ສຳນັກຂ່າວຕ່າງປະເທດ ລາຍງານໃນວັນທີ 25 ພະຈິກນີ້ວ່າ ເກີດເຫດລະເບີດ ໃຈກາງເມືອງຫລວງ ປະເທດຕູນິຊີ ຖືກຂະບວນລົດເມ ບັນທຸກໜ່ວຍປ້ອງກັນ ປະທານາທິບໍດີຕູນິຊີ ທີ່ກຳລັງເດີນທາງ ເທິງຖະໜົນໂມຮຳເໝັດທີ 5 ໃຈກາງນະຄອນຫລວງຕູນີສ ເຮັດໃຫ້ມີຜູ້ເສຍຊີວິດ ຢ່າງໜ້ອຍ 14 ຄົນ ແລະ ບາດເຈັບຢ່າງໜ້ອຍ 20 ຄົນ ໃນມື້ວັນອັງຄານທີ 24 ພະຈິກຜ່ານມາ  ໂດຍທີ່ຍັງບໍ່ທັນມີກຸ່ມໃດ ອອກມາອ້າງຢູ່ເບື້ອງຫລັງ ຂອງການກໍ່ເຫດ.

ຢ່າງໃດກໍຕາມ ປະທານາທິບໍດີ ເບຈີ ຄາອິດ ເອສເຊບຊີ ແຫ່ງຕູນິຊີ ຊຶ່ງໃນຂະນະເກີດເຫດ ບໍ່ໄດ້ຢູ່ພາຍໃນລົດຄັນດັ່ງກ່າວ ໄດ້ອອກຄຳສັ່ງ ປະກາດພາວະສຸກເສີນ ເປັນເວລາ 30 ວັນໃນທົ່ວປະເທດແລ້ວ.