ໂຄງການກໍ່ສ້າງທາງລົດໄຟ ລາວ-ຈີນ ແຕ່ນະຄອນຫລວງວຽງຈັນ-ຊາຍແດນບໍ່ເຕ່ນ ມີຄວາມຍາວ 400 ກວ່າກິໂລແມັດ, ຊຶ່ງເປັນໂຄງການຍຸດທະສາດສໍາຄັນຂອງລາວ, ໂດຍໄດ້ເລີ່ມສຳຫລວດ, ອອກແບບມາແຕ່ປີ 2010 ແລະ ໄດ້ສຳເລັດການເຮັດບົດວິພາກທາງດ້ານເສດຖະກິດໃນປີ 2012, ທັງນີ້ກໍເພື່ອໃຫ້ສອດຄ່ອງ ແລະ ແທດເໝາະກັບສະພາບເສດຖະກິດຂອງລາວຫລາຍທີ່ສຸດ ແລະຄາດວ່າຈະນຳໃຊ້ທຶນເຂົ້າໃນໂຄງການດັ່ງກ່າວປະມານ 6,5 ຕື້ໂດລາສະຫະລັດ, ໃນນັ້ນ ຝ່າຍລາວຖືຮຸ້ນ 30% ແລະ ຝ່າຍຈີນ ຖືຮຸ້ນ 70%, ໃນເບື້ອງຕົ້ນແຕ່ລະຝ່າຍຈະໄດ້ລົງທຶນເຂົ້າໃນການກໍ່ສ້າງຝ່າຍລະ 40% ຂອງຮຸ້ນທີ່ຖືທັງໝົດ ແລະ ຄາດວ່າພິທີວາງສີລາລຶກຢ່າງເປັນທາງການ ຈະມີຂຶ້ນໃນວັນທີ 2 ທັນວາ 2015ນີ້ ທີ່ນະຄອນຫລວງວຽງຈັນ ເພື່ອຂ່ຳນັບຮັບຕ້ອນວັນສະຖາປະນາ ສປປລາວ ຄົບ ຮອບ 40ປີ ໃຫ້ມີຄວາມໝາຍສຳຄັນຍິ່ງໆຂຶ້ນ.
ທ່ານ ລັດຕະນະມະນີ ຄູນນິວົງ ລັດຖະມົນຕີຊ່ວຍວ່າການກະຊວງໂຍທາທິການ ແລະ ຂົນສົ່ງ ໄດ້ຖະແຫລງທີ່ຫ້ອງວ່າການລັດຖະບານ ເມື່ອວັນທີ 16 ພະຈິກຜ່ານມານີ້ວ່າ: ໂຄງການກໍ່ສ້າງທາງລົດໄຟ ມີຄວາມຍາວປະມານ 417 ກິໂລແມັດ, ໂດຍຈະເລີ່ມຕົ້ນສ້າງນັບແຕ່ດ່ານຊາຍແດນບໍ່ເຕ່ນ ແຂວງຫລວງນໍ້າທາ ລົງມາຫານະຄອນຫລວງວຽງຈັນຊຶ່ງມີຄວາມກວ້າງຂອງລາງ 1,43 ແມັດ, ຄວາມກ້ວາງຂ້າງລາງເບື້ອງລະ 50 ແມັດ ແລະ ຈະໄດ້ລ້ອມຮົ້ວໄວ້ ເພື່ອຄວາມປອດໄພ, ເຊິ່ງເປັນມາດຕະ ການສາກົນທີ່ກຳນົດໄວ້, ໂດຍຈະສ້າງເປັນລາງດ່ຽວ ນຳໃຊ້ຄວບຄູ່ກັນລະຫວ່າງລົດໄຟຂົນສົ່ງສິນຄ້າ ທີ່ກຳນົດຄວາມໄວປະມານ 120 ກິໂລແມັດ/ຊົ່ວໂມງ ແລະ ຜູ້ໂດຍສານປະມານ 160 ກິໂລແມັດ/ຊົ່ວໂມງ, ຊຶ່ງປະກອບມີ 31 ຈຸດເຊື່ອມຕໍ່, ມີ 5 ສະຖານນີໃຫຍ່, ໃນນີ້ ຈະໄດ້ສ້າງເປັນອຸມົງ 76 ແຫ່ງມີຄວາມຍາວກວ່າ 195 ກິໂລແມັດ, ຂົວ 154 ແຫ່ງ ຍາວປະມານ 67 ກວ່າກິໂລແມັດ, ເຊິ່ງຄວາມຍາວຂອງຂົວ ແລະ ອຸມົງກວມເອົາ 63% ຂອງໄລຍະທາງທັງໝົດ. ທ່ານລັດຖະມົນຕີຊ່ວຍ ຍັງໄດ້ຮຽກຮ້ອງໃຫ້ປະຊາຊົນ, ໂດຍສະເພາະຜູ້ທີ່ຢູ່ໃກ້ກັບແລວທາງລົດໄຟໃຫ້ຄວາມຮ່ວມມືກັບຄະນະຮັບຜິດຊອບໂຄງການ ເພື່ອໃຫ້ໂຄງການດັ່ງກ່າວມີຜົນຄືບໜ້າໄປຕາມແຜນແລະ ນີ້ຖືວ່າເປັນໂຄງ ການປະຫວັດສາດ, ຍຸດທະສາດສຳຄັນຂອງລາວເຮົາ ເພື່ອການໄປມາຫາສູ່ ແລະ ການຂົນສົ່ງສິນຄ້າໄປຕ່າງປະເທດໄດ້ສະດວກສະບາຍຍິ່ງຂຶ້ນ.
ແຫ່ລງຂ່າວ
