ເມືອງຄູນຄຳ ມີເນື້ອທີ່ນາປີ ທັງໝົດ6.400 ເຮັກຕາ ຜ່ານການຈັດຕັ້ງປະຕິບັດໃນສົກປີ 2015 ປັກດຳຕົວຈິງໄດ້ 4.160 ກວ່າເຮັກຕາ ເທົ່າກັບ 85% ຂອງເນື້ອທີ່ທັງໝົດ ເນື່ອງຈາກສະພາບດິນຟ້າອາກາດ ບໍ່ເອື້ອອຳນວຍໃຫ້ ຈຶ່ງເປັນເຫດເຮັດໃຫ້ການຜະລິດເຂົ້ານາປີ ຂອງປີນີ້ຫລຸດແຜນການ.
ທ່ານ ເພັດມະນີ ກອງມະນີ ຫົວໜ້າຫ້ອງການກະສິກຳ ແລະປ່າໄມ້ ເມືອງຄູນຄຳ ແຂວງຄຳມ່ວນ ລາຍງານໃຫ້ຮູ້ວ່າ: ການປັກດຳເຂົ້ານາປີ ສົກ 2015 ຂອງກະສິກອນ ເມືອງຄູນຄຳ ແມ່ນປະຕິບັດໄດ້ພຽງແຕ່ 85% ຂອງເນື້ອທີ່ ທີ່ທຳການຜະລິດໃນແຜນການ ຍ້ອນສະພາບດິນຟ້າອາກາດ ບໍ່ເອື້ອອຳນວຍຄວາມສະດວກ ສາມາດປະຕິບັດຕົວຈິງໄດ້ 4.160 ເຮັກຕາ ໃນນີ້ແມ່ນຖືກໄພນ້ຳຖ້ວມເສຍຫາຍ 371 ກວ່າເຮັກຕາ ຍັງເຫລືອເນື້ອທີ່ເກັບກ່ຽວຕົວຈິງມີ 3.789 ເຮັກຕາ. ມາຮອດປະຈຸບັນ ແມ່ນໄດ້ສຳເລັດການເກັບກ່ຽວແລ້ວ 100% ສະເລ່ຍສະມັດຕະພາບ 4 ໂຕນຕໍ່ເຮັກຕາ ສະເລ່ຍຜົນຜະລິດ 15.156 ໂຕນ. ສຳລັບ ການຜະລິດໃນລະດູແລ້ງ ຂອງສົກ2015–2016 ການຜະລິດເຂົ້ານາແຊງ ທົ່ວເມືອງມີເນື້ອທີ່ທັງໝົດ 860 ເຮັກຕາ ຊຶ່ງປະຈຸບັນນີ້ ແມ່ນຢູ່ໃນໄລຍະ ການສ້ອມແປງ ຄອງຊົນລະປະທານ ເຊິ່ງປະຕິບັດໄດ້ແລ້ວ 70% ໃນ 9 ໂຄງການ ຖ້າສ້ອມແປງຄອງຊົນ ລະປະທານສຳເລັດ 100% ກໍ່ຈະສາມາດບັນລຸ ຕາມເນື້ອທີ່ ທີ່ແຜນການວາງໄວ້. ນອກຈາກນີ້ ຍັງມີການປູກພືດເປັນສິນຄ້າ ຈຳນວນ 1.145 ເຮັກຕາ ເປັນຕົ້ນແມ່ນ ຢາສູບ, ສາລີ ແລະພືດອື່ນໆ ແລະ ອະນາຄົດເມືອງຄູນຄຳ ຍັງຈະສ້າງຊົນລະປະທານ ໂດຍນຳໃຊ້ນ້ຳທີ່ຢູ່ໃຕ້ເຂື່ອນໄຟຟ້ ານ້ຳເທີນ-ຫີນບູນ (ແບບນໍ້າໄຫລເຂົ້າເອງ) ຊຶ່ງສາມາດຮອງຮັບ ໃນເນື້ອທີ່ ທຳການຜະລິດ ໄດ້ເຖິງ 3.000 ເຮັກຕາ.
ແຫລ່ງຂ່າວ:
