ຂປລ. ອີງຕາມແຫລງຂ່າວຈາກ ສະພາແຫ່ງຊາດ ກອງປະຊຸມ ຄະນະປະຈຳສະພາແຫ່ງຊາດ ປະຈຳເດືອນພະຈິກ ໄດ້ຈັດຂຶ້ນໃນວັນທີ 18-19 ພະຈິກ 2015 ທີ່ຫ້ອງປະຊຸມຫ້ອງວ່າການ ສະພາແຫ່ງຊາດ ພາຍໃຕ້ການເປັນ ປະທານຂອງ ທ່ານ ນາງ ປານີ ຢາທໍ່ຕູ້ ປະທານຄະນະປະຈຳ, ຮອງປະທານ ກຳມະການຄະນະປະຈຳ ພ້ອມດ້ວຍ ພາກສ່ວນກ່ຽວຂ້ອງເຂົ້າຮ່ວມ.
ກອງປະຊຸມ ໄດ້ຮັບຟັງບົດລາຍງານ ກ່ຽວກັບການກະກຽມ ກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດ ຊຸດທີ VII, ການ ກະກຽມ ກົດໝາຍຕ່າງໆ, ກະກຽມເອກະສານຮັບໃຊ້ ໃຫ້ແກ່ການເລືອກຕັ້ງສະພາແຫ່ງຊາດ ຊຸດທີ VIII ແລະ ການສ້າງຕັ້ງສະພາ ປະຊາຊົນທ້ອງຖິ່ນ, ລາຍງານຄືນບາງມາດຕາ ຂອງຮ່າງລັດຖະບັນຍັດ ວ່າດ້ວຍພົນລະເມືອງກິດຕິມະສັກ. ພ້ອມທັງ ພິຈາລະນາການໃຫ້ສັດຕະຍາບັນ ວ່າດ້ວຍການເຄື່ອນຍ້າຍບຸກຄົນ ວິຊາຊີບ/ແຮງງານສີມືອາຊຽນ (MNP) ແລະ ການຍົກສະຖານະຫ້ອງການ ຕິດຕາມກວດກາສະ ພາບ ເສດຖະກິດມະພາກ ອາຊຽນ+3 ໃຫ້ເປັນອົງການຈັດຕັ້ງສາກົນ (AMRO) ຮັບຮອງເອົາຂໍ້ຕົກລົງ ວ່າດ້ວຍມາດຕະຖານ ການກວດສອບແຫ່ງລັດ ແລະ ຂໍການພິຈາລະນາ ເພື່ອໃຫ້ສັດຕະຍາບັນແກ່ ສັນຍາວ່າດ້ວຍການສ້າງຕັ້ງ ທະນາຄານລົງທຶນພື້ນຖານໂຄງລ່າງອາຊີ.
ນອກນັ້ນ ກອງປະຊຸມຍັງໄດ້ສະເໜີ ຂໍອະນຸມັດທາງດ້ານຫລັກການ ໃນການພັດທະນາໂຄງການນ້ຳອູ ໄລ ຍະ 2 ການຕົກລົງກ່ຽວກັບໂຄງການ ເຂື່ອນໄຟຟ້າດອນສະໂຮງ, ໂຄງການເຂື່ອນໄຟຟ້ານ້ຳຕົກ ນ້ຳກົງ 2 ແລະ ການປັນປ່ຽນທີ່ດິນປ່າສະຫງວນ ເຂົ້າໃນການພັດທະນາໂຄງການ ເຂື່ອນໄຟຟ້ານ້ຳເທີນ 1 ແລະ ການຂໍຍົກເວັ້ນຄ່າທຳນຽມ ຈົດທະບຽນນິຕິກຳການນຳໃຊ້ດິນລັດ ຂອງໂຄງການສາຍສົ່ງໄຟຟ້າແຮງສູງ 230 ກິໂລໂວນ ພາກເໜືອ ແລະ ຄ່າທຳນຽມຕ່າງໆ ທີ່ກ່ຽວຂ້ອງແລວສາຍສົ່ງ ຜ່ານປ່າປ້ອງກັນແຫ່ງຊາດ ສຳລັບໂຄງການກໍ່ສ້າງສາຍສົ່ງ 230 ກິໂລໂວນ ແຕ່ທ່າວຽງຫາຫລັກ 20.
ແຫລ່ງຂ່າວ:
