ຂປລ. ໃນຕອນບ່າຍຂອງວັນທີ 19 ພະຈິກ 2015, ທ່ານ ດຣ. ນາງ ແກ້ວສາຍໃຈ ໄຊຍະສອນ ພັນລະຍາ ທ່ານປະທານປະເທດ ຈູມມາລີ ໄຊຍະສອນ ໄດ້ຕາງໜ້າ ໃຫ້ບັນດາພັນລະຍາການນຳ ພັກ–ລັດ ມອບເຄື່ອງຄອມພິວ ເຕີ ຈຳນວນໜຶ່ງໃຫ້ພາກສ່ວນຕ່າງໆ ທັງສູນກາງ ແລະ ທ້ອງຖິ່ນ ທີ່ຍັງຂາດເຂີນ ນຳໄປໝູນໃຊ້ເຂົ້າໃນວຽກງານຕົວຈິງ ໃຫ້ມີປະສິດທິຜົນ, ໂດຍສະເພາະ ບັນດາຫ້ອງສະໝຸດຂອງໂຮງຮຽນຕ່າງໆ ທີ່ຢູ່ເຂດຫ່າງໄກສອກຫລີກ ແລະ ຍັງຂາດທຶນຮອນ ແລະ ວັດຖຸທັນສະໄໝ. ເຊິ່ງຄອມພິວເຕີທັງໝົດ ແມ່ນການສະໜັບສະໜູນ ຊ່ວຍເຫລືອຈາກບໍລິສັດ ມັງກອນຄຳ.
ສຳລັບບັນດາພາກສ່ວນ ທີ່ໄດ້ຮັບເຄື່ອງຄອມພິວເຕີໃນຄັ້ງນີ້ ປະກອບມີ: ພະແນກສຶກສາທິການ ແລະ ກິລາ ແຂວງບໍລິຄຳໄຊ ຄອມພິວເຕີ 8 ຊຸດ, ໂນດບຸກ 14 ເຄື່ອງ; ພະແນກສຶກສາທິການ ແລະ ກິລາ ແຂວງວຽງຈັນ ຄອມພິວເຕີ 8 ຊຸດ, ໂນດບຸກ 14 ເຄື່ອງ; ພະແນກສຶກສາທິການ ແລະ ກິລາ ແຂວງຊຽງຂວາງ ຄອມພິວເຕີຕັ້ງໂຕະ 2 ເຄື່ອງ, ໂນດບຸກ 4 ເຄື່ອງ, ພະແນກສຶກສາທິການ ແລະ ກິລາ ນະຄອນຫລວງວຽງຈັນ ໂນດບຸກ 10 ເຄື່ອງ; ຫ້ອງການເມືອງເຊໂປນ ຄອມພິວເຕີ 5 ຊຸດ, ໂນດບຸກ 5 ເຄື່ອງ; ຫ້ອງການທະຫານແຂວງ ອຸດົມໄຊ ຄອມພິວເຕີ 2 ຊຸດ, ໂນດບຸກ 3 ເຄື່ອງ; ຫ້ອງການຊາວໜຸ່ມ ເມືອງແມດ ແຂວງວຽງຈັນ ໂນດບຸກ 2 ເຄື່ອງ; ຫ້ອງການສະຖາບັນການຕ່າງປະເທດ ກະຊວງການຕ່າງປະເທດ 2 ເຄື່ອງ ແລະ ຫ້ອງການກອງບັນຊາການທະຫານ ປ້ອງກັນປະທານປະເທດ 10 ເຄື່ອງ.
ໃນໄລຍະຜ່ານມາ ບັນດາພັນລະຍາການນຳ ກໍໄດ້ຮິບໂຮມທຶນສ່ວນຕົວ ແລະ ການສະໝັກໃຈ ຈາກພາກ ສ່ວນທຸລະກິດຈຳນວນໜຶ່ງ ທີ່ຢາກປະກອບສ່ວນຊ່ວຍເຫລືອສັງຄົມ ໂດຍສະເພາະແມ່ນ ອຸປະກອນການຮຽນ, ປຶ້ມແບບຮຽນ, ວາລະສານຕ່າງໆ ລວມທັງເຄື່ອງອຸປະກອນກິລາ ແລະ ອື່ນໆ ເພື່ອປະກອບສ່ວນ ໃຫ້ບັນດາໂຮງຮຽນ ທີ່ຢູ່ເຂດຫ່າງໄກສອກຫລີກ ໃນທົ່ວປະເທດ.
ແຫລ່ງຂ່າວ:
