ຂປລ.ໃນວັນທີ 23-24 ພະຈິກ 2015 ທີ່ຫໍພິພິຕະພັນ ປະທານໄກສອນ ພົມວິຫານ, ເມືອງໄກສອນພົມວິຫານ ແຂວງສະຫວັນນະເຂດ, ໄດ້ຈັດງານ ວາງສະແດງຮູບພາບ ເນື່ອງໃນໂອກາດວັນສະຖາ ປະນາ ສປປ ລາວ ຄົບຮອບ 40 ປີ ແລະ ວັນຄ້າຍວັນເກີດ ປະທານ ໄກສອນ ພົມວິຫານຄົບຮອບ 95 ປີ ພ້ອມທັງໄດ້ເປີດກອງປະຊຸມສຳມະນາ ວິທະຍາສາດພາຍໃຕ້ຫົວຂໍ້ “ ຊີວິດ ແລະ ພາລະກິດປະຕິວັດຂອງປະທານ ໄກສອນ ພົມວິຫານ ” ເປັນກຽດເຂົ້າຮ່ວມມີທ່ານ ສົມສະຫວາດ ເລັ່ງສະຫວັດ ຮອງນາຍົກ ລັດຖະມົນຕີ, ຜູ້ຊີ້ນຳວຽກງານ ເສດຖະກິດການຜະລິດ ແລະ ຈໍລາຈອນ, ທ່ານຫົວໜ້າ ຄະນະໂຄສະນາອົບ ຮົມສູນກາງພັກ, ເຈົ້າແຂວງໆສະຫວັນນະເຂດ, ບັນດາແຂວງອ້ອມຂ້າງ, ຫົວໜ້າຫໍພິພິທະພັນປະທານ ໄກ ສອນ ພົມວິຫານ, ຄະນະປະຈຳພັກແຂວງ, ອະດີດການນຳແຂວງ ແລະ ພະນັກງານປະຕິວັດອາວຸໂສ ເຂົ້າຮ່ວມຢ່າງພ້ອມພຽງ.
ໃນພິທີເປີດງານດັ່ງກ່າວ ທ່ານ ດຣ. ສຸພັນ ແກ້ວມີໄຊ ເຈົ້າແຂວງໆສະຫວັນນະເຂດ ໄດ້ລາຍງານໃຫ້ຮູ້ວ່າ: ການຈັດວາງສະແດງຮູບພາບເນື່ອງໃນວັນສະຖາປະນາ ສປປ ລາວ ຄົບຮອບ 40 ປີ ແລະ ລະນຶກວັນຄ້າຍວັນເກີດ ປະທານ ໄກສອນ ພົມວິຫານ ຄົບຮອບ 95 ໃນຄັ້ງນີ້ແມ່ນ ປະຕິບັດຕາມການຊີ້ນຳຂອງກົມການເມືອງສູນກາງພັກ ແລະ ຄະນະຊີ້ນຳລະດັບຊາດ ເພື່ອສະເຫລີມສະຫລອງ ສອງວັນປະຫວັດສາດຂອງຊາດ. ເຊິ່ງຮູບພາບທີ່ນຳມາວາງສະແດງໃນຄັ້ງນີ້ ປະກອບມີບັນດາຮູບພາບ, ເອກະສານ ແລະ ວັດຖຸພັນຈຳນວນ 250 ແຜ່ນ ທີ່ຕິດພັນກັບບັນດາເຫດການທີ່ສຳຄັນ, ໂດດເດັ່ນ, ເລິກເຊິ່ງ ແລະ ປະທັບໃຈທີ່ສະທ້ອນໃຫ້ເຫັນ ວິວັດທະນາການແຫ່ງການກຳເນີດຂຶ້ນ, ການເຕີບໃຫຍ່ເຂັ້ມແຂງ ແລະ ການນຳພາຂອງ ພັກປະຊາຊົນ ປະຕິວັດລາວ ທີ່ມີກຽດຢ່າງສະຫງ່າ, ສ່ອງແສງໃຫ້ເຫັນ ວິລະກຳອັນລໍ້າເລີດ ຂອງພັກເຮົາໃນການນຳພາ ປວງຊົນລາວທັງຊາດ ເຮັດສຳເລັດການປະຕິວັດຊາດ ຕໍ່ສູ້ເອົາເອກະລາດ, ອິດສະຫລະພາບ ແລະ ຜືນແຜ່ນດິນ ອັນຄົບຖ້ວນຂອງຊາດ, ຊີ້ໃຫ້ເຫັນຄວາມປີຊາ ສາມາດຂອງພັກເຮົາ ໃນການວາງແນວທາງ ການປ່ຽນແປງໃໝ່ຮອບດ້ານ, ມີຫລັກການຢ່າງຖືກຕ້ອງປະດິດສ້າງ ແລະ ເປັນເຈົ້ານຳພາປະຊາຊົນບັນດາເຜົ່າ ຈັດຕັ້ງປະຕິບັດແນວທາງ ໃຫ້ເກີດຜົນເປັນຈິງ, ເຊິ່ງສາມາດຍາດໄດ້ຜົນສຳເລັດອັນໃຫຍ່ຫລວງຫລາຍ ດ້ານຕະຫລອດ 40 ປີຜ່ານມາ. ຈາກນັ້ນ ທ່ານ ຮອງນາຍົກລັດຖະມົນຕີ ແລະ ບັນດາຜູ້ເຂົ້າຮ່ວມງານ ກໍໄດ້ເຂົ້າຊົມການວາງສະແດງຮູບພາບ ແລະ ປະຫວັດມູນເຊື້ອຂອງ ປະທານ ໄກສອນ ພົມວິຫານ.
ສຳລັບກອງປະຊຸມ ສຳມະນາວິທະຍາສາດໃນຄັ້ງນີ້ ແມ່ນໄດ້ຮັບຟັງການເລົ່າມູນເຊື້ອປະຕິວັດ ແລະ ແບບແຜນການດຳລົງຊີວິດ ຂອງປະທານ ໄກສອນ ພົມວິຫານ ໃນບັນດາຫົວຂໍ້ຕ່າງໆທີ່ກ່ຽວຂ້ອງ ເປັນຕົ້ນ: ປະທານ ໄກສອນ ພົມວິຫານ ນັກຮັກຊາດຜູ້ຍິ່ງໃຫຍ່, ຜູ້ນຳທີ່ປີຊາສາມາດ, ສະຫລາດສ່ອງໃສ ແລະ ສະດຸ້ງໄວຂອງພັກ ແລະ ລັດເຮົາ; ປະທານ ໄກສອນ ພົມວິຫານ ກັບວຽກງານແນວຄິດ ທິດສະດີຂອງພັກ; ຊີວິດ ແລະ ການເຄື່ອນໄຫວປະຕິວັດຂອງປະທານ ໄກສອນ ພົມວິຫານ… ປະທານ ໄກສອນ ພົມວິຫານ ກັບການຊີ້ນຳວຽກງານຊົນເຜົ່າ ຢູ່ແຂວງສະຫວັນນະເຂດ.
ແຫ່ລງຂ່າວ
