ຂປລ. ສື່ມວນຊົນຈາກບັນດາປະເທດສະມາຊິກອາຊຽນປະກອບມີ ບຣູໄນ, ອິນໂດເນເຊຍ, ລາວ, ມຽນມາ, ຟີລິບປິນ, ສິງກະໂປ, ໄທ, ຫວຽດນາມ ພ້ອມຮ່ອງກົງສໍາເລັດການເດີນທາງທັດສະນະສຶກສາ ແລະ ແລກປ່ຽນຄວາມຮູ້ທີ່ສໍານັກງານໃຫຍ່ຂອງສະຫະພາບເອີຣົບ ໃນນະຄອນຫລວງບຣຸກແຊນ ປະເທດແບກຊິກ ພາຍຫລັງໃຊ້ເວລາ 4 ວັນຂອງການທັດສະນະສຶກສາ ( 16-19 ພະຈິກ 2015).

ໃນໄລຍະ 4 ວັນນັ້ນ ບັນດາສື່ມວນຊົນໄດ້ມີໂອກາດສໍາຄັນເຂົ້າຢ້ຽມຢາມ ແລະ ພົບປະກັບບັນດາການນໍາພ້ອມເຈົ້າໜ້າທີ່ລະດັບສູງທີ່ສໍານັກງານ the European External Action Service, ສະພາຂອງສະຫະພາບເອີຣົບ ( the Council of the EU, ລັດຖະສະພາເອີຣົບ ( European Parliament ), ນາໂຕ້ (NATO) ແລະ ອື່ນໆ ເຊິ່ງບັນດາສື່ມວນຊົນດັ່ງກ່າວໄດ້ຮັບຟັງການບັນຍາຍ ແລະ ນໍາສະເໜີກ່ຽວກັບສະພາບການຂອງໂລກ, ບົດບາດ ,ນະໂຍບາຍຕ່າງໆທີ່ມີການພົວພັນຕໍ່ບັນດາປະເທດໃນຂົງເຂດອາຊີຕາເວັນອອກສ່ຽງໃຕ້ ລວມເຖິງອາຊີຕາເວັນອອກ. ນອກຈາກນັ້ນ ສື່ມວນຊົນຍັງໄດ້ມີໂອກາດເຂົ້າຮ່ວມກອງປະຊຸມສຳມະນາພາຍໃຕ້ຫົວຂໍ້ສໍາຄັນຕ່າງໆເພື່ອຖອດຖອນບົດຮຽນ ແລະ ຮຽນຮູ້ກ່ຽວກັບວິທີການເຮັດວຽກກ່ຽວກັບບົດບາດຂອງສະຖາບັນຕ່າງໆ ຂອງສະຫະພາບເອີຣົບໄປຄວບຄູ່ກັບການປຶກສາຫາລື ແລະ ແລກປ່ຽນກ່ຽວກັບ ບັນດາອົງປະກອບທີ່ສຳຄັນໃນສາຍພົວພັນສອງຝ່າຍ ລະຫວ່າງອາຊຽນ-ສະຫະພາບເອີຣົບ ແລະ ສະພາບການໃນເວທີສາກົນຕ່າງໆທີ່ມີຄວາມສົນໃຈ.
ແນວໃດກໍດີ ລະຫວ່າງການພົບປະນັ້ນ, ບັນດາການນໍາ ແລະ ເຈົ້າໜ້າທີ່ສະຫະພາບເອີຣົບໄດ້ເປີດເຜີຍວ່າ: ການພົວພັນ ແລະ ການຮ່ວມມືລະຫວ່າງບັນປະເທດສະມາຊິກອາຊຽນ ແລະ ສະຫະພາບເອີຣົບໄດ້ຮັບການພັດທະນາ ແລະ ຂະຫຍາຍຕົວຢ່າງບໍ່ຢຸດຢັ້ງໂດຍສະເພາະດ້ານການພັດທະນາເສດຖະກິດ-ສັງຄົມ, ການຄ້າ, ການລົງທຶນ, ການເມືອງ, ການທ່ອງທ່ຽວ ແລະ ອື່ນໆ ນອກຈາກນັ້ນ ສະຫະພາບເອີຣົບຍັງຢືນຢັນຈະສືບຕໍ່ໃຫ້ການຊ່ວຍເຫລືອບັນດາປະເທດສະມາຊິກອາຊຽນໃນຫລາຍດ້ານເຊັ່ນ: ການປ່ຽນແປ່ງດິນຟ້າອາກາດ, ການຄໍ້າປະກັນສະບຽງອາຫານ, ພັດທະນາການສຶກສາ ແລະ ອື່ນໆ. ຂະນະທີ່ ສະຫະພາບເອີຣົບໄດ້ປະກາດວ່າຈະສືບຕໍ່ໃຫ້ການຊ່ວຍ ລາວເຂົ້າໃນໂຄງການຊ່ວຍເຫລືອໃຫມ່ໂດຍມີມູນຄ່າປະມານ 207 ລ້ານເອີໂຣເພື່ອຊ່ວຍໃຫ້ປະເທດລາວຫລຸດພົ້ນອອກຈາກສະຖານະພາບປະເທດດ້ອຍພັດທະນາໃນປີ 2020 ເຊິ່ງງົບປະມານດັ່ງກ່າວຈະນໍາໃຊ້ເຂົ້າໃນຈັດຕັ້ງປະຕິບັດເປັນເວລາ 7 ປີ (2014-2020) ໃນ 3 ຂົງເຂດບູລິມະສິດຄື:ການຜະລິດກະສິກໍາແບບຍືນຍົງ ແລະ ມີຄວາມປອດໄພດ້ານອາຫານ; ການປັບປຸງລະບົບການສຶກສາ; ສ້າງຄວາມເຂັ້ມແຂງການປົກຄອງທີ່ດີ, ລະບຽບ-ກົດຫມາຍ ແລະ ວຽກງານສິດທິມະນຸດທີ່ກ່ຽວຂ້ອງ

ແຫ່ລງຂ່າວ