ວັນທີ 17 ພະຈິກ 2015 ທີ່ກະຊວງການເງິນ ທ່ານນາງ ທິບພະກອນ ຈັນທະວົງສາ ລັດຖະມົນຕີຊ່ວຍວ່າການກະຊວງການເງິນ ແລະ ທ່ານນາງ ແຊນດຼ້າ ນິໂຄຣ ຜູ້ຕາງໜ້າທະນາຄານພັດທະນາອາຊີ (ເອດີບີ) ໄດ້ຮ່ວມກັນລົງນາມໃນສັນຍາທຶນຊ່ວຍເຫຼືອລ້າ ມູນຄ່າ 3 ລ້ານໂດລາສະຫະລັດ ຫຼື ປະມານ 24 ຕື້ກີບ ເພື່ອສະໜັບສະໜູນຄວາມພະຍາຍາມຂອງລັດຖະບານລາວ ເພື່ອລົບລ້າງການແຜ່ລາມຂອງເຊື້ອໄຂ້ມະເລເລຍ ໂດຍສະເພາະແມ່ນ ເຊື້ອໄຂ້ມະເລເລຍຊະນິດທີ່ດື້ຢາຢູ່ພາຍໃນປະເທດ ເຊິ່ງມີພະນັກງານທີ່ກ່ຽວຂ້ອງທັງສອງຝ່າຍ ເຂົ້າຮ່ວມເປັນສັກຂີພິຍານ.
ເຊື້ອໄຂ້ມະເລເລຍ ແມ່ນໄພຂົ່ມຂູ່ດ້ານສາທາລະນະສຸກໃນລະດັບພາກພື້ນ ແລະ ເຊື້ອໄຂ້ມະເລເລຍຊະນິດທີ່ດື້ຢາສາຍພັນໃໝ່ ໄດ້ເນັ້ນເຖິງຄວາມຮຽກຮ້ອງໃຫ້ເພີ່ມຄວາມພະຍາຍາມ ເພື່ອຕ້ານກັບການແຜ່ລາມຂະຫຍາຍວົງກວ້າງ ເອດີບີ ພວມເຮັດວຽກຢ່າງໃກ້ຊິດກັບລັດຖະບານຂອງປະເທດຕ່າງໆ ພ້ອມກັບບັນດາຄູ່ຮ່ວມພັດທະນາ ແລະ ບັນດາອົງການວິຊາການຕ່າງໆຂອງໂລກ ເພື່ອຕໍ່ສູ້ກັບເຊື້ອພະຍາດດັ່ງກ່າວ ໃນບັນດາປະເທດຂອງອານຸພາກພື້ນແມ່ນ້ຳຂອງລວມທັງປະເທດລາວ.
ໂຄງການນີ້ ນຳໃຊ້ທຶນຊ່ວຍເຫຼືອລ້າເພີ່ມດັ່ງກ່າວນີ້ ຈະໄດ້ສ້າງຄວາມເຂັ້ມແຂງ ແລະ ລວມເອົາບັນດາແຜນງານຕ້ານເຊື້ອໄຂ້ມະເລເລຍແຫ່ງຊາດ ໃຫ້ມີຄວາມກົມກຽວ ໂດຍການເພີ່ມທະວີຄວາມເຂັ້ມແຂງໃຫ້ແກ່ລະບົບຄວບຄຸມເຊື້ອພະຍາດຕິດຕໍ່ ໃນເຂດພາກພື້ນໃນ 12 ແຂວງໃນທົ່ວປະເທດ ເຊິ່ງເປັນແຂວງທີ່ຢູ່ໃນເຂດພື້ນທີ່ຂອງໂຄງການ ລະບົບການຕິດຕໍ່ຄວບຄຸມ ພ້ອມທັງການໂຕ້ຕອບເຊື້ອໄຂ້ມະເລເລຍຈະໄດ້ຮັບການຂະຫຍາຍ ໂດຍສະເພາະ ໃນບັນດາເມືອງທີ່ຕິດກັບຊາຍແດນຂອງແຂວງອັດຕະປື ແລະ ແຂວງຈຳປາສັກ ບັນດາກິດຈະກຳຕ້ານເຊື້ອໄຂ້ມະເລເລຍຂ້າມຊາຍແດນຕ່າງໆ ທີ່ດຳເນີນການໂດຍ ສປປ ລາວ ຫວຽດນາມ ແລະ ກຳປູເຈຍ ພ້ອມທັງການແລກປ່ຽນຂໍ້ມູນຂ່າວສານກ່ຽວກັບເຊື້ອໄຂ້ມະເລເລຍ ລະຫວ່າງບັນດາປະເທດດັ່ງກ່າວ ກໍ່ຈະໄດ້ຮັບການຍົກລະດັບສູງຂຶ້ນ.
ທຶນຊ່ວຍເຫຼືອລ້າ 3 ລ້ານໂດລາ ສຳລັບ ສປປ ລາວ ນີ້ແມ່ນສ່ວນໜຶ່ງຂອງການສະໜອງທຶນ ມູນຄ່າ 9,5 ລ້ານໂດລາ ຈາກກອງທຶນດັ່ງກ່າວ ເພື່ອຕໍ່ສູ້ກັບເຊື້ອພະຍາດໄຂ້ມະເລເລຍໃນລາວ ກຳປູເຈຍ ແລະ ຫວຽດນາມ ລັດຖະບານລາວກໍ່ຈະໄດ້ປະກອບສ່ວນເພີ່ມເຂົ້າໃນໂຄງການ ມູນຄ່າ 150.000 ໂດລາ ໂຄງການດັ່ງກ່າວນີ້ ຈະໄດ້ຮັບການຈັດຕັ້ງປະຕິບັດໂດຍກະຊວງສາທາລະນະສຸກ ແລະ ຈະມີໄລຍະການຈັດຕັ້ງປະຕິບັດເປັນເວລາ 2 ປີ ເຊິ່ງຄາດວ່າຈະສຳເລັດພາຍໃນເດືອນທັນວາ 2017.
ແຫ່ລງຂ່າວ
