ວັນທີ 16 ພະຈິກ 2015 ທີ່ຫ້ອງວ່າການລັດຖະບານ ທ່ານ ສົມສະຫວດ ເລັ່ງສະຫວັດ ຮອງນາຍົກລັດຖະມົນຕີ ໄດ້ໃຫ້ກຽດຕ້ອນຮັບການເຂົ້າຢ້ຽມຄຳນັບຂອງທ່ານ ຈ່າວສຽງ ຫົວໜ້າຄະນະກະກຽມຮ່ວມໂຄງການກໍ່ສ້າງທາງລົດໄຟ ລາວ-ຈີນ ພ້ອມຄະນະ ໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ລາວ.
ໂອກາດດັ່ງກ່າວ ທ່ານຮອງນາຍົກລັດຖະມົນຕີ ໄດ້ສະແດງຄວາມຕ້ອນຮັບ ແລະ ທັງຕີລາຄາສູງຕໍ່ຄະນະດັ່ງກ່າວ ທີ່ເດີນທາງມາຢ້ຽມຢາມ ແລະ ເຮັດວຽກຢູ່ລາວຄັ້ງນີ້ ເຊິ່ງຈະເປັນການປະກອບສ່ວນອັນສຳຄັນ ເຂົ້າໃນການເພີ່ມທະວີສາຍພົວພັນມິດຕະພາບ ແລະ ການຮ່ວມມືອັນດີງາມລະຫວ່າງສອງປະເທດ ລາວ-ຈີນ ເວົ້າລວມ ເວົ້າສະເພາະ ກໍ່ຄືການຮ່ວມມືໃນວຽກງານໂຄງການກໍ່ສ້າງທາງລົດໄຟ ລາວ-ຈີນ ທີ່ຈະໄດ້ລົງມືກໍ່ສ້າງໃນມໍ່ໆນີ້ ເຊິ່ງມັນຈະເປັນສັນຍະລັກໜຶ່ງທາງປະຫວັດສາດ ລະຫວ່າງ ລາວ-ຈີນ ໃນໄລຍະໃໝ່ ພ້ອມທັງໄດ້ອວຍພອນໃຫ້ທ່ານ ຈ່າວສຽງ ຈົ່ງປະສົບຜົນສຳເລັດໃນການມາຢ້ຽມຢາມ ແລະ ເຮັດວຽກຢູ່ລາວ.
ທ່ານ ຈ່າວສຽງ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງທ່ານຮອງນາຍົກລັດຖະມົນຕີ ພ້ອມທັງໄດ້ແຈ້ງໃຫ້ຊາບກ່ຽວກັບການມາຢ້ຽມຢາມ ແລະ ເຮັດວຽກຢູ່ລາວໃນເທື່ອນີ້ ພ້ອມທັງສັນຍາວ່າຈະສືບຕໍ່ໃຫ້ການຊຸກຍູ້ ສົ່ງເສີມການພົວພັນຮ່ວມມືລະຫວ່າງສອງປະເທດ ລາວ-ຈີນ ໃຫ້ນັບມື້ນັບແໜ້ນແຟ້ນ ແລະ ກ້າວເຂົ້າສູ່ລວງເລິກ.
ແຫ່ລງຂ່າວ
