ໃນວັນ​ທີ 16-17 ພະຈິກນີ້, ກະຊວງແຮງງານ ແລະ ສະຫວັດດີການສັງຄົມ(ຮສສ), ໄດ້ຈັດກອງປະຊຸມສໍາມະນາການເຊື່ອມໂຍງບົດບາດຍິງ-ຊາຍເຂົ້າໃນວຽກງານແຮງງານ ແລະ ສະຫວັດ ດີການສັງຄົມຂຶ້ນທີ່ທ່າ​ລາດ, ແຂວງວຽງຈັນ ພາຍໃຕ້ການເປັນປະທານຂອງທ່ານຫົວໜ້າຫ້ອງ ການກະຊວງດັ່ງ​ກ່າວ, ​ໂດຍ​ມີນັກ​ສຳ​ມະ​ນາ​ກອນພາຍ​ໃນ​ກະຊວງ​ເຂົ້າ​ຮ່ວມ​ເປັນ​ຈຳນວນ​ຫລາຍເພື່ອ​ແນ​ໃສ່ສ້າງຄວາມຮັບຮູ້ ແລະ ເຂົ້າໃຈຂອງຜູ້ບໍລິຫານວຽກງານ ຮສສ, ກຽ່ວກັບການເຊື່ອມສານບົດບາດຍິງ-ຊາຍເຂົ້າໃນວຽກງານແຮງງານ ແລະ ສະຫວັດດີການສັງຄົມ ແລະ ນຳເອົາບົດຮຽນດັ່ງກ່າວໄປຜັນຂະຫຍາຍເຂົ້າໃນວຽກງານຂອງຕົນໃຫ້ມີປະສິດທິຜົນສູງເຊັ່ນ:ຮ່າງວິໃສທັດຮອດປີ 2030, ແຜນຍຸດທະສາດແຫ່ງຊາດ

ເພື່ອຄວາມສະເໝີພາບຍິງ-ຊາຍ 5 ປີຄັ້ງທີ III (2016-2020); ຮ່າງບົດລາຍງານແຫ່ງຊາດສະບັບປະຈຳໄລຍະທີ 8 ແລະ 9ກ່ຽວກັບການ ຈັດຕັ້ງສົນທິສັນຍາ ວ່າດ້ວຍການລຶບລ້າງທຸກຮູບການຈຳແນກຕໍ່ແມ່ຍິງ ໃນ ສປປ ລາວ; ສະເໜີແຜນດຳເນີນງານແຫ່ງຊາດກຽ່ວກັບການປ້ອງກັນ ແລະ ລຶບລ້າງການໃຊ້ຄວາມຮຸນແຮງຕໍ່ແມ່ຍິງ 2014-2020 ທີ່ຕິພັນ ກັບຂະແໜງ ຮສສ; ສະເໜີແຜນດຳເນີນງານແຫ່ງຊາດວຽກແມ່ ແລະ ເດັກ 2016-2020 ທີ່ຕິດພັນກັບຂະແໜງ ຮສສ; ຂໍ້ສະເໜີແນະຂອງສະຫະປະຊາຊາດກຽ່ວກັບການ ຈັດຕັ້ງປະຕິບັດສົນທິສັນຍາວ່າດ້ວຍສິດທິເດັກ ແລະ ອະນຸສັນຍາເພີ່ມເຕີມສອງສະບັບທີ່​ຕິດພັນກັບຂະແໜງ ຮສສ; ສະເໜີກົງຈັກການຈັດຕັ້ງ ແລະ ການເຄື່ອນໄຫວວຽກງານສົ່ງເສີມຄວາມກ້າວໜ້າຂອງແມ່ຍິງ ແລະ ເດັກ ຂອງພະແນກ ຮສສ ແຂວງ ແລະ ວຽກງານ ອື່ນໆທີ່ຈະ​ໄດ້ພວມ​ກັນຈັດຕັ້ງປະຕິບັດໃຫ້​ມີ​ປະສິດທິ​ຜົນ​ດີຂຶ້ນ​ກວ່າ​​ເກົ່າ.