ກອງປະຊຸມຄົບຄະນະຄັ້ງທີ 11 ສະໄໝທີ IX ຂອງຄະນະບໍລິຫານງານສູນກາງພັກປະຊາຊົນປະຕິວັດລາວ, ໄດ້ໄຂຂຶ້ນແຕ່ວັນທີ 9 -16 ພະຈິກ2015, ໂດຍພາຍໃຕ້ການເປັນປະທານຂອງ ສະ ຫາຍຈູມມາລີ ໄຊຍະສອນ ເລຂາທິການໃຫຍ່ຄະນະບໍລິຫານງານສູນກາງພັກ.
ກອງປະຊຸມໄດ້ພ້ອມກັນສະຫລຸບຕີລາຄາຄືນກ່ຽວກັບຜົນການກະກຽມ ແລະ ດໍາເນີນກອງປະຊຸມໃຫຍ່ຂອງບັນດາອົງຄະນະພັກກະຊວງ, ອົງການ,ແຂວງ ແລະ ນະຄອນຫລວງວຽງຈັນທີ່ໄດ້ສໍາເລັດໄປແລ້ວ, ຕີລາຄາໝາກຜົນຂອງການເຮັດທົດລອງວຽກງານ 3 ສ້າງໃນໄລຍະເກືອບ 3 ປີຜ່ານມາ ແລະ ໃຫ້ທິດຊີ້ນໍາໃນການສືບຕໍ່ຜັນຂະຫຍາຍວຽກງານ 3 ສ້າງໃນຕໍ່ໜ້າ,
ສະຫລຸບຜົນການຈັດຕັ້ງປະຕິບັດຂະບວນການແຂ່ງຂັນຮັກຊາດ ແລະ ພັດທະນາ, ໂດຍສະເພາະແມ່ນຂະບວນການແຂ່ງຂັນສ້າງບ້ານພັດທະນາຕາມທິດ 3 ສ້າງ, ຄົ້ນຄວ້າປະກອບຄໍາຄິດເຫັນໃສ່ບັນດາເອກະສານທີ່ເປັນເນື້ອໃນຕົ້ນຕໍຂອງກອງປະຊຸມໃຫຍ່ຄັ້ງທີ X ຂອງພັກ ແລະ ວຽກງານຈຸດສຸມແຕ່ນີ້ເຖິງກອງປະ ຊຸມໃຫຍ່ຄັ້ງທີ X ຂອງພັກ.
ກອງປະຊຸມຄັ້ງນີ້ ໄດ້ດໍາເນີນຕາມລະບຽບວາລະປະຊຸມທີ່ໄດ້ວາງໄວ້ດ້ວຍບັນຍາກາດອັນຟົດຟື້ນປະຕິວັດ, ເຕັມໄປດ້ວຍລັກສະນະສ້າງສັນ, ກົງໄປກົງມາ, ມີເນື້ອໃນທີ່ອຸດົມສົມບູນສ່ອງແສງໃຫ້ເຫັນເຖິງການເສີມຂະຫຍາຍຈິດໃຈກ້າເບິ່ງຄວາມຈິງ, ປະດິດສ້າງ, ກ້າສະເໜີຄວາມເຫັນຕໍ່ແຕ່ລະບັນຫາທີ່ຍົກຂຶ້ນໃນກອງປະຊຸມ, ກອງປະຊຸມໄດ້ເປັນເອກະພາບ ແລະ ໃຫ້ທັດສະນະຕໍ່ບັນຫາຕ່າງເຊັ່ນ: ກ່ຽວກັບຜົນການດໍາເນີນກອງປະຊຸມໃຫຍ່ອົງຄະນະພັກກະຊວງ,ອົງການ, ແຂວງ ແລະ ນະຄອນ ຫລວງວຽງຈັນ, ແມ່ນໄດ້ຊິ້ນໍາໃຫ້ບັນດາກະຊວງ, ອົງການ ແລະ ນະຄອນຫລວງວຽງຈັນ ທີ່ສໍາເລັດກອງປະຊຸມໃຫຍ່ແລ້ວນັ້ນໃຫ້ຮີບຮ້ອນຈັດຕັ້ງເຊື່ອມຊຶມເພື່ອສ້າງຄວາມເຂົ້າໃຈເປັນເອກະພາບ ແລະພ້ອມກັນຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຂັ້ນຂອງຕົນລົງສູ່ກົມກອງ, ທ້ອງຖິ່ນ, ພະແນກ ການ, ເມືອງ ແລະບ້ານ ໂດຍສ້າງເປັນແຜນງານ, ໂຄງການລະອຽດຕິດພັນກັບການຊີ້ນໍາບັນຊາການຈັດຕັ້ງປະຕິບັດໃຫ້ເກີດຜົນຕົວຈິງ,ສໍາລັບບັນດາອົງການ ແລະ ກະຊວງທີ່ບໍ່ທັນໄດ້ດໍາເນີນກອງປະຊຸມໃຫຍ່ອົງຄະນະພັກຂອງຕົນນັ້ນໃຫ້ສືບຕໍ່ກະກຽມໃຫ້ດີເພື່ອດໍາເນີນກອງປະຊຸມໃຫຍ່ຄະນະພັກຂັ້ນຂອງຕົນໃນຕໍ່ໜ້າໂດຍຕິດພັນກັບການສ້າງຂະບວນການສະເຫລີມສະຫລອງວັນສະຖາປະນາ ສປປ ລາວ ຄົບຮອບ 40 ປີ, ວັນຄ້າຍວັນເກີດປະທານ ໄກສອນ ພົມວິຫານ ຄົບຮອບ 95ປີ ແລະ ຄໍານັບຮັບຕ້ອນກອງປະຊຸມໃຫຍ່ຄັ້ງທີ X ຂອງພັກ.
ກ່ຽວກັບຜົນການຈັດຕັ້ງປະຕິບັດການເຮັດທົດລອງວຽກງານ 3 ສ້າງ, ກອງປະຊຸມໄດ້ເປັນເອກະພາບຕີລາຄາວ່າ: ຄະນະເຮັດທົດລອງ 3 ສ້າງ, ໂດຍສະເພາະແມ່ນການສ້າງບ້ານພັດທະນາຢູ່ 109 ບ້ານເປົ້າໝາຍນັ້ນ ໂດຍທົ່ວໄປແມ່ນໄດ້ປະຕິບັດຖືກທິດທາງທີ່ກໍານົດໄວ້, ສ້າງໃຫ້ບ້ານເຫລົ່ານີ້ມີການຫັນປ່ຽນໃໝ່ຢ່າງຮອບດ້ານ, ລະບົບການເມືອງໄດ້ຮັບການປັບປຸງໃຫ້ມີຄວາມໜັກແໜ້ນ, ເຂັ້ມແຂງ, ປະຊາຊົນບັນດາເຜົ່າມີຄວາມສາມັກຄີປອງດອງ ແລະ ເປັນເຈົ້າການໃນການປົກປັກຮັກສາ ແລະພັດທະນາບ້ານຊ່ອງຂອງຕົນ, ຊີວິດການເປັນຢູ່ນັບມື້ນັບດີຂຶ້ນ, ກ່ຽວກັບຜົນການຈັດຕັ້ງປະຕິ
ບັດວຽກງານແຂ່ງຂັນຮັກຊາດ ແລະ ພັດທະນາ, ກອງປະຊຸມໄດ້ພ້ອມກັນຕີລາຄາວ່າ: ໄລຍະຜ່ານມາວຽກງານການແຂ່ງຂັນຮັກຊາດ ແລະ ພັດທະນາ ກໍໄດ້ຮັບການເອົາໃຈໃສ່ໃນການຈັດຕັ້ງປະຕິບັດ ແລະມີຜົນສໍາເລັດຕົວຈິງ, ອັນພົ້ນເດັ່ນແມ່ນການປັບປຸງລະບົບການເມືອງຢູ່ຮາກຖານກໍໄດ້ຮັບການເອົາໃຈໃສ່ກວ່າເກົ່າ, ຄວາມສະຫງົບ ແລະ ຄວາມເປັນລະບຽບຮຽບຮ້ອຍຢູ່ຮາກຖານກໍໄດ້ຮັບການປັບປຸງໃຫ້ດີຂຶ້ນ, ການຜະລິດເປັນສິນຄ້າຂອງປະຊາຊົນຢູ່ທຸກທ້ອງຖິ່ນໄດ້ເກີດເປັນໜໍ່ແໜງຈະແຈ້ງ ແລະ ເລີ່ມຂະຫຍາຍອອກເປັນຂະບວນການທີ່ນັບມື້ກ້ວາງຂວາງ, ແຂງແຮງ, ການແກ້ໄຂຄວາມທຸກຍາກໄດ້ມີຜົນສໍາເລັດດີພໍສົມຄວນ, ຊີວິດການເປັນຢູ່ຂອງປະຊາຊົນບັນດາເຜົ່າກໍໄດ້ຮັບການປັບປຸງຍົກລະດັບຢ່າງຈະແຈ້ງຈາກຂະບວນການຕົວຈິງໄດ້ເກີດມີບຸກຄົນ, ກົມກອງລວມໝູ່, ຄອບຄົວ, ນັກພັດທະນາກອນ, ບ້ານພັດທະນາ ທີ່ເປັນຕົວແບບດີເດັ່ນຫລາຍສົມຄວນ.
ກອງປະຊຸມໄດ້ໃຫ້ທິດຊີ້ນໍາການປັບປຸງເອກະສານທີ່ຈະສະເໜີຜ່ານກອງປະຊຸມໃຫຍ່ຄັ້ງທີ X ຂອງພັກພິຈາລະນາ ແລະ ຮັບຮອງເອົາໂດຍສັງລວມແລ້ວກອງປະຊຸມໃຫ້ທັດສະນະວ່າ: ການປັບປຸງຮ່າງລາຍງານການເມືອງ,ຮ່າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ VIII (2016-2020) ຮ່າງຍຸດທະສາດການພັດທະນາເສດຖະກິດ-ສັງຄົມແຫ່ງຊາດໄລຍະ 10 ປີ (2015-2025) ແລະ ວິໄສທັດຮອດປີ 2030 ຮ່າງກົດລະບຽບຂອງພັກ ແລະ ບັນຫາດ້ານບຸກຄະລາກອນໃຫ້ແກ່ສະໄໝທີ X ແມ່ນດີ ແລະ ສົມບູນກວ່າເກົ່າ, ພ້ອມທັງຮຽກຮ້ອງມາຍັງທົ່ວພັກ,ທົ່ວກໍາລັງປະກອບອາວຸດ ແລະ ທົ່ວປວງຊົນລາວທັງຊາດ ຈົ່ງເພີ່ມທະວີຄວາມສາມັກຄີເປັນປຶກແຜ່ນແໜ້ນໜາຢູ່ອ້ອມຂ້າງສູນກາງພັກ ແລະ ລັດຖະບານພ້ອມກັນຕັດສິນໃຈຜ່ານຜ່າຄວາມຫຍຸ້ງຍາກຕ່າງໆ, ສືບຕໍ່ຍູ້ແຮງຂະບວນການປົກປັກຮັກສາສ້າງສາປະເທດຊາດ, ຂະບວນການຮັກຊາດ ແລະ ພັດທະນາຢ່າງແຂງແຮງ ແລະ ຕໍ່ເນື່ອງໂດຍຕິດພັນກັບການຈັດຕັ້ງປະຕິບັດວຽກງານ 3 ສ້າງກໍຄືມະຕິກອງປະຊຸມໃຫຍ່ຄັ້ງທີ IX ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ VII ໃນໄລຍະທ້າຍສະໄໝໃຫ້ບັນລຸໝາກຜົນອັນຈົບງາມ, ສືບຕໍ່ນໍາພາປະເທດຊາດກ້າວຂຶ້ນແລະ ຫລຸດພົ້ນອອກຈາກສະຖານະພາບດ້ອຍພັດທະນາໃນປີ 2020 ຢ່າງມີໄຊ.
ແຫ່ລງຂ່າວ
