ທ່ານ ດຣ. ບຸນປອນ ບຸດຕະນະວົງ ຮອງນາຍົກລັດຖະມົນຕີ ໄດ້ຕ້ອນຮັບຄະນະຊາວໜຸ່ມເດີນທະເລອາຊຽນ-ຍີ່ປຸ່ນ ນຳພາໂດຍທ່ານ ຮິເດກິ ອຸເອມຸລະ ຫົວໜ້າຄະນະບໍລິຫານງານໂຄງການໃນວັນທີ 19 ພະຈິກ 2015 ນີ້ ທີ່ຫ້ອງວ່າການລັດຖະບານນະຄອນຫຼວງວຽງຈັນ.
ໃນໂອກາດດັ່ງກ່າວນີ້ ທ່ານ ດຣ. ບຸນປອນ ບຸດຕະນະວົງ ກໍໄດ້ສະແດງຄວາມຕ້ອນຮັບ ແລະ ຊົມເຊີຍຕໍ່ຄະນະຊາວໜຸ່ມເດີນທະເລອາຊຽນ- ຍີ່ປຸ່ນ ທີ່ໄດ້ເດີນທາງມາຢ້ຽມ ຢາມ ສປປ ລາວ ແຕ່ວັນທີ 18-20 ພະຈິກ 2015 ນີ້ ອັນໄດ້ເປັນການສະແດງອອກທາງດ້ານການແລກປ່ຽນວັດທະນະທຳຂອງບັນດາປະເທດສະມາຊິກອາຊຽນ ແລະ ຍີ່ປຸ່ນ, ຫວັງວ່າການເດີນທາງມາຢ້ຽມຢາມ ສປປ ລາວ ໃນຄັ້ງນີ້ບັນດາຊາວໜຸ່ມຈາກປະເທດອາຊຽນ ແລະ ຍີ່ປຸ່ນ ຈະໄດ້ນຳເອົາວັດທະນະທຳຂະໜົບທຳນຽມ, ປະເພນີຂອງລາວໄປເຜີຍແຜ່ຕໍ່ບັນດາປະເທດອາຊຽນ ແລະ ຍີ່ປຸ່ນ ເພື່ອໃຫ້ 9 ປະເທດອາຊຽນ ແລະ ຍີ່ປຸ່ນ ໄດ້ຮັບຮູ້ເພາະພວກທ່ານໄດ້ເດີນທາງໄປສຳຜັດ ແລະ ຮ່ວມພັກເຊົາກັບປະຊາຊົນລາວ ຕະຫຼອດໄລຍະທີ່ພວກທ່ານມາຢ້ຽມ ຢາມ ສປປ ລາວ ຂອງພວກຂ້າພະເຈົ້າ.
ໂຄງການຊາວໜຸ່ມເດີນທະເລອາຊຽນ-ຍີ່ປຸ່ນ ເປັນໂຄງການສະໜັບສະໜູນງົບປະມານໂດຍລັດຖະບານປະເທດ ຍີ່ປຸ່ນ ພາຍໃຕ້ການຮ່ວມມືຂອງບັນດາປະເທດ ສະມາຊິກອາຊຽນ, ໂຄງການຊາວໜຸ່ມເດີນທະເລອາຊຽນ-ຍີ່ປຸ່ນ ໄດ້ເລີ່ມດຳເນີນໂຄງການແຕ່ປີ 1974 ເປັນຕົ້ນມາ ເຊີ່ງເບື້ອງຕົ້ນມີພຽງ 5 ປະເທດອາຊຽນ ແລະ ຍີ່ປຸ່ນ ເປັນຜູ້ສ້າງຂຶ້ນ ຊຶ່ງ ປະກອບມີຍີ່ປຸ່ນ, ອິນໂດເນເຊຍ, ມາເລເຊຍ, ຟີລິບປິນ, ສິງກະໂປ ແລະ ໄທ.
ສຳລັບ ສປປ ລາວ ໄດ້ ເຂົ້າຮ່ວມສັງເກດການໃນປີ 1997 ແລະ ປີ 1998 ກໍໄດ້ເຂົ້າຮ່ວມໂຄງການຢ່າງເປັນທາງການ, ຈາກນັ້ນລັດຖະບານແຫ່ງ ສປປ ລາວ ກໍໄດ້ ມອບໃຫ້ສູນກາງຊາວໜຸ່ມປະຊາຊົນປະຕິວັດລາວ ເປັນຜູ້ຈັດຕັ້ງປະຕິບັດໂດຍກົງຮ່ວມກັບບັນດາປະເທດອາຊຽນ-ຍີ່ປຸ່ນ, ແຕ່ລະປີສູນກາງຊາວໜຸ່ມເຂົ້າຮ່ວມແຕ່ປີ 1998- 2002 ຊາວໜຸ່ມລາວຈຳນວນປີລະ 33 ຄົນເຂົ້າຮ່ວມ, ຕໍ່ມາເລີ່ມແຕ່ປີ 2003-2015 ແມ່ນໄດ້ສົ່ງຊາວໜຸ່ມເຂົ້າຮ່ວມປີລະ 29 ຄົນ ລວມຫົວໜ້າຄະນະ, ມາຮອດປະຈຸບັນ ມີຊາວໜຸ່ມລາວຈຳນວນ 400 ກວ່າຄົນທີ່ເຄີຍໄດ້ເຂົ້າຮ່ວມໂຄງການແລ້ວ.
ໃນວັນດຽວກັນນີ້ ຄະນະດັ່ງກ່າວ ກໍໄດ້ເຂົ້າຢ້ຽມຄຳນັບ ທ່ານ ດຣ. ວິໄລວົງ ບຸດດາຄຳ ເລຂາຄະນະບໍລິຫານງານສູນກາງຊາວໜຸ່ມ ປປ ລາວ ເຊັ່ນດຽວກັນ.
ຂ່າວຈາກ: ໜັງສືພິມປະຊາຊົນ