ແບ່ງປັນ​ຄວາ​ມຝັນ​ກັບ SCG (SCG Sharing the Dream 2015) ​ເຊິ່ງ​ເປັນ​ ໂຄງການ​ຕໍ່​ເນື່ອງ​ໃນ​ການຊ່ວຍ​ເຫຼືອນ້ອງ​ນັກຮຽນ​ທີ່​ຕັ້ງ​ໃຈ​ຮ່ຳຮຽນ​, ຮຽນ​ເກັ່ງ ​ແລະ ກະຕັນຍູ, ຮູ້ຈັກຊ່ວຍ​ເຫຼືອ​ພໍ່​ແມ່ ບໍ່​ວ່າ​ຈະ​ເປັນທາງ​ດ້ານ​ວຽກ​ເຮືອນ, ຊ່ວຍ​ທຳ​ມາ​ຫາ​ກິນ​ ​ແລະ ຮູ້ຈັກ​ຊ່ວຍ​ເຫຼືອ​ສັງຄົມ, ປີນີ້​ກໍ​ເປັນ​ປີທີ 4 ຂອງ​ໂຄງການດັ່ງ​ກ່າວ,​​ ໂດຍ​ໄດ້​ຮັບ​ການ​ຮ່ວມ​ມື​ຈາກ ພະ​ແນ​ກສຶກສາ​ທິການ ​ແລະ ກິລາ ນະຄອນຫຼວງ​ວຽງ​ຈັນ, ພະ​​ແນ​ກ ສຶກສາ​ທິການ ​ແລະ ກິລາ​ ​ແຂວງ​ຄຳ​ມ່ວນ ແລະ ສະມາຄົມຮ່ວມນ້ຳໃຈກັບເດັກນ້ອຍລາວ (ALC) ​ແລະ ສຳລັບ​ປີ​ນີ້​ຢູ່ ​ນະຄອນຫຼວງ​ວຽງ​ຈັນ ​ໄດ້​ແຈກ​ຍ້າຍ​​ແບບ​ຟ້ອມ​ໃຫ້ 40 ໂຮງຮຽນ​​ໃນ 9 ຕົວ​ເມືອງ ​ແລະ ມີ​ນ້ອງ​ນັກຮຽນ​ສົ່ງ​ບົດ​ຄວາມ​ຊີວິດ​ ​ແລະ ການ​ຮຽນຂອງ​ຕົນ​ໃຫ້​ກັບ​ໂຄງການ “​ແບ່ງປັນ​ຄວາມ​ຝັນ​ກັບ” SCG 471 ບົດ, ​ແລະ ​ແຂວງ ຄຳ​ມ່ວນ ​ແມ່ນ​ໄດ້​ແຈກ​ຍ້າຍ​ 19 ​ໂຮງຮຽນ​ໃນ 3 ຕົວ​ເມືອງ, ​ໄດ້​ມີ​ນ້ອງ​ນັກຮຽນ​ສົ່ງ​ບົດ​ຄວາມ​​ໃຫ້​ກັບ​ໂຄງການຫຼາຍ​ເຖິງ 442 ທືນ. ສຳລັບ​ພິທີ​ມອບ​ທືນຈະ​ໄດ້​ຈັດ​ຂື້ນ​ໃນ​ວັນ​ທີ 9 ທັນວາ​ທີ່​ຈະ​ມາ​ເຖິງ​ນີ້, ຢູ່ນະຄອນຫຼວງວຽງຈັນ ຈະ​ໄດ້​ຮັບ 150 ທຶນ ແລະ ແຂວງຄຳມ່ວນອີກຈຳນວນ 80 ທຶນລວມທັງໝົດ 230 ທຶນ, ເຊິ່ງເພີ່ມຈາກມີທີ່ຜ່ານມາ 30 ທຶນ.

