ສຳນັກຂ່າວຕ່າງປະເທດ ລາຍງານໃນວັນທີ 19 ພະຈິກນີ້ວ່າ ທ່ານ ບາຊາ ອັນ-ອັດຊາດ ປະທານາທິບໍດີຊີຣີ ໄດ້ໃຫ້ສຳພາດ ຜ່ານສື່ມວນຊົນ ຫລ້າສຸດໃນວັນທີ 18 ພະຈິກຜ່ານມາວ່າ ປະເທດຊີຣີ ບໍ່ແມ່ນແຫລ່ງກຳເນີດກຸ່ມລັດອິດສະລາມ ຫລື ໄອເອັສ ແຕ່ວ່ານັກຮົບເຫລົ່ານີ້ ເກີດຂຶ້ນຈາກນະໂຍບາຍ ຂອງໂລກຕາເວັນຕົກ ທີ່ສະໜັບສະໜູນ ການກໍ່ການຮ້າຍໃນຫລາຍໆທາງ ໂດຍທ່ານໄດ້ຢືນຢັນວ່າ ກຸ່ມນັກຮົບໄອເອັສ ໄດ້ເຂົ້າມາຝຶກແອບໃນຊີຣີ ແລ້ວອອກໄປກໍ່ເຫດສັງຫານໝູ່ ຢູ່ນະຄອນຫລວງປາຣີ ແລະ ສະຖານທີ່ອື່ນໆນັ້ນ ແມ່ນໄດ້ຮັບການສະໜັບສະໜູນ ດ້ວຍນະໂຍບາຍຂອງຊາດຕາເວັນຕົກ.
ທ່ານ ອັດຊາດ ເວົ້າວ່າ ” ກຸ່ມໄອເອັສ ບໍ່ໄດ້ເລີ່ມຕົ້ນໃນຊີຣີ ແຕ່ເລີ່ມຕົ້ນໃນອີຣັກ ແລະ ເກີດຂຶ້ນກ່ອນທີ່ຈະມີສົງຄາມ ໃນອັບການິສະຖານ “ ແລະ ຍັງລະບຸອີກວ່າ ເວລາສຳລັບການຂ້າມຜ່ານ ເພື່ອນຳໄປສູ່ການເລືອກຕັ້ງໃນຊີຣີນັ້ນ ຈະບໍ່ສາມາດເກີດຂຶ້ນໄດ້ ຕາບໃດທີ່ດິນແດນບາງສ່ວນຂອງຊີຣີ ຍັງຖືກຍຶດຄອງໂດຍ ກຸ່ມກໍ່ການຮ້າຍ.