ສຳນັກຂ່າວຕ່າງປະເທດ ລາຍງານໃນວັນທີ 22 ພະຈິກຜ່ານມານີ້ວ່າ ຜູ້ນຳ 10 ປະເທດອາຊຽນ ໄດ້ລົງນາມເພື່ອສ້າງຕັ້ງ ປະຊາຄົມເສດຖະກິດອາຊຽນ ຫລື ເອອີຊີ (AEC) ຢ່າງເປັນທາງການແລ້ວ ໃນວັນທີ 22 ພະຈິກ 2015 ທີ່ນະຄອນຫລວງ ກົວລາລຳເປີ ປະເທດມາເລເຊຍ ຊຶ່ງເປັນຜົນສຳເລັດ ຈາກແນວຄິດລິເລີ່ມ ຕັ້ງແຕ່ປີ 2002 ເປັນຕົ້ນມາ.  ການລວມຕົວກັນ ເພື່ອກາຍເປັນປະຊາຄົມເສດຖະກິດດຽວກັນ ຄືດັ່ງກ່າວນີ້ ຈະຊ່ວຍໃນການເສີມສ້າງ ລາຍໄດ້ ແລະ ການຈ້າງງານ ລວມທັງເຮັດໃຫ້ ເສດຖະກິດຂອງອາຊຽນ ເຂັ້ມແຂງຂຶ້ນ ສາມາດຖ່ວງດູນ ກັບມະຫາອຳນາດທາງດ້ານເສດຖະກິດຢູ່ໃນໂລກ.  ທັງນີ້, ການລົງນາມດັ່ງກ່າວ ຈະສົ່ງຜົນ ເຮັດໃຫ້ທົ່ວອາຊຽນ ເປີດປະຕູສູ່ເອອີຊີ ຢ່າງເປັນທາງການ ໃນວັນທີ 31 ທັນວາ 2015 ນີ້.