ຂປລ. ວົງ​ດົນຕີ ຊີມ​ໂຟນີລາວ ກຽມພ້ອມ​ແລ້ວທີ່​ຈະ​ສະ​ແດງ​ ໃນ​ງານສະຖາປະນາ ສປປ ລາວ ຄົບຮອບ 40 ປີ ​ເຊິ່ງຈະ​ສະ​ແດງ ​ໃນ​ຄ່ຳ​ຄື່ນ​ຂອງ​ວັນ​ທີ 30 ພະຈິກ 2015 ທີ່ຫໍ​ວັດທະນະທຳ​ແຫ່ງ​ຊາດ.
ທ່ານ ດຣ. ສົມ​ຈິດ ​ໄຊ​ສຸວັນ ຮອງ​ຫົວໜ້າກົມ​ສີ​ລະ​ປະການສະ​ແດງ, ຫົວໜ້າຄະນະ​ຮັບຜິດ​ຊອບວົງ​ດົນຕີ  ຊີ​ມໂຟນີລາວ ​​ເປີດເຜີຍ​ໃຫ້​ຮູ້​ວ່າ: ວົງ​ດ​ົນຕີຊີ​ນ​ໂຟນີ ​ໄດ້​ເລີ່ມ​ທຳ​ການ​ຝຶກ​ຊ້ອມ​ມາ​ແຕ່​ ຕົ້ນ​ເດືອນຕຸລາ ທີ່​ຜ່ານ​ມາ ​ໂດຍ​ມີ​ນັກ​ດົນຕີ ​ແລະ ນັກ​ຮອງ​ປະສານ​ສຽງທັງ​ໝົດ ຫລາຍ​ກວ່າ 200 ຄົນ ​ແລະ ​ມາ​ຈາກ​ 3 ພາກ​ສ່ວນ​​ໃຫຍ່ ຄື​: ​ກະຊວງ​ຖະ​ແຫລ​ງຂ່າວ, ວັດທະນະທຳ ​ແລະ ທ່ອງ​ທຽວ, ກະຊວງ​ປ້ອງ​ກັນ​ປະ​ເທດ, ກະຊວງ​ປ້ອງ​ກັນ​ຄວາ​ມ ສະຫງົບ, ນັກ​ດົນຕີ​ອິດສະລະ​ ​ແລະ ນັກຮຽນອີກຈຳນວນໜຶ່ງ.  ​ບົດ​ເພງ​ທີ່​ຈະນຳ​ມາສະ​ແດງ​ໃນ​ຄັ້ງ​ນີ້​ ປະກອບ​ມີ 7 ບົດ​ເພງ ຄື:​ ເພງສັນລະ​ເສີນ​ວັນ​ຊາດ 2 ທັນວາ, ສັນລະ​ເສີນ​ພັກ, ດິນ​ແດນ​ແຫ່ງ​ອິດສະລະ, ​ເມືອງ​ລາວ​ໃໝ່ຢັງ​ຍືນ, ​ເຕີ້ຍ​ລ່ອງ​ຂອງ, ຊົມ​ເຊີຍ​ໄຊຊະນະ​ນ້ຳ​ບາກ ​ແລະ ​ໂມ​ສາດ.

ຈຳນວນ​​ບົດ​ເພງ​ດັ່ງກ່າວ ​ແມ່ນ​ໄດ້​ສ່ອງ​​ແສງ​ໃຫ້​​ເຫັນເຖິງຄວາມ​ເປ​ັນ​ລາວ ພາຍ​ໃຕ້ກາ​ນນຳພາ​ ອັນປີ​ຊາ​ສາມາດ ​ແລະ ​ສະຫລາດ​ສ່ອງ​ໃສ​ຂອງ​ພັກ, ທັງ​​ເປັນ​ການປຸກ​ລະດົມ ​ຄົນ​ລາວ​ໃຫ້​ຮັກ​ຊາດ​ຮັກ​ບ້ານ​ເກີດ​ເມືອງ​ນອນ, ທຸກ​​ເພດ ​ແລະ ຊົນ​ເຜົ່າ​ມີ​ຄວາມ​ເດັດດ່ຽວໜຽວ​ແໜ້ນຕໍ່​ສູ້ບໍ່ຍອມ​ຈຳນົນ ​ເພື່ອປົດ​ປ່ອຍ​ຊາດໃນ​​ເມື່ອ​ກ່ອນ ຈົນ​ກາຍ​ມາ​ເປັນສາລະ​ນະ​ລັດ ປະຊາທິປະ​ໄຕ ປະຊາຊົນ​ລາວ ຄື​ດັ່ງ​ທຸກ​ວັນ​ນີ້.

ແຫລ່ງຂ່າວ: