ພິທີສະເຫຼີມສະຫຼອງສາຍພົວພັນການທູດ ລາວ-ຍີ່ປຸ່ນ ຄົບຮອບ 60 ປີ ວັນຄ້າຍວັນປະສູດຂອງສົມເດັດພະເຈົ້າຈັກກະພັດຍີ່ປຸ່ນ ຄົບຮອບ 82 ພັນສາ ແລະ ງານລ້ຽງອຳລາຂອງທ່ານທູດຍີ່ປຸ່ນ ປະຈຳລາວ ຈັດຂຶ້ນວັນທີ 18 ພະຈິກ 2015 ທີ່ໂຮງແຮມລາວພລາຊາ ນະຄອນຫຼວງວຽງຈັນ ໂດຍມີທ່ານ ທອງລຸນ ສີສຸລິດ ຮອງນາຍົກລັດຖະມົນຕີ ລັດຖະມົນຕີວ່າການກະຊວງການຕ່າງປະເທດ ທ່ານ ຮິໂຣຢຸກິ ຄິຊິໂນະ ເອກອັກຄະລາຊະທູດຍີ່ປຸ່ນ ປະຈຳລາວ ມີລັດຖະມົນຕີວ່າການຊ່ວຍວ່າການ ແລະ ພະນັກງານກ່ຽວຂ້ອງເຂົ້າຮ່ວມ.
ທ່ານ ຮິໂຣຢຸກິ ຄິຊິໂນະ ທູດຍີ່ປຸ່ນປະຈຳລາວ ໄດ້ກ່າວວ່າ: ຕະຫຼອດໄລຍະທີ່ມາປະຕິບັດໜ້າທີ່ທາງການທູດຢູ່ລາວ ໄດ້ເຫັນວ່າສາຍພົວພັນຮ່ວມມືມິດຕະພາບລະຫວ່າງ ລາວ-ຍີ່ປຸ່ນ ນັບມື້ນັບແໜ້ນແຟ້ນຍິ່ງຂຶ້ນ ສະແດງອອກໃນການໄປມາຫາສູ່ຂອງການນຳລະຫວ່າງສອງປະເທດ ມີຄວາມສະດວກສະບາຍ ພ້ອມນີ້ ຍັງໄດ້ຮ່ວມມືຊ່ວຍເຫຼືອເຊິ່ງກັນ ແລະ ກັນ ເປັນຕົ້ນແມ່ນ ການຮ່ວມມືທາງດ້ານທຸລະກິດ ເຊັ່ນ: ບັນດາໂຮງຈັກໂຮງງານຂອງຍີ່ປຸ່ນ ໄດ້ຮັບການສ້າງຕັ້ງຂຶ້ນຢູ່ລາວ ຈຳນວນຫຼາຍ 10 ແຫ່ງ ໂຄງການສ້າງເຂື່ອນໄຟຟ້າ ກໍ່ມີການຂະຫຍາຍຕົວ ຈຳນວນບໍລິສັດຍີ່ປຸ່ນມາລົງທຶນຢູ່ລາວໄລຍະ 3 ປີຜ່ານມາ ແມ່ນເພີ່ມຂຶ້ນເປັນສອງເທົ່າ ການລົງທຶນຂອງບໍລິສັດຍີ່ປຸ່ນສ່ວນຫຼາຍ ແມ່ນການລົງທຶນການຜະລິດເປັນສິນຄ້າສົ່ງອອກ ປະກອບສ່ວນເຂົ້າໃນເສດຖະກິດຂອງທ້ອງຖິ່ນ ດ້ວຍການສ້າງວຽກເຮັດງານທຳ ຍົກສູງຄວາມສາມາດໃຫ້ແກ່ແຮງງານລາວ ແລະ ອື່ນໆ.
ຕອນທ້າຍຂອງພິທີ ທ່ານກໍ່ໄດ້ກ່າວຄຳອຳລາໃນໂອກາດທີ່ສຳເລັດໜ້າທີ່ ປະຕິບັດການທູດຢູ່ລາວວ່າ: ຂ້າພະເຈົ້າຈະເດີນທາງກັບໄປປະເທດ ພ້ອມກັບຄວາມຊົງຈຳທີ່ພິເສດ ແລະ ມີຄ່າ ໂດຍສະເພາະແມ່ນການອຳນວຍຄວາມສະດວກ ໃນການປະຕິບັດໜ້າທີ່ວຽກງານ ແລະ ໃຫ້ການຮ່ວມມືໃນດ້ານຕ່າງໆ ແລະ ຈະສືບຕໍ່ໃຫ້ການຊ່ວຍເຫຼືອລາວ ໃນການພັດທະນາເສດຖະກິດ-ສັງຄົມ ໂດຍຜ່ານການຊ່ວຍເຫຼືອດ້ານການພັດທະນາໃນຫຼາຍຂົງເຂດ ເປັນຕົ້ນແມ່ນ ການພັດທະນາພື້ນຖານໂຄງລ່າງ ການສຶກສາ ສາທາລະນະສຸກ ແລະ ອື່ນໆ.
ແຫ່ລງຂ່າວ