ໃນ​ຕົ້ນ​ເດືອນພະຈິກ​ນີ້, ທາງ​ຄະນະ​ກຳມະການ ​​ໄດ້​ລົງ​ຢ້ຽມຢາມ​ນ້ອງໆ​ນັກຮຽນ​ທີ່​​ໄດ້​ຮັບ​ການ​ຂັດ​ເລືອກ​ເຂົ້າ​ຊິງ​ທຶນ​ຈາກ​ໂຄງການ  “ແບ່ງປັນຄວາມຝັນ” ກັບ SCG ຢູ່​ນະ​ຄອນ​ຫຼວງ​ວຽງ​ຈັນ ນຳໂດຍທ່ານ ພອນ​ສະ​ເຫຼີ​ມ ຂຸດ​ທະ​ກະ​ພັນ ​ຜູ້​ບໍລິຫານ SCG (ຜູ້ອຳນວຍການ ບໍລິສັດ ​ເອັດ​ສຊີ​ຈີ ​ເທຣດດີ້​ງລາວ ຈຳກັດ)

ນາງ ​ແສງ​ຈັນ ​ໄຊ​ຍະ​ທຳ​ມະ​ວົງ ອາຍຸ 16 ປີຮຽນຊັ້ນ ມໍ6/3 ຢູ່ໂຮງຮຽນ ມ​.ສ ນາຊາຍ​ທອງ ນະຄອນຫລວງ​ວຽງ​ຈັນ ​ໄດ້ຂຽນບົດຄວາມຮູ້ສຶກ ແລະ ຊີວິດຂອງຕົນວ່າ: ປັດຈຸບັນນ້ອງ​ຢູ່​ກັບ​ແມ່ ​ເພາະ​ພໍ່​ໄດ້​ເສຍ​ຊີວິດ​ໄປ​ໃນ​ປີ 2013 ​ຜ່ານ​ມາ, ຄອບຄົວ​ນ້ອງ​ມີ 4 ຄົນ, ສ່ວນ​ນ້ອງ​ເອງ​ເປັນ​ລູກ​ຜູ້​ທີ 2 ມີ​ເອື້ອຍ ​ແລະ ນ້ອງຊາຍຄົນ​ໜື່ງ, ​ເວລາ​ຫວ່າງ​ຂອງ​ນ້ອງ​ຫຼັງ​ຈາກ​ກັບ​ມາ​ແຕ່​ໂຮງຮຽນ ນ້ອງ​​ໄປ​ຮັບ​ເອົາ​ເຄື່ອງ​ທັກ​ແຊ່ວ​ຊຸດ​ປະຈຳ​ຊົນ​ເຜົ່າ​ກັບ​​ແມ່​ຄ້າ ​ແລະ ພັກ​ຮຽນ​ ​ກໍ​​ໄປ​ຮັບຈ້າງ​ດຳນາ ​ແລະ ກ່ຽວ​ເຂົ້າ​ຢູ່​ບ້ານ​ເກີນ​, ​ເພື່ອ​ຫາ​ລາຍ​ໄດ້​ຊ່ວຍ​ແມ່ ​ແລະ ​ໃຊ້​ຈ່າຍ​ໃນ​ການ​ສຶກສາ​ຮ່ຳຮຽນ.

