ຂປລ. ສູນກາງຊາວໜຸ່ມ ປະຊາຊົນ ປະຕິວັດລາວ (ຊປປລາວ) ແລະ ບໍລິສັດ ສຸກປະເສີດ ອອກແບບກໍ່ສ້າງເຄຫາຂົວທາງ ແລະ ຊົນລະປະທານ ຈໍາກັດ ຜູ້ດຽວ ໄດ້ເຊັນສັນຍາໂຄງການກໍ່ສ້າງ ວັງເຍົາວະຊົນ ແລະ ຫໍມູນເຊື້ອຊາວໜຸ່ມໃນມູນຄ່າ 101.838 ຕື້ກີບ ເຊິ່ງ ໄລຍະການກໍ່ສ້າງແມ່ນ 3 ປີ ຈະໃຫ້ສໍາເລັດ. ໜ້າວຽກປະກອບມີ: ສະຖານທີ່ປະດິດສະຖານຮູບປັ້ນ ປະທານ ໄກສອນ ພົມວິຫານ, ຫໍມູນເຊື້ອ1 ຫລັງເປັນອາຄານ 3 ຊັ້ນ, ຂະໜາດ 55X30 ແມັດ, ເຮືອນຮັບແຂກ 1 ຫລັງ ເປັນອາຄານ 2 ຊັ້ນ ຂະໜາດ 50 ຫ້ອງນອນ, ເດີ່ນກິລາໃນຮົ່ມ 1 ຫລັງ, ຮ້ານອາຫານ, ເດີ່ນເຕະບານຫຍ້າທຽມ, ສະຖານທີ່ສອນຂັບລົດໃຫຍ່ປະເພດລົດເບົາ, ບ່ອນຈອດລົດ, ກໍາແພງອ້ອມ, ສະລອຍນໍ້າ ແລະ ອື່ນໆ. ໂຄງການດັ່ງກ່າວ ຈະສ້າງຢູ່ບ້ານດົງໝາກຄາຍ ເມືອງໄຊທານີ ນະຄອນຫລວງວຽງຈັນ ໃນເນື້ອທີ 4 ເຮັກຕາ.
ພິທີ ເຊັນສັນຍາໄດ້ຈັດຂຶ້ນ ໃນວັນທີ 19 ພະຈິກ 2015 ທີ່ສູນກາງຊາວໜຸ່ມ ຊປປ ລາວ ລະຫວ່າງ ທ່ານ ອາລຸນໄຊ ສຸນນະລາດ ຫົວໜ້າຫ້ອງການສູນກາງ ຊປປ ລາວ ແລະ ທ່ານນາງ ວັນສີ ສຸວັນນະແສງ ປະທານບໍລິສັດ ສຸກປະເສີດ ອອກແບບກໍ່ສ້າງເຄຫາຂົວທາງ ແລະ ຊົນລະປະທານ ຈໍາກັດ ຜູ້ດຽວ ໂດຍມີທ່ານ ດຣ.ວິໄລວົງ ບຸດດາຄໍາ ເລຂາຄະນະບໍລິຫານງານສູນກາງ ຊປປ ລາວ, ບັນດາຫົວໜ້າກົມ-ຮອງກົມ, ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມເປັນສັກຂີພິຍານ.
ແຫລ່ງຂ່າວ:
