ຂປລ. ໃນວັນທີ 17 ພະຈິກ 2015 ນີ້ ຢູ່ນະຄອນຫລວງວຽງຈັນ ກະຊວງການຕ່າງປະເທດ ຮ່ວມກັບສະຖານທູດ ເນເທີແລນ ຈັດງານສະເຫລີມ ສະຫລອງ ວັນສ້າງຕັ້ງ ສາຍພົວພັນ ການທູດ ຄົບຮອບ 40 ປີ ລະຫວ່າງ ສປປ ລາວ ແລະ ຣາຊະອານາຈັກ ເນເທີແລນ ໂດຍມີທ່ານ ສະເຫລີມໄຊ ກົມມະສິດ ລັດຖະມົນຕີຊ່ວຍວ່າການ ກະຊວງການຕ່າງປະເທດ, ທ່ານ Karel Johannes HARTONG ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ຣາຊະອານາຈັກເນເທີແລນ ປະຈຳສປປ ລາວ, ບັນດາທູຕານຸທູດ ແລະ ຕາງໜ້າອົງການ ຈັດຕັ້ງສາກົນ ພ້ອມແຂກຖືກເຊີນ ເຂົ້າຮ່ວມ.
ທ່ານ ສະເຫລີມໄຊ ກົມມະສິດ ກ່າວບົດປາໄສ ໂດຍຊີ້ໃຫ້ເຫັນເຖິງ ຄວາມໝາຍຄວາມສຳຄັນ ຂອງວັນສ້າງຕັ້ງ ສາຍພົວພັນການທູດ ລະຫວ່າງ ສອງປະເທດ ລາວ-ເນເທີແລນ ເຊິ່ງເປັນຂີດໝາຍອັນສຳຄັນ ໃນປະຫວັດສາດ ແຫ່ງການພົວພັນ ລາວ-ເນເທີແລນ, ພ້ອມທັງຕີລາຄາສູງ ຕໍ່ການຊ່ວຍເຫລືອ ອັນລ້ຳຄ່າຂອງລັດຖະບານ ເນເທີແລນ ໃຫ້ແກ່ ສປປ ລາວ ໂດຍຜ່ານຮູບການຫລາຍຝ່າຍ ເຊິ່ງປະກອບມີໂຄງການຕ່າງໆ ເປັນຕົ້ນ ໂຄງການເກັບກູ້ລະເບີດ, ໂຄງການຊ່ວຍເຫລືອສູນພະຍາດຜິວໜັງ, ໂຄງການສຸຂະພາບ ແລະ ໂຄງການປົກປັກຮັກສາປ່າໄມ້ ທັງນີ້, ເປັນການປະກອບສ່ວນອັນສຳຄັນເ ຂົ້າໃນການພັດທະນາ ແລະ ປັບປຸງຊີວິດການເປັນຢູ່ ຂອງປະຊາຊົນລາວ ໃຫ້ນັບມື້ດີຂຶ້ນ ທັງເປັນການຊ່ວຍເຫລືອສປປ ລາວ ບັນລຸເປົ້າໝາຍ ສະຫັດສະວັດ ດ້ານການພັດທະນາ ແລະ ນຳເອົາ ສປປ ລາວ ຫລຸດພົ້ນອອກຈາກ ສະຖານະພາບ ຄວາມດ້ອຍພັດທະນາ.
ທ່ານ ທູດ ເນເທີແລນ ໄດ້ຕີລາຄາສູງ ຕໍ່ສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະເທດ ໃນໄລຍະຜ່ານມາ ພ້ອມທັງຢືນຍັນ ຈະສືບຕໍ່ຊຸກຍູ້, ສົ່ງເສີມການພົວພັນ ຮ່ວມມື ລາວ-ເນເທີແລນ ໃຫ້ນັບມື້ນັບໄດ້ຮັບ ການພັດທະນາ ແລະ ແຕກດອກອອກຜົນ ຍິ່ງໆຂຶ້ນ.
ແຫລ່ງຂ່າວ:
