ໃນຕອນເຊົ້າຂອງວັນທີ 12 ພະຈິກ 2015, ທ່ານ ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດແຫ່ງ ສປປ ລາວ ໄດ້ນຳພາຄະນະຜູ້ແທນ ເຂົ້າຮ່ວມກອງປະຊຸມລັດຖະມົນຕີຕ່າງປະເທດຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງຄັ້ງປະຖົມມະລຶກທີ່ເມືອງຊຽງຮຸ່ງ, ແຂວງຢຸນນານ, ສປຈີນ, ຊຶ່ງມີບັນດາທ່ານລັດຖະມົນຕີຕ່າງປະເທດ,ເຈົ້າໜ້າທີ່ອາວຸໂສ ແລະ ຄະນະຜູ້ແທນຈາກປະເທດສະມາຊິກແມ່ນ້ຳຂອງຄື: ກຳປູເຈຍ, ສປປລາວ, ສສ. ມຽນມາ, ໄທ ແລະ ສສ. ຫວຽດນາມ ພ້ອມດ້ວຍປະເທດເຈົ້າພາບ ສປ ຈີນ ເຂົ້າຮ່ວມຢ່າງພ້ອມພຽງ ແລະດຳເນີນໄປພາຍໃຕ້ການເປັນປະທານຮ່ວມຂອງທ່ານລັດຖະມົນຕີວ່າການກະຊວງການຕ່າງປະເທດຂອງ ສປ ຈີນ ແລະ ໄທ. ເພື່ອກະກຽມໃຫ້ແກ່ກອງປະຊຸມລັດຖະມົນຕີຕ່າງປະເທດຂອງຂອບການຮ່ວມມືດັ່ງກ່າວປະເທດສະມາຊິກແມ່ນ້ຳຂອງ ແລະ ສປ ຈີນ ໄດ້ຈັດກອງປະຊຸມເຈົ້າໜ້າທີ່ອາວຸໂສຂຶ້ນສອງຄັ້ງໃນເດືອນ ເມສາ 2015 ທີ່ປັກກິ່ງ ແລະ ເດືອນສິງຫາ 2015 ທີ່ແຂວງຊຽງລາຍ.
ຈຸດປະສົງຂອງກອງປະຊຸມຄັ້ງນີ້ແມ່ນເພື່ອປຶກສາຫາລື ແລະ ຮັບຮອງເອົາເອກະສານແນວຄວາມຄິດຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ ແລະ ຮັບຮອງເອົາບົດຖະແຫຼງຂ່າວຮ່ວມຂອງກອງປະຊຸມເພື່ອປະກາດການສ້າງຕັ້ງກົນໄກການຮ່ວມມືຂອງຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງຢ່າງເປັນທາງການ. ພ້ອມນີ້, ໄດ້ປຶກສາຫາລືແລະແລກປ່ຽນຄຳຄິດເຫັນກ່ຽວກັບບັນດາໂຄງການທີ່ເຫັນຜົນໄວຕາມການສະເໜີຂອງບັນດາປະເທດສະມາຊິກຊຶ່ງນອນຢູ່ໃນ3 ຂົງເຂດຫຼັກ ຄື: 1) ຂົງເຂດການເມືອງແລະຄວາມໝັ້ນຄົງ, 2) ຂົງເຂດເສດຖະກິດແລະການພັດທະນາແບບຍືນຍົງ, ແລະ 3) ຂົງເຂດສັງຄົມ, ວັດທະນະທຳ ແລະ ການພົບປະແລກປ່ຽນລະຫວ່າງປະຊາຊົນກັບປະຊາຊົນ. ເພື່ອເປັນການຈັດຕັ້ງຜັນຂະຫຍາຍການຮ່ວມມືໃນ 3 ຂົງເຂດຫລັກດັ່ງກ່າວ, ກອງປະຊຸມໄດ້ປຶກສາຫາລືກ່ຽວກັບ 5 ຂົງເຂດຮ່ວມມືບຸລິມະສິດ : ການເຊື່ອມຈອດ, ການຍົກລະດັບຂີດຄວາມສາມາດໃຫ້ແກ່ການຜະລິດ, ການຄຸ້ມຄອງຊັບພະຍາກອນນໍ້າຢ່າງຍືນຍົງ, ການພັດທະນາເຂດເສດຖະກິດຂ້າມຊາຍແດນ ແລະ ການຫຼຸດຜ່ອນຄວາມທຸກຍາກ.
ກອງປະຊຸມໄດ້ຕົກລົງເຫັນດີເປັນເອກະພາບກັນກຳນົດກົນໄກການຮ່ວມມືໃນຫຼາຍລະດັບຄື: ກອງປະຊຸມສຸດຍອດ, ກອງປະຊຸມຂັ້ນລັດຖະມົນຕີຕ່າງປະເທດ, ກອງປະຊຸມເຈົ້າໜ້າທີ່ອາວຸໂສ ແລະ ກອງປະຊຸມໜ່ວຍງານວິຊາການພ້ອມທັງເຫັນດີຈັດກອງປະຊຸມສຸດຍອດຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງຄັ້ງປະຖົມມະລຶກຂຶ້ນໃນປີ 2016 ທີ່ ສປ ຈີນ.
ໃນຕອນບ່າຍຂອງວັນດຽວກັນ, ບັນດາລັດຖະມົນຕີຕ່າງປະເທດພ້ອມຄະນະໄດ້ໄປຢ້ຽມຊົມເຂື່ອນໄຟຟ້ານໍ້າຕົກຊຽງຮຸ່ງ, ຢ້ຽມຊົມລຳແມ່ນ້ຳລ້ານຊ້າງ ແລະ ໝູ່ບ້ານວັດທະນະທໍາຂອງຊຽງຮຸ່ງ.
ໃນໂອກາດເຂົ້າຮ່ວມກອງປະຊຸມດັ່ງກ່າວນີ້, ທ່ານ ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດແຫ່ງ ສປປ ລາວ ໄດ້ມີໂອກາດພົບປະສອງຝ່າຍກັບທ່ານຫວັງຢີ, ລັດຖະມົນຕີວ່າການກະຊວງການຕ່າງປະເທດແຫ່ງສປຈີນເພື່ອປຶກສາຫາລືກ່ຽວກັບການເສີມຂະຫຍາຍການຮ່ວມມືຂອງສອງປະເທດ ແລະ ແລກປ່ຽນຄຳຄິດຄຳເຫັນກ່ຽວກັບແຜນການຮ່ວມມືສອງຝ່າຍໃນຕໍ່ໜ້າໃນຖານະປະເທດເພື່ອນມິດໃກ້ຊິດ.
ຂ່າວຈາກ ໜັງສືພິມລາວພັດທະນາ
