ວັນ​ທີ 24 ພະຈິກ 2015 (ກົງ​ກັບ​ຂຶ້ນ 15 ຄ່ຳ ເດືອນ 12) ໄດ້​ຈັດ​ພິທີ​ທາງ​ສາສະໜາ​ແຫ່​ຜາສາດ​ເຜີ້ງ​ຄື​ກັບ​ທຸກໆ​ປີ ສຳລັບ​ປີນີ້​ນຳ​ໂດຍ​ທ່ານ ພັນ​ຄຳ ວິພາ​ວັນ ຮອງ​ນາຍົກລັດຖະມົນຕີ ລັດ​ຖະມົນຕີ​ວ່າການ​ກະຊວງ​ສຶກ​ສາ​ທິການ ແລະ ກີລາ ທ່ານ ​ດຣ. ສິນລະ​ວົງ ຄຸດ​ໄພທູນ ເຈົ້າ​ຄອງ​ນະຄອນ​ຫຼວງ​ວຽງ​ຈັນ ພ້ອມ​ດ້ວຍຂະ​ບວນ​ແຫ່​ແນວ​ໂຮມ​ສູນ​ກາງແນວ​ໂຮມ​ນະຄອນຫຼວງ ແລະ ຂະບວນ​ແຫ່​ທີ່​ມາ​ຈາກ 9 ຕົວ​ເມືອງ ພ້ອມ​ດ້ວຍ​ຂະ​ບວນ​ແຫ່​ຈາກ​ທາງພາກ​ລັດ ພໍ່ຄ້າຊາວ​ຂາຍ ປະຊາຊົນ ນັກ​ທ່ອງ​ທ່ຽວ ທັງ​ພາຍ​ໃນ ແລະ ຕ່າງປະເທດ ​ເຂົ້າ​ຮ່ວມ​ຢ່າງຄຶກຄື້ນ​ມ່ວນຊື່ນ.

ພິທີການ​ແຫ່​ຜາສາດ​ເຜີ້ງ​ເພື່ອຖວາຍ​ແກ່​ພະ​ທາດຫຼວງ ​ເປັນ​ໜຶ່ງໃນ​ປະເພນີ​ຂອງ​ງານ​ບຸນ​ນະ​ມັດສະການ​ພະ​ທາດຫຼວງທີ່​ສືບ​ກັນມາ​ຫຼາຍເຊັ່ນຄົນ​ຈົນ ຄົບຮອບ 449 ປີ ທີ່​ເປັນ​ການສະແດງ​ເຖິງການ​ອະນຸ​ຮັກ​ ຮັກສາຮີດຄອງປະເພນີ​ອັນ​ດີງາມ​ຂອງ​ຊາດ​ເອົາໄວ້ ທັງ​ເປັນ​ການ​ສ້າງ​ຄວາມ​ສາມັກ​ຄີ​ພາຍ​ໃນ​ນະຄອນຫຼວງ ກໍ່​ຄືມວນ​ຊົນ​ໃນ​ທົ່ວ​ປະເທດ ສະເພາະປີ​ນີ້​ ເພື່ອ​ໃຫ້​ມີ​ຄວາມ​ເປັນ​ລະບຽບຮຽບ​ຮ້ອຍ ​ທາງ​ຄະນະ​ບໍ່​ອະນຸຍາດໃຫ້​ເຮັດ​ຜາສາດ​ເຜີ້ງ​ທີ່​ມີ​ລັກ​ສະນະ​ຄ້າຍ​ກັບ​ນາກ ເນື່ອງ​ຈາກເຫັນ​ວ່າ​ບໍ່​ມີ​ຄວາມ​ເໝາະ​ສົມ.

ເພື່ອ​ໃຫ້​ມີ​ຄວາມ​ເປັນ​ລະບຽບ​ຮຽບ​ຮ້ອຍ ແລະ ຖືກຕ້ອງຕາມ​ປະເພນີ​ທີ່​ສືບ​ທອດ​ກັນ​ມາ ໄດ້​ມີ​ການ​ກຳນົດ​ແຫ່​ຈາກ​ວັດ​ສີເມືອງ-ປະຕູ​ໄຊ-ວັດ​ໜອງ​ບອນ ກ່ອນ​ກ້າວ​ສູ່​ເດີ່ນ​ພະທາດ​ດັ່ງກ່າວ ເຊິ່ງ​ປີ​ນີ້​ແມ່ນ​ໄດ້​ຮັບ​ຄວາມ​ສົນໃຈຈາກ​ມວນ​ຊົນ​ທັງ​ພາຍ​ໃນ ແລະ ຕ່າງປະເທດ​ເປັນ​ຢ່າງ​ດີ ​ທີ່​ເຂົ້າຮ່ວມ​ໃນ​ຂະ​ບວນ​ແຫ່​ທ່າມກາງແມ່​ຄ້າ​ຊາວ​ຂາຍ ນັກ​ທ່ອງ​ທ່ຽວ ກອງທັບ​ສື່​ມວນ​ຊົນທັງ​ພາຍ​ໃນ ແລະ ຕ່າງປະເທດ ທີ່​ເຂົ້າ​ຮ່ວມເກັບ​ກຳ​ຂ່າວ ແລະ ຖ່າຍ​ພາບ​ອັນມີ​ຄວາມ​ໝາຍ​ໄວ້.

ແຫ່ລງຂ່າວ