ສຳນັກຂ່າວຕ່າງປະເທດ ລາຍງານໃນວັນທີ 23 ພະຈິກຜ່ານມານີ້ວ່າ ໃນພິທີປິດ ກອງປະຊຸມສຸດຍອດ ຂອງສະມາຄົມບັນດາປະຊາຊາດ ອາຊີຕາເວັນອອກສຽງໃຕ້ ຫລື ອາຊຽນ ຄັ້ງທີ 27 ທີ່ນະຄອນຫລວງກົວລາລຳເປີ ປະເທດມາເລເຊຍ ເມື່ອວັນທີ 22 ພະຈິກຜ່ານມາ ທ່ານ ນາຍົກລັດຖະມົນຕີ ນາຈິບ ຣາຊັກ ແຫ່ງມາເລເຊຍ ໄດ້ສົ່ງມອບຄ້ອນປະທານອາຊຽນ ຊຶ່ງເປັນສັນຍາລັກຂອງການເປັນປະທານ ກຸ່ມປະເທດອາຊຽນ ໃຫ້ແກ່ ທ່ານ ທອງສິງ ທຳມະວົງ ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ເພື່ອຕາງໜ້າໃຫ້ແກ່ລັດຖະບານລາວ ເຂົ້າຮັບໜ້າທີ່ເປັນປະທານອາຊຽນ ຢ່າງເປັນທາງການ.

ທັງນີ້ ປະທານອາຊຽນ ຈະມີການຜັດປ່ຽນກັນເຮັດໜ້າທີ່ ໂດຍບັນດາປະເທດສະມາຊິກ ໃນວາລະ 1 ປີ ຊຶ່ງພາຍໃນວາລະທີ່ ສປປ ລາວ ເຂົ້າຮັບໜ້າທີ່ ເປັນປະທານອາຊຽນ ຕະຫລອດປີ 2016 ທີ່ຈະມາເຖິງນີ້ ສປປ ລາວ ຈະໄດ້ເປັນເຈົ້າພາບ ຈັດກອງປະຊຸມສຸດຍອດອາຊຽນ ຄັ້ງທີ 28 ທີ່ນະຄອນຫລວງວຽງຈັນ ແລະ ບັນດາກອງປະຊຸມປິ່ນອ້ອມໆອີກ.