່ວຍວ່າການກະຊວງ ຜທ ແລະ ທ່ານ ສີປະເສີດ ແສນສະຫວັດ ຮອງຫົວໜ້າ ຄະນະໂຄສະນາອົບຮົມສູນກາງພັກ, ມີບັນດາຄະນະກົມ, ສະມາຊິກພັກ, ພະນັກງານ-ລັດຖະກອນອ້ອມຂ້າງກະຊວງ ຜທ ເຂົ້າຮ່ວມ.
ໃນໂອກາດດັ່ງກ່າວ ທ່ານ ສີປະເສີດ ແສນສະຫວັດ ໄດ້ຍົກໃຫ້ເຫັນປະຫວັດ ແລະ ຄວາມໝາຍຄວາມສໍາຄັນຂອງວັນຊາດ 2 ທັນວາ ຄົບຮອບ 40 ປີ ແລະ ວັນຄ້າຍວັນເກີດຂອງປະທານ ໄກສອນ ພົມວິຫານ ຄົບຮອບ 95 ປີ ເຊິ່ງເປັນວັນສໍາຄັນທາງປະຫວັດສາດຂອງຊາດລາວເຮົາ ເພື່ອເຮັດໃຫ້ສະມາຊິກພັກ, ພະນັກງານ-ລັດຖະກອນພາຍໃນກະຊວງແຜນການ ແລະ ການລົງທຶນ ໄດ້ຮັບຮູ້ກ່ຽວກັບຄວາມໝາຍຄວາມສໍາຄັນຂອງການ ສະຖາປະນາ ສປປ ລາວຄົບຮອບ 40 ປີ ເຊິ່ງເປັນເຫດການປະຫວັດສາດອັນສໍາຄັນ ໃຫຍ່ຫລວງຂອງຊາດລາວເຮົາ, ບົນພື້ນຖານປຸກລະດົມເສີມຂະຫຍາຍ ມູນເຊື້ອອັນດີງາມຂອງຊາດ ແລະ ຂອງພັກ, ຕັ້ງໜ້າຈັດຕັ້ງປະຕິບັດແນວທາງນະໂຍບາຍ ຂອງພັກ-ລັດ ໃຫ້ປະກົດຜົນເປັນຈິງຍິ່ງໆຂຶ້ນ, ໂຄສະນາຢ່າງກ້ວາງຂວາງເລິກເຊິ່ງ ກ່ຽວກັບຜົນສໍາເລັດ ອັນໃຫຍ່ຫລວງຫລາຍດ້ານ ທີ່ພວກເຮົາຍາດມາໄດ້ໃນພາລະກິດແຫ່ງການປົກປັກຮັກສາ ແລະ ສ້າງສາປະເທດຊາດພາຍໃຕ້ການນໍາພາອັນສະຫລາດສ່ອງໃສ ຂອງພັກປະຊາຊົນປະຕິວັດລາວໃນໄລຍະ 40 ປີຜ່ານມາ ພ້ອມດຽວກັນນີ້ ກໍໄດ້ຮັບຮູ້ຊີວິດ ແລະ ການເຄື່ອນໄຫວປະຕິວັດ, ຜົນງານຄຸນງາມຄວາມດີ, ຄຸນສົມບັດສິນທໍາປະຕິວັດ ຂອງປະທານໄກສອນ ພົມວິຫານ ຜູ້ນໍາທີ່ແສນເຄົາລົບຮັກ ຂອງປະຊາຊົນລາວບັນດາເຜົ່າ ເພື່ອໃຫ້ສະມາຊິກພັກ-ພະນັກງານ ກະຊວງ ຜທ ໄດ້ຮັບຮູ້ ແລະ ຮໍ່າຮຽນເອົາແບບຢ່າງອັນດີງາມຂອງເພີ່ນ ແລະ ຝຶກຝົນຫລໍ່ຫລອມຕົນເອງ ແນໃສ່ເພື່ອຮັບໃຊ້ຊາດ ແລະ ຮັບໃຊ້ປະຊາຊົນຢ່າງແທ້ຈິງ.
ໃນໂອກາດດຽວກັນນີ້ ທ່ານນາງ ຄໍາຈັນ ວົງແສນບຸນ ກໍໄດ້ຍົກໃຫ້ເຫັນຄວາມໝາຍ ຄວາມສໍາຄັນຂອງວັນສາ ກົນ-ສັບປະດາແຫ່ງຊາດ ເພື່ອລຶບລ້າງຄວາມທຸກຍາກ ທັງນີ້ກໍເພື່ອປຸກລະດົມສ້າງຈິດສໍານຶກ ໃຫ້ພະນັກງານ-ລັດຖະກອນຮັບຮູ້ເຂົ້າໃຈ ແລະ ປະກອບສ່ວນເຂົ້າໃນການ ແກ້ໄຂຄວາມທຸກຍາກ ເຮັດໃຫ້ການພັດທະນາຊົນນະບົດ ກາຍເປັນສະໜາມຮົບອັນດັບໜຶ່ງ ຂອງການພັດທະນາໃນການແກ້ໄຂ ຄວາມທຸກຍາກຂອງປະຊາຊົນ./.
ແຫ່ລງຂ່າວ