​ນາງ ແສງ​ຈັນ​ໄດ້​ກວ່າ​ອີກ​ວ່າ: ສຳລັບ​ຄວາມ​ຝັນ​ຂອງ​ນ້ອງ​ເອງ​ເມື່ອ​ຮຽນ​ຈົບ​ຊັ້ນ​ມັດທະຍົມ​ຕອນ​ປາຍ​ແລ້ວ ນ້ອງ​ຢາກ​ໄປ​ສຶກສາ​ຕໍ່​ຄະ​ນະ ​ແພດສາດ ​ເພາະ​ນ້ອງ​ຢາກ​ເປັນ​ໝໍ​ເພື່ອ​ມາ​ຊ່ວຍ​ເຫຼືອ​​ທຸກໆ​ຄົນ​ ​ແລະ ສິ່ງ​ທີ່​ເປັນ​ແຮງ​ບັນດານ​​ໃຈ​ທີ່​ເຮັດ​ໃຫ້​ນ້ອງ​ຂຽນ​ບົດ​ຄວາມ​ເຂົ້າ​ປະ​ກວດ​ນີ້ ກໍ​ເພາະປີຜ່ານມາ ​​ເອື້ອຍຂອງ​ນ້ອງ​ກໍ​ເຄີຍ​ໄດ້​ຮັບ​ທືນຈາກ​ໂຄງ ​“ແບ່ງ​ປັນ​ຄວາມ​​ຝັນ” ກັບ SCG ມາ​ແລ້ວ ​​ໃຫ້ມີ​ກຳລັງ​ໃຈ​​ໃນ​ການ​ສ້າງ​ຄວາມ​ຝັນ​ຂອງ​ນ້ອງໆ​ໃຫ້​ກາຍເປັນ​ຈິງ ​ແລະ ມີ​ແຮງ​ປັນ​ດານ​ໃຈ​ທີ່​ຈະ​ສູ້​ເພື່ອ​ຄວາມ​ຝັນຕໍ່​ໄປ.

ທ່ານ ພອນ​ສະ​ເຫຼີ​ມ ຂຸດ​ທະ​ກະ​ພັນ ຄະນະ​ຜູ້​ບໍລິຫານ SCG ​ກ່າວ​ວ່າ: ​ຂ້າພະ​ເຈົ້າ​ເອງ ​ມີ​ຄວາມ​ຍີ​ນດີ​ທີ່​ສຸດ​ທີ່​ໄດ້​ມາ​​​ຮັບຜິດຊອບ​ໂຄງການ SCG ໃນຄັ້ງ​ນີ້​​, ​ເຊິ່ງ​​ໄດ້​ຈັດ​ຂື້ນເປັນ​ຄັ້ງ​ທີ 4 ​ໃນ ສປປ ລາວ ​ແລະ ທາງ SCG ມີ​ຄວາມ​ຕັ້ງ​ໃຈ​ທີ່​ໃຫ້ການ​ສະໜັບສະໜູນ​ການ​ສຶກສາ​ຜ່ານ ​ໂຄງການນີ້ 2-3 ປີ​ທີ່​ຜ່ານ​ມາຈາກ​ຜົນສຳ​ລວດການ​ຮຽນ​ພົບ​ວ່າ​ນ້ອງໆ​ນັກຮຽນ​ທີ່​ໄດ້​ຮັບ​ທືນການ​ສຶກສາມີ​ຄວາມ​ກ້າວໜ້າ​ທາງ​ດ້ານ​ການ​ຮຽນ​ ​ແລະ ຫຼາຍ​ຄົນ​ແມ່ນ​ໄດ້​ເຂົ້າ​ສຶກສາ​ຕໍ່​ໃນ​ລະດັບ​ສູງ​ຂື້ນ, SCG ມີ​ຄວາມ​ພູມ​ໃຈ​ຫຼາຍ​ທີ່​ໄດ້​​ເປັນ​ສ່ວນ​ໜື່ງ​ຂອງ​ການ​ພັດທະນາ​ເຍົາວະ​ຊົນ​ລາວ ​ໃຫ້​ເຕີບ​ໃຫຍ່​ກາຍ​ເປັນ​ບຸກຄະລາ​ກອນ​ທີ່​ມີ​ຄຸນ​ນະພາ​ບ ​ແລະ ຈະ​ເປັນ​ກຳລັງ​ສຳຄັນ​ໃນ​ການ​ພັດທະນາ​ປະ​ເທດ​ຊາດ​ໃຫ້​ຈະ​ເລີ​ນຮຸ່ງ​ເຮືອງ​ໃນ​ອານາ​ຄົດ.

ແຫ່ລງຂ່າວ