ຂ່າວດີສຳລັບສາວໆ ທີ່ຮັກການແຕ່ງໜ້າເປັນຊີວິດຈິດໃຈ ຫລື ອາດຈະມັກທາລິບສະຕິກເພື່ອໃຫ້ໃບໜ້າງາມສົດໃສຢູ່ສະເໝີ ເພາະເວບໄຊ Sanook! Health ຈະບອກວ່າລິບສະຕິກສີງາມເຫລົ່ານີ້ ບໍ່ໄດ້ເປັນພຽງເຄື່ອງສຳອາງທຳມະດາ ແຕ່ຍັງຊ່ວຍປ້ອງກັນໂລກມະເຮັງຜິວໜັງໄດ້ອີກດ້ວຍ
ລິບສະຕິກ ປົກປ້ອງສາວ ໆ ຈາກໂລກມະເຮັງຜິວໜັງ?
ແພດຍິງ ເຈດສິກາ ວູ ແພດຜູ້ຊ່ຽວຊານດ້ານພະຍາດຜິວໜັງກ່າວວ່າ ການທາລິບສະຕິກເປັນອີກໜຶ່ງວິທີທີ່ຊ່ວຍປ້ອງກັນການເກີດ Basal Cell Carcinoma ຫລື ມະເຮັງຜິວໜັງຊະນິດໜຶ່ງທີ່ພົບເລື້ອຍທີ່ສຸດ ເກີດຈາກການທີ່ຜິວໜັງສຳຜັດແສງແດດທີ່ມີຄ່າ UV ຫລາຍເກີນໄປ ຫລື ຕິດຕໍ່ກັນເປັນເວລາດົນ ຊຶ່ງມະເຮັງຜິວໜັງຊະນິດນີ້ສາມາດພົບໄດ້ເລື້ອຍໃນບໍລິເວນດັ່ງຕໍ່ໄປນີ້
– ຫລັງມື
– ໃບໜ້າ
– ດັງ
– ໜ້າຜາກ
– ຫູ
– ຮີມສົບ
ດັ່ງນັ້ນການທາລິບສະຕິກທີ່ມີສີທຶບໜາ ກໍ່ຈະມີຄຸນສົມບັດຄືກັບຜິວໜັງທີ່ໄດ້ຮັບການປົກປ້ອງແສງແດດຈາກຄີມກັນແດດນັ້ນເອງ ເພາະສະນັ້ນລິບສະຕິກເປັນເພື່ອນແທ້ຂອງຜູ້ຍິງພໍໆ ກັບ ເພັດ ຫລືເກີບສົ້ນສູງແນ່ນອນ ນອກຈາກຈະເຮັດໃຫ້ເຮົາເບິ່ງງາມຂຶ້ນແລ້ວ ຍັງປົກປ້ອງເຮົາຈາກໂລກມະເຮັງອີກດ້ວຍ