ສຳນັກຂ່າວໄທຣັດຂອງໄທ ລາຍງານໃນວັນທີ 20 ພະຈິກນີ້ວ່າ ທ່ານ ສູນໄຊ ຄຳນູນເສດ ຜູ້ວ່າການໄຟຟ້າຝ່າຍຜະລິດ ແຫ່ງປະເທດໄທ ໄດ້ເປີດເຜີຍວ່າ ທິດທາງລາຄາ ຄ່າໄຟຟ້າຂອງໄທ ໃນປີໜ້າ ຄາດວ່າຈະຫລຸດລົງ ຕາມການຫລຸດລົງຂອງລາຄາແກັສທຳມະຊາດ ແລະ ລາຄາຖ່ານຫີນ ຊຶ່ງເປັນເຊື້ອໄຟສຳລັບການຜະລິດໄຟຟ້າ ໃນໂຮງງານຜະລິດໄຟຟ້າ ພະລັງງານແກັສ ແລະ ຖ່ານຫີນຂອງໄທ ເຮັດໃຫ້ຕົ້ນທຶນການຜະລິດ ມີທ່າອ່ຽງຫລຸດລົງ.
ແນວໃດກໍຕາມ ທ່ານ ສູນໄຊ ໄດ້ກ່າວວ່າ ຍັງມີປັດໄຈທີ່ຕ້ອງໄດ້ຕິດຕາມອີກ ຄືຄ່າເງິນບາດ ແລະ ຜົນກະທົບຈາກໂຄງການ ພະລັງງານແສງອາທິດ ທີ່ຈະເຂົ້າມາໃນລະບົບເພີ່ມເຕີມ ຊຶ່ງອາດຈະມີຜົນເຮັດໃຫ້ ລາຄາຄ່າໄຟຟ້າ ເພີ່ມຂຶ້ນເລັກໜ້ອຍອີກດ້ວຍ.