ຂປລ. ໃນຕອນເຊົ້າວັນທີ 25 ເດືອນພະຈິກ ປີ 2015 ກົງກັບມື້ຂຶ້ນ 15 ຄ່ຳ ເດືອນ 12 (ລາວ) ພສ. 2558 ເຊິ່ງ ເປັນມື້ສຸດທ້າຍ ຂອງບຸນນະມັດສະການ ພະທາດຫລວງວຽງຈັນແລະ ຢູ່ໃນບັນຍາກາດ ແຫ່ງການສະເຫລີມສະຫລອງ ວັນສະຖາປະນາ ສປປ ລາວ ຄົບຮອບ 40 ປີ.
ບັນດາຜູ້ນຳພັກ-ລັດ ນຳໂດຍ ທ່ານ ຈູມມາລີ ໄຊຍະສອນ ປະທານປະເທດ ແຫ່ງ ສປປ ລາວ ພ້ອມດ້ວຍການນຳພັກ-ລັດ, ຕະຫລອດຮອດ ຊາວພຸດທະສາສະນິກະຊົນລາວ ບັນດາເຜົ່າ ໃນຂອບເຂດທົ່ວປະເທດ ກໍຄືມວນຊົນຊາວນະຄອນ ຫລວງວຽງຈັນ ຕ່າງກໍໄດ້ເຂົ້າຮ່ວມເຮັດບຸນໃສ່ບາດ ຖວາຍສັງຄະທານ ແດ່ພະພິຂຸສົງສຳມະເນນ ຫລາຍພັນອົງ. ພ້ອມທັງຮັບຟັງທຳມະເທສະໜາ ຕາມຄຳສອນ ຂອງພະສຳມາສຳພຸດທະເຈົ້າ ຕໍ່ການໃຫ້ທານ, ຖືສິນພາວັນນາ ຕາມຮີດຄອງປະເພນີອັນດີງາມ ທີ່ມີມາແຕ່ດຶກດຳບັນ. ເຊິ່ງການເຮັດບຸນສິນທານດັ່ງກ່າວ ແມ່ນເພື່ອລະນຶກເຖິງ ຄຸນງາມຄວາມດີ ແລະ ອຸທິດບຸນ ກຸສົນແດ່ ພະເຈົ້າໄຊຍະເສດຖາທິຣາດ ທີ່ເປັນຜູ້ກໍ່ສ້າງ ແລະ ປະຕິສັງຂອນ ພະທາດຫລວງວຽງຈັນ./.
ແຫ່ລງຂ່າວ
